جالپى وڭدەلەتىن اۋماقتىڭ كولەمى - 2424،54 گەكتار.
الماتىدا بۇگىن كەنەگە قارسى دەزينفەكسيالىق وندەۋ جۇمىستارى باستالدى. بۇل تۋرالى الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتىنەن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتىدا ورماندى القاپ پەن قالا ساياباقتارىندا، تىنىمباقتارىندا كەنەلەرگە قارسى دەزينفەكسيالىق وڭدەۋ جۇمىستارىنىڭ 1 كەزەڭى باستالدى. جالپى وڭدەلەتىن اۋماقتىڭ كولەمى - 2424،54 گەكتار.
قالالىق سانيتارلىق-ەپيدەميولوگيالىق باقىلاۋ دەپارتامەنتىنەن حابارلاعانداي، دەزينفەكسيالىق وڭدەۋ جۇمىستارمەن 8 ورماندى القاپ (كولەمى - 1904،924 گا) جانە 144 قالا ساياباقتارى، تىنىمباقتار (كولەمى – 519،616 گا) قامتىلادى جانە اۋا رايىنا بايلانىستى (قۇرعاق، جاۋىن-شاشىنسىز كۇندەرى) كەستەگە سايكەس 5 ءساۋىر - 5 مامىر ارالىعىندا جۇرگىزىلەدى. كەنە ەنسەفاليتىنە قارسى كۇرەستىڭ ناتيجەسى ساپالى بولۋى ءۇشىن وڭدەۋ جۇمىسى ەكى كەزەڭدە جۇرگىزىلەدى. ەكىنشى كەزەڭ: مامىر، ماۋسىم ايلارىندا وتەدى.
دەزينفەكسيالىق ءىس-شارانى قالالىق سانيتارلىق-ەپيدەميولوگيالىق باقىلاۋ قىزمەتىنىڭ باقىلاۋىمەن «الماتى قالاسىنىڭ دەزينفەكسيا ورتالىعى» فيليالى جۇرگىزەدى.
دەزينفەكسيالىق بريگادالار قاجەتتى قۇرالدارمەن، كولىكتەرمەن جانە جەكە باس قورعانىش زاتتارىمەن قامتاماسىز ەتىلگەن. كەنە ەنسەفاليتىنە قارسى دەزينفەكسيالىق وڭدەۋ جۇمىستارىن جۇرگىزۋ ءۇشىن «فاۆوريت» اكاريسيدتىك پرەپاراتى قولدانىلادى. پرەپارات از ۋىتتى جانە ءقاۋىپتى ەمەس (3-4 كلاسس). كەنەلەرمەن كۇرەسۋ ءۇشىن قولدانىلاتىن دوزالار از جانە ادامدار مەن جانۋارلار ءۇشىن ءقاۋىپسىز بولىپ تابىلادى. وڭدەۋ جۇمىستارى تاڭعى ۋاقىتتا جۇرگىزىلەدى.
وڭدەلەتىن اۋماقتاردىڭ شەكارالارىندا «كەنەگە قارسى وڭدەۋ جۇرگىزىلۋدە» دەگەن ەسكەرتۋ حابارلامالارى بار تاقتالار ورناتىلادى.
«قالا تۇرعىندارى تومەندە كورسەتىلگەن ساقتىق شارالارىن ساقتاۋى قاجەت: اكاريسيدتى پرەپاراتتىڭ ەرىتىندىسىن دەنەگە نەمەسە كيىمگە تيگىزىپ الماس ءۇشىن، كەنەگە قارسى دەزينسەكسيالىق وڭدەۋ جۇمىستارى جۇرگىزىلگەن جەرلەردەن قاشىقتاۋ ءجۇرۋ كەرەك؛ جەرگە شاشىلعان پرەپارات كەپكەنگە دەيىن ءۇي جانۋارلارىن وڭدەۋ جۇمىستارى جۇرگىزىلگەن جەرلەرگە جىبەرمەۋ كەرەك؛ وڭدەۋ جۇمىستارى جۇرىزىلگەن جەرلەردەن 40 كۇن بويى ساڭىراۋقۇلاق، ءشوپ نەمەسە جيدەكتەردى جيناۋعا جانە پايدالانۋعا بولمايدى؛ تۇرعىندار مەن قوناقتارعا قالا ساياباقتارى مەن تىنىمباقتارىنا، تابيعي وشاقتارعا كەنەلەرگە قارسى وڭدەۋ جۇرگىزۋ كەزىندە جانە ودان كەيىن 3 كۇن بويى بارماۋى كەرەك»، - دەپ ەسكەرتتى دەپارتامەنتتە.