ۇكىمەت بۇل كورسەتكىشتى 2025 جىلى 50%-عا جەتكىزۋدى كوزدەپ وتىر.
قازاقستان ۇكىمەتى الداعى ۋاقىتتا سپورتپەن شۇعىلداناتىن ازاماتتار سانىن ارتتىرۋدى كوزدەپ وتىر. بۇل تۋرالى ۇكىمەتتىڭ كەزەكتى وتىرىسىندا ايتىلدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
قازاقستان پرەمەر-مينيسترى 2025 جىلى سپورتپەن اينالىساتىنداردىڭ ۇلەسىن 50%-عا دەيىن جەتكىزۋ كەرەك ەكەنىن ايتتى. ول ءۇشىن سالاۋاتتى ءومىر سالتى مەن سپورتتىڭ پايداسى تۋرالى كەڭىنەن ناسيحاتتالۋى ءتيىس.
سونداي-اق بۇل اۋرۋ-سىرقاۋدىڭ الدىن الۋ، سپورتتىق ينفراقۇرىلىمدى كەڭەيتۋ جانە بۇقارالىق سپورت سالاسىن قارجىلاندىرۋدى ۇلعايتۋ سەكىلدى اۋقىمدى جۇمىستى تالاپ ەتەدى.
«وسى ماقساتتا مەملەكەت باسشىسىنىڭ تاپسىرماسى بويىنشا شامامەن 21 ملرد تەڭگەنى كاسىبي سپورت تۇرىنەن الىپ، بۇقارالىق سپورتقا قايتا باعىتتادىق. ونىڭ 6 ملرد تەڭگەسى مەملەكەتتىك سپورتتىق تاپسىرىستى قارجىلاندىرۋعا جۇمسالدى. مەملەكەتتىك تاپسىرىستىڭ ارقاسىندا مىڭداعان بالا سپورت سەكسيالارىنا تەگىن بارۋعا مۇمكىندىك الدى. سەكسيالارعا كەتەتىن شىعىندار بيۋدجەتتەن تولەنەدى. وتكەن جىلى رەسپۋبليكا بويىنشا 162 مىڭ بالا وسىنداي مۇمكىندىككە يە بولدى. ال بيىل 275 مىڭ بالا قامتىلادى»، — دەدى ءاليحان سمايىلوۆ.
مەملەكەتتىك تاپسىرىس اياسىندا سپورتپەن شۇعىلداناتىن بالالاردىڭ ەڭ كوپ ۇلەسى الماتى قالاسى مەن الماتى وبلىسىندا تىركەلگەن. ازىرگە اقتوبە جانە سولتۇستىك قازاقستان وبلىستارى كوش سوڭىندا قالىپ وتىر. بۇقارالىق سپورتقا باعىتتالعان قارجىنىڭ 4،9 ملرد تەڭگەسى سپورتتىق ينفراقۇرىلىمداردى سالۋعا جانە جوندەۋگە ءبولىندى.
وتكەن جىلى ەلىمىزدە 41 دەنە شىنىقتىرۋ-ساۋىقتىرۋ كەشەنى ىسكە قوسىلسا، ونىڭ 32ء-سى اۋدان ورتالىقتارى مەن اۋىلدىق جەرلەردە پايدالانۋعا بەرىلدى. اۋىلداردى سپورت نۇسقاۋشىلارىمەن قامتاماسىز ەتۋ ماسەلەسى شەشىمىن تاۋىپ كەلەدى. تەك 2021 جىلدىڭ وزىندە 1833 اۋىلدا سپورت نۇسقاۋشىسى دەگەن شتاتتىق لاۋازىم ەنگىزىلدى.
«2025 جىلى ءاربىر تىرەك اۋىلدا سپورتتىق شارالار مەن سەكسيالاردى ۇيىمداستىرۋعا جاۋاپتى جاتتىقتىرۋشى نەمەسە نۇسقاۋشى بولادى. دەنە شىنىقتىرۋمەن جانە سپورتپەن اينالىسۋ ءۇشىن سپورتتىق ينفراقۇرىلىم جاسىنا، تۇرعىلىقتى جەرىنە جانە تابىسىنا قاراماستان، بارلىق ازاماتتارعا بىردەي قولجەتىمدى بولۋى ءتيىس»، — دەدى ق ر پرەمەر-مينيسترى.
ۇلكەن سپورتتاعى جەتىستىكتەر بۇقارالىق سپورتتان باستاۋ الاتىنىن ايتا كەتكەن ءجون. سپورتپەن شۇعىلداناتىن بالالاردىڭ قاتارى كوبەيگەن سايىن كاسىبي سپورتقا بارعىسى كەلەتىندەردىڭ سانى دا ارتا تۇسەدى، دەنى ساۋ، قۋاتتى ۇلتتىڭ نەگىزىن قالىپتاستىرادى. بۇل سالانى دامىتۋ قاعيداتتارى مەن تاسىلدەرى دەنە شىنىقتىرۋ مەن سپورتتى دامىتۋدىڭ 2025 جىلعا دەيىنگى تۇجىرىمداماسىندا كورىنىس تابادى.
وسىعان بايلانىستى ءاليحان سمايىلوۆ مادەنيەت جانە سپورت مينيسترلىگىنە ءبىلىم جانە عىلىم مينيسترلىگىمەن جانە اكىمدىكتەرمەن بىرلەسىپ، جەرگىلىكتى بيۋدجەتتەن قوسىمشا قاراجات ءبولۋ ارقىلى بالالاردى تەگىن سپورتتىق سەكسيالارمەن قامتۋدى ۇلعايتۋدى تاپسىردى.
«مادەنيەت جانە سپورت مينيسترلىگى ءبىلىم جانە عىلىم مينيسترلىگىمەن جانە اكىمدىكتەرمەن بىرلەسىپ، بيىلعى 1 شىلدەگە دەيىن سپورتتىق ينفراقۇرىلىم جوق ەلدى مەكەندەردە ولاردى سالۋ جوسپارىن قابىلداسىن»، — دەدى ق ر پرەمەر-مينيسترى.
ءوز كەزەگىندە دەنساۋلىق ساقتاۋ مينيسترلىگىنە ۇلتتىق ەكونوميكا، اقپارات جانە قوعامدىق دامۋ مينيسترلىكتەرىمەن جانە اكىمدىكتەرمەن بىرلەسىپ، سالاۋاتتى ءومىر سالتىن قالىپتاستىرۋ مەن اۋرۋ-سىرقاۋدىڭ الدىن الۋ شارالارىن ناسيحاتتاۋدى كۇشەيتۋ تاپسىرىلدى.