الماتى قالاسىنىڭ ەكولوگيا جانە قورشاعان ورتا باسقارماسى 24 سۋبۇرقاقتى رەكونسترۋكسيالاۋ جوباسىن ازىرلەپ جاتىر، دەپ حابارلايدى Almaty-akshamy.kz
«ءبىز قالانىڭ كوممۋنالدىق مەنشىگىندەگى قايتا جاڭعىرتۋدى قاجەت ەتەتىن سۋبۇرقاقتاردىڭ ءتىزىمىن جاسادىق. بۇل ساس اتىنداعى بالالار مەن جاسوسپىرىمدەر تەاترى، سيرك، قالالىق اكىمدىك، رەسپۋبليكا الاڭىنا قاراما-قارسى، جامبىل ەسكەرتكىشى مەن «مەدەۋ» بتسك جانىنداعى جانە ت.ب. سۋبۇرقاقتار. بۇل جوبا 2024 جىلى جۇزەگە اسىرىلادى»، - دەدى الماتى قالاسى ەكولوگيا جانە قورشاعان ورتا باسقارماسى جايلى قالالىق ورتا ءبولىمىنىڭ باسشىسى ەرنار بوكەشوۆ.
الماتىدا 150 سۋبۇرقاق بار، ونىڭ 65ء-ى قالانىڭ بالانسىندا، قالعانى جەكە مەنشىكتە. وسى جىلى قبتۋ-دىڭ ارتىنداعى «سولتۇستىك» سكۆەردەگى سۋبۇرقاق رەكونسترۋكسيادان ءوتتى. بىلتىر وقۋشىلار سارايىنىڭ الدىندا «قۇرعاق» سۋبۇرقاق اشىلدى، ال بيىل جىل سوڭىنا دەيىن «سلاۆا اەروپورتا» سكۆەرىندە «قۇرعاق» سۋبۇرقاق اشۋ جوسپارلانعان.