الداعى ءۇش جىلعا ارنالعان بيۋدجەتكە سايكەس، 344 مىڭ وقۋشىنى قامتيتىن 216 مەكتەپتى، 12 ينتەرناتتى جانە 20 كوللەدجدى ۇستاۋعا شامامەن 250 ملرد تەڭگە بولىنەدى.
الماتىدا كەلەسى جىلى مەكتەپتەردى سەيسميكالىق كۇشەيتۋ جانە قايتا قۇرۋ، جاڭعىرتۋ جۇمىستارى جالعاسادى. قالانىڭ 2025-2027 جىلدارعا ارنالعان بيۋدجەتى ءماسليحاتتىڭ كەزەكتى سەسسياسىندا ماقۇلداندى، دەپ حابارلايدى aqshamnews.kz
مەكتەپتەردى قايتا قۇرۋ جانە سەيسميكالىق كۇشەيتۋ الماتى اكىمدىگىنىڭ باسىم باعىتىنىڭ ءبىرى بولىپ قالا بەرەدى. مەگاپوليستە جاڭا ءۇش جىلدىق بيۋدجەتتىڭ قابىلدانۋىمەن جوعارى ساپا ستاندارتتارىن ساقتاي وتىرىپ، وقۋ ورىندارىن جاڭعىرتۋ جالعاسادى.
مەملەكەت باسشىسىنىڭ سەيسميكالىق قاۋىپسىزدىكتى قامتاماسىز ەتۋ جونىندەگى تاپسىرمالارىن ورىنداۋ اياسىندا 2025 جىلى 3 مەكتەپتىڭ سەيسميكالىق كۇشەيتۋ جۇمىستارى اياقتالادى، تۇركسىب اۋدانىنداعى №50 مەكتەپ-ليسەيدە جانە اۋەزوۆ، بوستاندىق، مەدەۋ اۋداندارىنداعى 7 بوبەكجاي-بالاباقشادا سەيسميكالىق كۇشەيتۋ جۇمىستارى باستالادى. بۇعان قوسا، زەردەلى جانە شۇعىلا شاعىن اۋداندارىندا 2 مەكتەپتىڭ قۇرىلىسى اياقتالىپ، 12 مەكتەپتە قايتا قۇرۋ جۇمىستارى جۇرگىزىلەدى. 2023-2024 جىلدارى قالادا 11 مەكتەپتە كۇردەلى جوندەۋ جانە سەيسميكالىق كۇشەيتۋ جۇمىستارى اياقتالدى.
سونىمەن قاتار، 2025 جىلى ۇلتتىق «جايلى مەكتەپ» ۇلتتىق جوباسى اياسىندا 24،2 مىڭ ورىندىق 14 مەكتەپ پايدالانۋعا بەرىلەدى. بۇل كەلەسى وقۋ جىلىنا دەيىن وقۋشى ورىندارىنىڭ تاپشىلىعىن «قاجەتتى» دەڭگەيگە – 3-4 مىڭ ورىنعا دەيىن تومەندەيدى.
قابىلدانعان شارالاردىڭ ارقاسىندا الماتى مەكتەپتەرىندە ءبىر اۋىسىمدى وقىتۋعا كەزەڭ-كەزەڭىمەن كوشۋ جالعاسۋدا. كەلەسى وقۋ جىلىنا قاراي 200-دەن استام مەملەكەتتىك مەكتەپتىڭ 43ء-ى (12،5%-دان 18،4%-عا دەيىن) ءبىر اۋىسىمدىق وقىتۋ جۇيەسىنە كوشەدى.
قالا مەكتەپتەرىنىڭ ينفراقۇرىلىمىن جاڭعىرتۋعا، دامىتۋعا ەرەكشە نازار اۋدارىلادى. بيىل 89 مەكتەپكە 168 جاڭا موديفيكاسياداعى كابينەت ساتىپ الىندى، بۇل زاماناۋي پاندىك كابينەتتەرمەن قامتاماسىز ەتۋدى 86،3%-عا جەتكىزدى.
سونىمەن قاتار، 2025 جىلى وربيتا-3، التىن بەسىك، قۇرامىس، شۇعىلا جانە №10 شاعىن اۋداندارىندا 5 بالاباقشانىڭ قۇرىلىسى مەن جاڭارتۋى جالعاسادى. بۇل مەملەكەت باسشىسىنىڭ 2025 جىلعا دەيىن 3 جاستان 6 جاسقا دەيىنگى بالالاردىڭ 97%-ىن مەكتەپكە دەيىنگى بىلىممەن قامتۋ تۋرالى تاپسىرماسىن ىسكە اسىرۋ اياسىندا جاسالادى.
سونداي-اق، كەلەسى جىلى قاراعايلى، دارحان جانە نۇركەنت شاعىن اۋداندارىندا 3 بالاباقشا سالۋ جوسپارلانىپ وتىر. وسى جۇمىستاردىڭ ناتيجەسىندە مەكتەپكە دەيىنگى مەكەمەلەرگە 2 280 بالا قابىلدانادى. بۇل بالالاردىڭ ەرتە ءبىلىم الۋىنا قولجەتىمدىلىكتى ارتتىرىپ، مەگاپوليستەگى ءبىلىم بەرۋ ساپاسىن جاقسارتۋعا ايتارلىقتاي ىقپال ەتەدى.