وقۋشى ورنىنىڭ تاپشىلىعى ەلىمىزدىڭ بارلىق وڭىرىنە ءتان ماسەلە. وسى ورايدا الماتىدا وقۋشى ورنىنىڭ تاپشىلىعىن ازايتۋ ماقساتىندا ءبىلىم بەرۋ مەكەمەلەرىن جاڭعىرتۋعا باعىتتالعان «كەلەشەك مەكتەپتەرى» مەن «1300 مەكتەپتى وڭالتۋ» ۇلتتىق جوباسى قولعا الىنعان. شاھاردا 1 قىركۇيەكتە 12 جاڭا مەكتەپ اشىلعالى وتىر.
جالپى، الماتى قالاسى بويىنشا «كەلەشەك مەكتەپتەرى» جوباسى اياسىندا 34،8 مىڭ وقۋشىعا ارنالعان 21 مەكتەپ سالىنىپ جاتسا، 13 مەكتەپتىڭ قۇرىلىسى «Samruk-Kazyna Construction» كومپانياسىنىڭ قاتىسۋىمەن جۇزەگە اسىپ جاتىر.
وسىنداي مەكتەپتىڭ بىرەۋى بىلتىر العاش رەت پايدالانۋعا بەرىلسە، وسى وقۋ جىلىنىڭ العاشقى كۇنى تاعى 12 مەكتەپ پايدالانۋعا بەرىلەدى.
بۇعان قوسا، قوسىمشا تاعى 8 مەكتەپ جەكە ينۆەستورلاردىڭ قاتىسۋىمەن «ساتىپ الۋ» مەحانيزمى ارقىلى سالىنا باستادى. سونىڭ ىشىندە ەكى مەكتەپ بيىل قىركۇيەكتە ىسكە قوسىلىپ، تاعى ەكى مەكتەپ 2025 جىلعى جەلتوقساندا، قالعان تورتەۋى جىل سوڭىنا دەيىن اشىلماقشى.
ەسكە سالايىق، بۇعان دەيىن وقۋ-اعارتۋ ءمينيسترى عاني بەيسەمبايەۆ «كەلەشەك مەكتەپتەرىنىڭ» ماڭىزىن تۇسىندىرگەن ەدى.
«بۇل جوبا – ەلىمىزدە ورتا ءبىلىم ساپاسىن ارتتىرۋعا جانە قالا مەن اۋىل مەكتەپتەرى اراسىنداعى الشاقتىقتى جويۋعا باعىتتالعان ستراتەگيالىق باستاما. بۇل – ءجاي عانا مەكتەپ عيماراتتارى ەمەس، ۇلت بولاشاعى ءوسىپ شىعاتىن كيەلى ءبىلىم وردالارى. سوندىقتان ۇلتتىق جوبا اياسىندا قالىپتاساتىن ءبىلىم ۇيىمدارىن «كەلەشەك مەكتەپتەرى» دەپ اتاۋدى ۇسىنىپ وتىرمىز. باستاۋىش سىنىپتاردان باستاپ ءتۇرلى ماماندىق يەلەرىمەن كەزدەسۋلەر، جوبالىق اپتالار ۇيىمداستىرىلادى. 7-سىنىپتا وقۋشىلار ءۇشىن تەرەڭدەتىلگەن بەيىندىك وقىتۋ، تالىمگەرلىك جۇيەسى جانە جەكە ءبىلىم بەرۋ كۋرستارى ەنگىزىلەدى. بۇل ۇدەرىستى ءتيىمدى ۇيلەستىرۋ جانە باسقارۋ ماقساتىندا «مانساپ كومپاسى» ارنايى سيفرلىق پلاتفورماسى ازىرلەنۋدە. ول وقۋشىلارعا بولاشاق كاسىبي باعىتىن جانە ءارى قارايعى ءبىلىم الۋ جولىن سانالى تۇردە تاڭداۋعا كومەكتەسەدى. وسى ماقساتتا مۇعالىمدەرگە ارنالعان جاڭا پەداگوگيكالىق تاسىلدەر، زاماناۋي ادىستەمەلەر مەن سيفرلىق قۇرالداردى مەڭگەرۋگە باعىتتالعان باعدارلاما ازىرلەندى. بۇگىنگى كۇنى 3000-نان استام ءمۇعالىم بىلىكتىلىكتى ارتتىرۋ كۋرستارىنان ءوتتى. الداعى ۋاقىتتا باسىم باعىتتار بويىنشا بارلىق پەداگوگتار وقىتۋمەن قامتىلادى، بۇل ەلىمىزدە كاسىبي قۇزىرەتتىلىكتەردى دامىتۋدىڭ ءبىرىڭعاي ستاندارتىن قامتاماسىز ەتۋگە مۇمكىندىك بەرەدى»، - دەدى ول.
بالالار قاۋىپسىزدىگى
بۇل تۋرالى الماتى قالاسى ءبىلىم باسقارماسىنىڭ باسشىسى سايران سايفەدەنوۆ بريفينگ بارىسىندا ايتتى.
"قازىرگى تاڭدا الماتىداعى بارلىق ءبىلىم مەكەمەلەرى جاڭاشا دامىپ، ۇلكەن ىزدەنىس ۇستىندە. بۇگىنگى كۇنى قالاداعى بارلىق مەملەكەتتىك 216 مەكتەپ پەن 196 بالاباقشا كەشەندى قاۋىپسىزدىك جۇيەسىمەن جابدىقتالسا، مۇنداي جۇيەگە بەينەباقىلاۋ، دابىل تۇيمەلەرى، كىرىپ-شىعۋدى باقىلايتىن جۇيەلەر مەن ءورت دابىلى كىرەدى. ءبىلىم مەكەمەلەرىنىڭ باستى ماسەلەسى – بالالار ءومىرىنىڭ قاۋىپسىزدىگى. سوندىقتان وسى ماقسات ءۇشىن ءبىلىم بەرۋ مەكەمەلەرىنىڭ بارلىعىنا 21 106 سيفرلىق بەينەكامەرا ورناتىلدى. بۇل بەينەباقىلاۋلاردىڭ 12 450ء-ى مەكتەپتە، 8656-سى بالاباقشادا ورنالاستىرىلدى. سونداي-اق، نىساندارعا تۇگەلىمەن بىر-بىردەن 412 دابىل تۇيمەسى قويىلعان. مەكتەپكە كىرىپ-شىعۋدى باسقاراتىن، باقىلايتىن ءبىرىڭعاي جۇيە ەنگىزىلىپ، بالاباقشالارعا دوموفون ورناتىلعان. سونىمەن قاتار، ءار نىساندا ءورت دابىلى جۇيەسى جۇمىس ىستەيدى"، - دەيدى ول.