بۇگىندە وڭتۇستىك استانادا تۇراتىن 2،3 ملن حالىقتىڭ 80% نەمەسە 1،8 ملن ساقتاندىرىلعان. وكىنىشكە وراي، تاعى 475 مىڭ ادام ءمامس جۇيەسىنەن تىس قالىپ وتىر. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مەديسينالىق ساقتاندىرۋ قورى الماتى قالالىق فيليالى ديرەكتورىنىڭ ورىنباسارى نۇردوس قادىربەكوۆ مالىمدەدى.
ءمامس تۋرالى زاڭعا ەنگىزىلگەن وزگەرىستەرگە سايكەس، 2026 جىلدان باستاپ جەرگىلىكتى اتقارۋ ورگاندارى حالىقتىڭ الەۋمەتتىك جاعدايى تومەن بولىگى ءۇشىن ساقتاندىرۋ جارناسىن تولەي باستاماق. جاڭا نورمالار ارقاسىندا الماتىدا 95 مىڭعا جۋىق ادام ءمامس جۇيەسىندەگى مەديسينالىق كومەككە جۇگىنۋگە مۇمكىندىك الماق.
«اتالعان سانات ىشىنەن مەديسينالىق كومەكتى ءجيى قولداناتىن ازاماتتار ىرىكتەلىپ، جەرگىلىكتى بيۋدجەت ەسەبىنەن ساقتاندىرىلاتىن بولدى. 2026 جىلى 26 مىڭنان استام ادامنىڭ ءارقايسىسى ءۇشىن اي سايىن 9189 تەڭگەدەن، جالپى 2،9 ملرد تەڭگەدەن استام قاراجات جۇمسالماق. سونداي-اق، بۇدان بىلاي جۇمىسسىز رەتىندە رەسمي تىركەلگەندەر ءۇشىن دە ءمامس جارناسىن جەرگىلىكتى اتقارۋ ورگاندارى تولەيدى»، - دەپ اتاپ ءوتتى نۇردوس قادىربەكوۆ.
سونىمەن قاتار، ساقتاندىرۋ جۇيەسىنىڭ قارجىلىق تۇراقتىلىعىن قامتاماسىز ەتۋ ماقساتىندا 2026 جىلدان باستاپ جارنا تولەنەتىن جالاقى شەگى وزگەرمەك. ايتاپ ايتساق:
• جۇمىس بەرۋشىلەر ءۇشىن – 40 ەڭ تومەنگى جالاقى؛
• جۇمىسكەرلەر ءۇشىن – 20 ەڭ تومەنگى جالاقى.
«تاعى ءبىر ايتا كەتەرلىگى، بۇگىنگى كۇنى الماتى قالاسىندا 1،2 ملن استام، ەلىمىز بويىنشا 11،2 ملن جۋىق ادام مەملەكەت ەسەبىنەن ساقتاندىرىلىپ وتىر. بيىل مەملەكەت ولار ءۇشىن اي سايىن ورتاشا ايلىق جالاقىنىڭ 2% اۋدارادى. ال، 2027 جىلدان باستاپ جارنا مولشەرى بىرتىندەپ ءوسىپ، 2037 جىلى 4،7% دەيىن جەتۋى ءتيىس»، - دەدى نۇردوس قادىربەكوۆ.
ءمامس ارقىلى كورسەتىلەتىن مەديسينالىق كومەكتىڭ قولجەتىمدىلىگىن ارتتىرۋ ماقساتىندا زاڭعا تاعى ءبىر جاڭا نورما ەنگىزىلدى. ەندى كەمىندە 5 جىل قاتارىنان جۇيەگە جارنا اۋدارىپ كەلگەن ازاماتتار ۋاقىتشا تولەم قابىلەتىنەن ايىرىلعان جاعدايدا، ساقتاندىرۋ ستاتۋسى 6 ايعا دەيىن ساقتالماق. بۇعان دەيىن ساقتاندىرۋ ستاتۋسى سوڭعى تولەم جاسالعان ساتتەن باستاپ 3 اي عانا ساقتالاتىن. بۇل وزگەرىستىڭ اسىرەسە، جۇمىس كۇشى ءجيى اۋىساتىن الماتى قالاسى ءۇشىن ماڭىزى زور.
«سوڭعى جىلدار ىشىندە ءبىز ءبىرىنشى رەت ساقتاندىرۋ رەفورماسىن تەحنيكالىق ەمەس، الەۋمەتتىك تۇرعىدان قاراستىرىپ وتىرمىز. ەنگىزىلگەن وزگەرىستەر ارقاسىندا مەديسينا شىنىمەن قولجەتىمدى بولا باستاماق. حالىقتى ساقتاندىرۋ جۇيەسىمەن قامتۋ دەڭگەيى جاقسارىپ، مەديسينالىق كومەكتى پايدالانۋ مۇمكىندىگى ارتادى»، - دەپ اتاپ ءوتتى ساراپشى ۆياچەسلاۆ لوكشين.