قىلمىستىق توپ وزدەرىن باقىلاۋشى ورگانداردىڭ قىزمەتكەرى رەتىندە تانىستىرىپ، كاسىپكەرلەردەن اقشا بوپسالاعان.
الماتى قالالىق پروكۋراتۋرانىڭ موبيلدىك توبىنا «نۇر-سۇلتان پروم بەزوپاسنوست» ج ش س جۇمىسكەرلەرى وزدەرىن توتەنشە جاعداي ورگاندارىنىڭ قىزمەتكەرلەرى رەتىندە تانىستىرعان بىرەۋلەر ايىپپۇل سالۋ جانە تەكسەرۋ جۇرگىزۋمەن قورقىتا وتىرىپ، كاسىپكەرلەردى ورتكە قارسى قاۋىپسىزدىك قىزمەتتەرى ءۇشىن تولەم جۇرگىزۋگە ءماجبۇر ەتكەندىگى تۋرالى حابارلاما تۇسكەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇل رەتتە ەلىمىزدە شاعىن جانە ورتا بيزنەس سۋبەكتىلەرىن تەكسەرۋگە 2023 جىلعا دەيىن موراتوريي قولدانىلاتىنى بەلگىلى. الاياقتار سوزدەرىنىڭ راستىعى مەن دالەلى رەتىندە مازمۇنى جاعىنان مەملەكەتتىك ورگانداردىڭ كۋالىكتەرىنە ۇقساس قىزىل ءتۇستى قىزمەتتىك كۋالىكتەرىن كورسەتكەن. قاداعالاۋ ورگانى الاياقتىق فاكتىسى بويىنشا سوتقا دەيىنگى تەرگەپ-تەكسەرۋگە باستاماشىلىق ەتتى»،- دەلىنەدى پروكۋراتۋرا حابارلاماسىندا.
تەرگەۋ بارىسىندا الماتى قالاسىنىڭ ناۋرىزباي مەن اۋەزوۆ اۋداندارىندا 24 كاسىپكەر جابىرلەنۋشى بولعانى انىقتالدى. سونداي-اق، تەرگەۋدىڭ باستاپقى كەزەڭىندە قىلمىس جاسادى دەگەن كۇدىكپەن 1991 جانە 1995 جىلى تۋعان ەكى ادام ۇستالىپ، سوتتىڭ سانكسياسىمەن قاماۋعا الىندى. كەيىن 1995 جىلى تۋعان كومپانيا ديرەكتورى ورىنباسارىنىڭ دا قاتىسى بارى انىقتالدى. وعان قىلمىستىق كودەكستىڭ 190-بابى 3-بولىگىنىڭ 4-تارماعى نەگىزىندە، ياعني، ادامدار توبىندا بىرنەشە رەت جاسالعان الاياقتىق فاكتىسى بويىنشا ايىپ تاعىلدى. اتالعان قىلمىس ءۇشىن جازا مۇلكىن تاركىلەي وتىرىپ، 7 جىلعا دەيىنگى مەرزىمگە باس بوستاندىعىنان ايىرۋدى كوزدەيدى.
«الماتى قالاسى ناۋرىزباي اۋدانىنىڭ پروكۋراتۋراسى سوتقا دەيىنگى تەرگەپ-تەكسەرۋ ناتيجەلەرى بويىنشا قاراۋ ءۇشىن قىلمىستىق ءىستى سوتقا جولدادى. مۇنداي زاڭسىز ىس-ارەكەتتەر بيزنەسكە قىسىمدى تومەندەتۋ بويىنشا جۇرگىزىلىپ جاتقان مەملەكەتتىك شارالاردىڭ بەدەلىن ءتۇسىرىپ، ولارعا نۇقسان كەلتىرەدى. الماتى قالاسىنىڭ پروكۋراتۋراسى بيزنەس سۋبەكتىلەرىنە +7-701-775-55-00 نومەرىنە جۇگىنۋگە بولاتىن كاسىپكەرلەردىڭ قۇقىقتارىن قورعاۋ جونىندەگى ءموبيلدى توپتىڭ تۇراقتى جۇمىسى تۋرالى تاعى دا ەسكە سالادى»، - دەپ حابارلادى قالالىق پروكۋراتۋرادا.