6 جۇپتىڭ جەكپە-جەگى امەريكاندىق ESPN تەلەارناسىندا تىكەلەي ەفيردە كورسەتىلدى
الماتى قالاسىنىڭ «بالۋان شولاق» سپورت سارايىندا «MTK KAZAKHSTAN» مەنەدجەرلىك كومپانياسى ۇيىمداستىرعان حالىقارالىق تۋرنير – كاسىبي بوكس كەشى ءوتتى، دەپ حابارلايدى Almaty-akshamy.kz.
بوكس كەشىندە قازاقستاننان، الىس-جاقىن شەت ەلدەردەن كەلگەن بوكسەرلەردىڭ 16 جۇبى ب ا ق سىنادى. ولاردىڭ ىشىندە 6 جۇپتىڭ جەكپە-جەگى امەريكاندىق ESPN تەلەارناسىندا تىكەلەي ەفيردە كورسەتىلدى.
كەشتىڭ باستى وقيعاسى رەتىندە قازاقستاندىق بوكسشى قامشىبەك قوڭقابايەۆ (4-0، 3 كو) WBA GOLD نۇسقاسى بويىنشا اۋىر سالماقتاعى وزىنە تيەسىلى الەم چەمپيونى تيتۋلىن قورعاۋ ءۇشىن وڭتۇستىك افريكانىڭ بوكسشىسى دجونني ميۋللەرگە (23-9-2، 14 كو) قارسى شىعۋى ءتيىس ەدى. الايدا وقۋ-جاتتىعۋ بارىسىندا افريكالىق بىلعارى قولعاپ شەبەرىنىڭ جاراقات الۋىنا بايلانىستى قارسىلاس سوڭعى ساتتە وزگەرتىلدى.
ناتيجەسىندە ۇلتتىق قۇرامانىڭ بۇرىنعى كاپيتانى وزبەك فاررۋح دجۋرايەۆپەن (6-7-1، 2 كو) جۇدىرىقتاسىپ، ەكىنشى راۋندتا جەڭىسكە جەتتى. وتانداسىمىز بىرنەشە رەت ءدال سوققى جاساعان سوڭ تورەشى ايقاستى توقتاتۋعا ءماجبۇر بولدى.
قىزىلوردالىق بوكسشى جۋرناليستەرگە بەرگەن سۇحباتىندا كەز-كەلگەن قارسىلاسقا دايىن بولعانىن، ءار جەكپە-جەكتىڭ تاجىربيە ەكەنىن العا تارتتى.
«ەڭ الدىمەن جەڭىسكە جەتكەنىم ءۇشىن قۇدايعا شۇكىر دەيمىن! قانداي دا ءبىر جەكپە-جەك بولماسىن بارلىعىنا بىردەي جوعارى دايىندىقپەن كەلەمىن. نەگىزى باسقا قارسىلاسپەن شىعۋىم ءتيىس ەدى. الايدا قىسقا ۋاقىت ارالىعىندا ۇزدىكتەردىڭ قاتارىندا جۇرگەن بوكسشىلاردى تابۋ قيىن. ەڭ باستىسى جەڭىسكە جەتىپ، ماعان قولداۋ بىلدىرگەن جانكۇيەرلەردىڭ سەنىمىن اقتادىم. بۇيىرتسا بيىل 2-3 كەزدەسۋ وتكىزەمىن. بۇل تۋرالى مەنەدجەرلەرىممەن جانە باپكەرلەرىممەن اقىلداسامىز»، - دەدى قامشىبەك قوڭقابايەۆ.
ورىن العان وزگەرىستەرگە بايلانىستى كەلەسى كەزدەسۋ كورەرمەندەردىڭ باستى نازارىنا ىلىكتى. قازاقستاندىق جاس بوكسشى راي سەيىتجانوۆ (9-0، 6 كو) ءوزىنىڭ كاسىبي رينگتەگى ونىنشى جەكپە-جەگىندە 15 رەت جەڭىسكە جەتىپ، بىردە-بىر جەڭىلىسسىز كەلە جاتقان مەكسيكالىق حوسە ماسياس ەنريكەسكە قارسى سۋپەر جەڭىل سالماقتا (63،5-كگ) WBO Youth World تيتۋلى ءۇشىن كۇرەستى. جەكپە-جەك ون راۋندقا سوزىلىپ، قازاقستاندىق بوكسشىعا وڭاي بولماعانى ابدەن بايقالدى.
كورەرمەندەرگە بوكسشىلار تەڭبە-تەڭ جۇدىرىقتاسقانداي كورىنگەنىمەن، دودا 94-95، 95-94، 95-94 تورەشىلەردىڭ بولەك شەشىمىمەن قازاقستاندىقتىڭ جەڭىسىمەن اياقتالدى. تۇسىنىسپەۋشىلىكتىڭ ارا-جىگىن WBC كاسىپقوي بوكسىنىڭ تورەشىسى ەربول نۇرىشيەۆ اشقانداي بولدى.
«بۇگىنگى كەش ءوز دەڭگەيىندە ءوتتى، الايدا سوڭعى كەزدەسۋ قيىندىق تۋدىرعانى راس. مەكسيكالىق بوكسشىنىڭ دەڭگەيىن كورگەن شىعارسىزدار، وسال ەمەس. الدىڭعى راۋندتاردا ءبىزدىڭ جىگىت ەسەسىن جىبەرگەنىمەن، سوڭعى راۋندتاردا ۇپايلاردى ءوز قانجىعاسىنا بايلادى. شەشىمنىڭ ادىلەتتىلىگىنە كۇماندانعاندار دا بارشىلىق. مۇنداي جاعداي كاسىبي بوكستا ءجيى كەزدەسەدى. ءبىزدىڭ سپورتشى تاياق جەپ ۇتىلعان جوق، بىلاي قاراسىڭ تەڭبە-تەڭ جۇدىرىقتاستى دەسەك تە بولادى. الايدا جەڭىس قۇنى - بەلبەۋ بولعاندىقتان، ونى بىرەۋگە بەرۋ كەرەك بولدى»، - دەدى تورەشى.
نە دەگەنمەن، راي سەيىتجانوۆ پروفي-رينگتە ونىنشى جەكپە-جەكتە جەڭىسكە جەتىپ، WBO تۇجىرىمى بويىنشا ءبىرىنشى سالماق دارەجەسىندە جاستار اراسىندا الەم چەمپيونى اتاندى.
سونىمەن قاتار، قازاقستاندىق كاسىپقوي بوكسشى تالعات شايكين (7-0، 4 كو) جارتىلاي ورتا سالماقتا (66،7-كگ) سىنعا ءتۇسىپ، وزبەكستاندىق بوكسشى مۋحاممادساليم سوتۆولدييەۆتى (7-6-2، 3 كو) تورەشىلەردىڭ ءبىرىڭعاي شەشىمىمەن جەڭدى. 8-راۋندتىق جەكپە-جەكتە نۇردوس تولەباي (8-0، 6 كو) وزبەكستاندىق تاعى ءبىر وكىل بۋرگۋت حودجيبويەۆتى (8-3، 3 كو) ءتورتىنشى راۋندتا تەحنيكالىق نوكاۋدقا جىبەردى.
جالپى كەشتە جوعارىدا ايتىلعان بوكسشىلاردان بولەك ميحايل كوحانچيك، ارتەم پچەلياكوۆ، داستان سادۋ ۇلى، نۇربول سۇلتانباي، جارقىنبەك ءامىروۆ، ۆياچەسلاۆ الىمبايەۆ، قانات وزبەكبايەۆ، دارىن يماحانوۆ، قانات سانگيل، ادىلەت دامەشوۆ ب ا ق سىنادى.