2026 جىلى «بايقوڭىردان» «پروتون – م» زىمىران تاسىمالداعىشىن ۇشىرۋ توقتاتىلادى. بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر-مينيسترى ءاليحان سمايىلوۆتىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىنگى كۇنى زەرتتەۋ ناتيجەلەرى بويىنشا الىنعان دەرەكتەر زىمىرانعارىش قىزمەتىنىڭ تاسىمالداعىش زىمىرانداردان بولىنەتىن بولىكتەردىڭ قۇلاۋ اۋداندارىمەن شەكتەس اۋماقتاعى ەلدى مەكەندەر تۇرعىندارىنىڭ مەكەندەۋ ورتاسىنىڭ جاي-كۇيىنە جانە دەنساۋلىعىنا تىكەلەي اسەرىن راستاۋدىڭ جوق ەكەندىگىن كورسەتەدى. دەپۋتاتتىق ساۋالدا سيپاتتالعان پاتولوگياعا گەپتيل زىمىران وتىنىنىڭ قاتىسى جوق. ويتكەنى «پروتون-م» زت بولىنەتىن بولىكتەرىنىڭ پايدالانىلاتىن قۇلاۋ اۋداندارىندا ەلدى مەكەندەر جوق. «پروتون-م» زت-نىڭ قۇلاۋ اۋداندارى جەزقازعان قالاسىنان ەداۋىر قاشىقتىقتا (73،3 شاقىرىم) ورنالاسقان. بۇل - «پروتون» زت قۇلاۋ اۋدانىنا ەڭ جاقىن ەلدى مەكەن»، - دەدى ۇكىمەت باسشىسى جاۋابىندا.
پرەمەر-مينيستردىڭ دەرەگىنشە، 2014 جىلعى 24 قاراشاداعى «بايقوڭىر» كەشەنى بويىنشا قازاقستان-رەسەي ۇكىمەتارالىق كوميسسياسىنىڭ وتىرىسى اياسىندا قازاقستان رەسپۋبليكاسىنىڭ قورشاعان ورتاسىنا ەكولوگيالىق جۇكتەمەنى ازايتۋ ماقساتىندا 2017 جىلدان باستاپ زىمىران وتىنى-گەپتيلدى (سيممەتريالى ەمەس ديمەتيلگيدرازين، ندمگ) پايدالاناتىن «پروتون – م» زت ۇشىرىلىمدارىن (2017 جىلى 2-گە، 2020 جىلى تاعى 2-گە، 2025 جىلى 5-كە دەيىن جەتكىزۋ) قىسقارتۋ جانە ۇشىرىلىمداردى 2026 جىلى تولىق اياقتاۋ كوزدەلگەن.
«سونىمەن بىرگە، بايقوڭىر عارىش ايلاعى قىزمەتىنىڭ اسەرى تۇرعىسىنان قاراعاندى وبلىسىنىڭ جەزقازعان-ۇلىتاۋ وڭىرىندە ونكولوگيالىق اۋرۋلاردىڭ ءوسۋ سەبەپتەرىن زەردەلەۋ ماقساتىندا ەكولوگيا، گەولوگيا جانە تابيعي رەسۋرستار ءمينيسترىنىڭ 2022 جىلعى 4 ناۋرىزداعى № 69ء-و بۇيرىعىمەن مۇددەلى مەملەكەتتىك ورگاندارمەن جانە ءوڭىردىڭ جۇرتشىلىق وكىلدەرىمەن بىرلەسىپ ۆەدومستۆوارالىق كوميسسيا قۇرىلدى»، - دەدى ءاليحان سمايىلوۆ.