الماتىدا قالا اكىمى ەربولات دوسايەۆتىڭ تاپسىرماسى بويىنشا جۇمساق ءارى «قالقىمالى» كارىز ليۋكتەرى ورناتىلۋدا. قازىرگى ۋاقىتتا وسىنداي 943 ليۋك قويىلدى، دەپ حابارلايدى Almaty-akshamy.kz.
جۇمساق ليۋكتەردىڭ جوباسى اۋداندىق اكىمدىكتەر مەن كوممۋنالدىق قىزمەتتەردىڭ (545) كۇشىمەن جولداردى اعىمداعى جوندەۋ، سونداي-اق الماتى قالالىق موبيلدىلىك باسقارماسىنىڭ ماگيسترالدىق كوشەلەردى ورتاشا جوندەۋى (398) اياسىندا ىسكە اسىرىلدى.
ديزاين كارىز جەلىسىنىڭ اينالاسىنداعى اسفالت جابىندارىن ساقتاۋعا جانە اۆتوكولىك جۇرگىزۋشىلەرىنىڭ جايلى قوزعالۋىنا ارنالعان.
بۇل ليۋكتەردى قالالىق موبيلدىلىك باسقارماسى 2022 جىلى دوستىق، نازاربايەۆ، اباي داڭعىلدارى مەن قابانباي باتىر كوشەلەرىندە تاجىريبە رەتىندە ورناتىلدى. جول جوندەۋشىلەردىڭ باقىلاۋىنا سايكەس جۇمساق ليۋكتەر كولىك قۇرالدارىنىڭ قولدانىستاعى جۇكتەمەلەرىنە وڭ اسەر ەتىپ، وزدەرىنىڭ بەرىكتىگىن ساقتايتىندىعىن كورسەتتى. جول جابىنىنىڭ پايدالانۋ ساپاسىن جاقسارتۋ ءۇشىن مۇنداي ليۋكتەر كولىك قوزعالىسى كوپ كوشەلەردە (رايىمبەك، تولە بي، شالياپين، دۋلاتي، ناۆوي، قالداياقوۆ، شيەۆچەنكو، قۇرمانعازى، قابانباي باتىر، مايلين، بەكماحانوۆ، ءسۇيىنباي جانە ت.ب.) پايدالانىلدى.
جالپى، الماتىنىڭ جولدارى مەن تروتۋارلارىندا سۋ ارناسى، جىلۋ، گاز جانە تەلەفون جەلىلەرى سياقتى ءتۇرلى كاسىپورىندارعا تيەسىلى 40 مىڭنان استام كارىز ليۋكتەرى ورناتىلدى. دەگەنمەن، كارىز ليۋكتەرى ءجيى ۇرلانادى. وسى جىلدىڭ باسىنان بەرى 500-گە جۋىق ليۋك ۇرلانعان. سوندىقتان ءاربىر قالالىق كاسىپورىن ءوز قىزمەتىندەگى بارلىق ليۋكتەردى قاداعالايدى، ويتكەنى اشىق نەمەسە زاقىمدالعان ليۋكتەر تۇرعىندارعا ءقاۋىپ ءتوندىرۋى مۇمكىن.
ەسكە سالساق، 2023 جىلعى 22 ماۋسىمدا وكق بريفينگىندە مەگاپوليس باسشىسى قالانىڭ 6 شاعىن اۋدانىندا 25 كم جاڭا جول سالۋ جانە پوليمەرلىك قوسپالاردى پايدالانا وتىرىپ 200 كم ورتاشا جوندەۋ جۇرگىزۋ جوسپارلارى تۋرالى حابارلاعان ەدى. وسى جۇمىستار اياسىندا مەحانيكالىق جانە تەمپەراتۋرالىق جۇكتەمەلەرگە توتەپ بەرە الاتىن 8 مىڭ «قالقىمالى» ليۋكتەر ورناتىلادى. جاڭا تەحنولوگيالاردى پايدالانۋ جولداردى ورتاشا جوندەۋدى جۇرگىزۋ مەرزىمىن 5 جىلدان 10 جىلعا دەيىن ۇلعايتۋعا مۇمكىندىك بەرەدى.
جۇمساق ليۋك كارىز جەلىلەرىنىڭ تىرەك ساقينالارىنا بەكىتىلمەيدى، بۇل قونسترۋكسيا جۇكتەمەسىن 50%-عا تومەندەتەدى جانە تەمىربەتون ەلەمەنتتەرى جۇكتەمەلەرىن تۇراقتاندىرادى. سونىمەن قاتار، تەمپەراتۋرا وزگەرگەن كەزدە ليۋكتىڭ استىنداعى جول توسەمى بۇرىنعى قالپىن ساقتايدى. قالقىمالى كورپۋسى بار ليۋكتەر اسفالتپەن بىرگە قوزعالادى. بۇل جەلىنىڭ، جالپى ليۋكتىڭ دە قىزمەت ەتۋ مەرزىمىن ەداۋىر ارتتىرادى.
انىقتاما: قازىرگى ۋاقىتتا قالادا ۇزىندىعى 3 097 كم 2746 كوشە بار، ونىڭ ىشىندە 69 ماگيسترالدى كوشە، ۇزىندىعى 130 كم. قازىرگى ۋاقىتتا قالانىڭ كوشە-جول جەلىسىندە شامامەن 40 119 بىرلىك جانە 21 000 بىرلىك جاڭبىر قابىلداعىش بار.