63 جاستاعى ەر ادام قوعامدىق كولىكتە ۇيالى تەلەفون ۇرلاعان.
بۇعان دەيىن دە قوعامدىق كولىكتە وسىنداي ارەكەتى ءۇشىن سوتتى بولعان كۇدىكتىنى قالانىڭ مەدەۋ اۋدانىنىڭ جەدەل ۋاكىلدەرى ۇستادى، دەپ حابارلايدى Almaty-akshamy.kz.
Polisia.kzء-تىڭ اقپاراتىنا ساي، كۇدىكتى الماتى وبلىسىنىڭ تۇرعىنى قالانىڭ ءارتۇرلى اۋداندارىندا بوتەننىڭ مۇلكىن ۇرلاۋمەن اينالىسقانى بەلگىلى بولدى.
«1960 جىلى تۋعان ي.ەسىمدى ازامات سمارتفون ۇرلادى دەگەن كۇدىككە ىلىكتى. سوڭعى ەپيزودتا نازاربايەۆ داڭعىلى مەن رايىمبەك داڭعىلىنىڭ قيىلىسىندا 225-باعىتتاعى قوعامدىق كولىككە ءمىنىپ بارا جاتىپ، جولاۋشىنىڭ قالتاسىنان IPhone تەلەفونىن ۇرلاپ كەتكەن. تەرگەۋ ايعاقتىق نەگىزدە جۇمىس ىستەپ، كۇدىكتىنىڭ قالانىڭ باسقا اۋداندارىندا جاسالعان وسىعان ۇقساس قىلمىستارعا قاتىسى بار-جوعىن انىقتاۋدا. ەر ادام ۋاقىتشا ۇستاۋ يزولياتورىنا قامالدى. ونىڭ بۇعان دەيىن دە ۇرلىق پەن توناۋ جاساعانى ءۇشىن سوتتالعانى بەلگىلى. تەلەفون ايعاقتى زات رەتىندە تاركىلەنىپ، ق ر قك-نىڭ 188-بابى بويىنشا قىلمىستىق ءىس ماتەريالدارىنا قوسىلدى»، – دەپ حابارلادى مەدەۋ اۋداندىق پب-عا قاراستى پوليسيا ءبولىمىنىڭ باستىعى ءابدىنۇر تاسىبايەۆ.
ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى، 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.