الماتىدا كارانتين جەڭىلدەتىلەدى

قالانىڭ باس سانيتار دارىگەرى جانداربەك بەكشين 19 ماۋسىمنان باستاپ جاڭا قاۋلى كۇشىنە ەنەتىنىن ايتتى.

اتالعان قۇجاتقا سايكەس، بيزنەسكە ءبىرقاتار جەڭىلدىك بەرىلەدى، دەپ حابارلايدى Almaty-akshamy.kz

جانداربەك بەكشينىڭ ايتۋىنشا، الماتىداعى ەپيدەميولوگيالىق جاعداي تۇراقتانعان.

«الماتى 12 ماۋسىمنان باستاپ «جاسىل» ايماقتا تۇر. ايدىڭ باسىنان بەرى كوروناۆيرۋستىڭ تارالۋى 2 ەسە ازايدى. سوڭعى تاۋلىكتە كۆي-دىڭ 112 جاعدايى تىركەلدى، ال تاۋلىكتىك ءوسىم 0،1 پايىزعا تومەندەدى. الماتى قالاسىندا ەپيدەميا باستالعالى كوروناۆيرۋستىڭ 71 820 جاعدايى، ال وسى جىلدىڭ باسىندا 53 مىڭنان استام جاعداي تىركەلگەن. ال ءقازىر جاعداي وڭالعان، اۋرۋدىڭ تارالۋى ايتارلىقتاي باسەڭدەگەن. حالىقتىڭ 100 مىڭىنا شاققاندا اۋرۋ دەڭگەيىنىڭ تومەندەۋ ديناميكاسى تۇراقتى، سوڭعى 7 كۇندە 64،7-دەن 39،8-گە دەيىن ازايدى»، - دەدى ول.

سونىمەن قاتار، ول الماتى «جاسىل» ايماقتا جەتى كۇن تۇرسا، وندا كارانتين شارالارى جەڭىلدەتىلەتىنىن ءمالىم ەتتى.

«قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ 2021 جىلعى 25 ناۋرىزداعى №12 قاۋلىسىنا سايكەس، الماتى قالاسىنىڭ باس مەملەكەتتىك سانيتارلىق دارىگەرىنىڭ الەۋمەتتىك-ەكونوميكالىق وبەكتىلەردىڭ قىزمەتىن جەڭىلدەتۋ ءتارتىبى تۋرالى قاۋلى دايىندالدى. ماتريسانىڭ «جاسىل ايماققا» وتكەنىنەن كەيىن جەتى كۇننەن سوڭ، ياعني 19 ماۋسىمنان باستاپ جەڭىلدەيدى»، - دەدى جانداربەك بەكشين.

ەسكە سالا كەتسەك، 12 ماۋسىمنان باستاپ الماتى «جاسىل» ايماقتا تۇر.