الماتىدا جىلۋ بەرۋ ماۋسىمى قالاي وتۋدە؟

«الماتى جىلۋ جەلىلەرىنە» قالا تۇرعىندارىنىڭ قارىزى 1،3 ملرد تەڭگەگە جەتكەن

بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە «الماتى جىلۋ جەلىلەرى» ج ش س («التس» ج ش س) باس ينجەنەرى دانيار قازىمبەتوۆ ايتتى، دەپ حابارلايدى Almaty-akshamy.kz.
 
 ەسكە سالايىق، مەگاپوليستە جىلىتۋ ماۋسىمى 17 قازاندا باستالعان بولاتىن. كوممۋنالدىق مەكەمەلەر 8467 كوپقاباتتى تۇرعىن ءۇيدى، 216 مەكتەپتى، 197 بالاباقشانى، 129 اۋرۋحانانى تەكسەرىپ، جىلىتۋ ماۋسىمى باستالماس بۇرىن الدىن الا دايىندىق جۇمىستارىن جۇرگىزدى.

«ءقازىر جىلىتۋ ماۋسىمى قالىپتى جاعدايدا وتۋدە، تەمپەراتۋرالىق جانە گيدراۆليكالىق رەجيمدەر كەستەگە سايكەس ساقتالۋدا»، - دەدى د.قازىمبەتوۆ.

كوممۋنالدىق قىزمەت مالىمەتى بويىنشا، 2022-2023 جىلدارداعى جىلۋ بەرۋ كەزەڭىندە 1352،33 كم جىلۋ جەلىلەرى الدىن الا دايىندالدى. ونىڭ 60%-نىڭ توزىعى جەتكەن(811،5 كم) (25 جىلدان استام ۋاقىت پايدالانىلعان). بيىلعى جىلى 4،7 شاقىرىم جىلۋ جەلىلەرى قايتا جاڭعىرتىلدى. جىلۋ جەلىلەرىن رەكونسترۋكسيالاۋ ەسەبىنەن، ولاردىڭ توزۋىن  0،3%-عا دەيىن تومەندەتۋگە قول جەتتى. 2023 جىلى 17،2 شاقىرىم جىلۋ جەلىلەرىن رەكونسترۋكسيالاۋ جوسپارلانىپ وتىر. 

ايتا كەتۋ كەرەك، جىلىتۋ ماۋسىمى باستالعالى «التس» ج ش س جوعارى دايىندىق رەجيمىنە كوشتى. جوندەۋ جۇمىستارىنا تاۋلىك بويى جۇمىس ىستەيتىن 4 جەدەل بريگادا (98 ادام)، 12 جوندەۋ بريگاداسى (139 ادام) جۇمىلدىرىلعان. 64 بىرلىك ارنايى تەحنيكا وسى ىسكە تارتىلعان.

جۋرناليستەردىڭ سۇراقتارىنا جاۋاپ بەرگەن دانيار قازىمبەتوۆ الماتى تۇرعىندارىنىڭ «الماتى جىلۋ جەلىلەرىنە» شامامەن 1،3 ملرد تەڭگە قارىز ەكەنىن ايتتى. 
 
سونداي-اق بريفينگتە «الماتى ەلەكتر ستانسيالارى» اق («الەس» اق) باس ينجەنەرى عازيز يسمۇحامبەتوۆ ءسوز سويلەپ، جۇمىستا اۋىتقۋلارعا جول بەرمەيتىنىن، 30 كۇنگە جەتەتىن جىلۋ (وتىن) قورى (نورماتيۆ  بويىنشا  20 كۇن) بارىن ايتتى. گازعا قاتىستى دا ەشقانداي ماسەلە جوق.