«الماتى» الەۋمەتتىك-كاسىپكەرلىك كورپوراسياسى ەلەكتر زاريادتاۋ ستانسيالارىن (ەزس) ورناتۋ ءۇشىن 311 جەر تەلىمىن ءبولدى. ءاربىر ۋچاسكەدە كونكۋرستىق ىرىكتەۋدەن وتكەن وتاندىق ينۆەستورلار ەكى پاركومەستكە ەسەپتەلگەن قۋاتى 60 كۆت-تان باستالاتىن ءبىر ەزس ورنالاستىرادى. بارلىق ستانسيالار پايدالانۋعا بەرىلگەننەن كەيىن قالادا ەلەكتروموبيلدەردى زاريادتاۋعا ارنالعان 622 جاڭا پاركومەستر پايدا بولادى، دەپ حابارلايدى aqshamnews.kz
ءبىر ۋچاسكەگە ينۆەستوردىڭ ەڭ تومەنگى سالىمى 10 ملن تەڭگەنى قۇرايدى. بۇل رەتتە حالىق ءۇشىن اككۋمۋلياتورلىق باتارەيانى زاريادتاۋدىڭ 1 كۆت ءۇشىن شەكتى قۇنى ققس ەسەبىمەن 100 تەڭگەدەن اسپايدى.
ۋچاسكەلەر ۇزارتۋعا باسىم قۇقىعى بار ينۆەستورلارعا 4 جىل مەرزىمگە بەرىلدى.
زاريادتاۋ ستانسيالارىن ورناتۋ قالا تۇرعىندارىنىڭ جاپپاي تارتىلاتىن جەرلەرىندە-بازارلار، ساياباقتار، كافەلەر جانە باسقا دا قوعامدىق كەڭىستىكتەر اۋماعىندا جوسپارلانۋدا.
بارلىق ستانسيالار اعىمداعى جىلدىڭ سوڭىنا دەيىن پايدالانۋعا بەرىلەدى.
بۇگىنگى تاڭدا الماتىدا جەكە اۋماقتاردا 300-دەن استام ەزس ورناتىلعان. جاڭا نىسانداردى ەسكەرە وتىرىپ، قالا بويىنشا زاريادتاۋ ستانسيالارىنىڭ جالپى سانى 600 بىرلىكتەن اسادى.
ەزس قۇرىلىسى «2029 جىلعا قاراي بارلىق ءىرى قالالاردا ەلەكتروموبيلدەر ءۇشىن قاجەتتى ينفراقۇرىلىمدى قۇرۋ جونىندەگى جول كارتاسى» شەڭبەرىندە جۇزەگە اسىرىلادى. جوبا الماتىداعى ەكولوگيالىق جاعدايدى جاقسارتۋ قاجەتتىلىگىنە بايلانىستى، سونداي-اق مەگاپوليستەگى ەلەكتر كولىكتەرىنىڭ ءوسىپ كەلە جاتقان سانىن ەسكەرە وتىرىپ ىسكە اسىرىلۋدا.
ۇلتتىق ستاتيستيكا بيۋروسىنىڭ دەرەكتەرىنە سايكەس، 2025 جىلدىڭ 1 ساۋىرىندە الماتىدا 8 385 ەلەكتروموبيل تىركەلگەن. وتكەن جىلدىڭ سايكەس كەزەڭىمەن سالىستىرعاندا ولاردىڭ سانى 1،5 ەسە ءوستى.