الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا 2024 جىلى قالانىڭ ۆولونتەرلىك قىزمەتىن قورىتىندىلاۋعا ارنالعان بريفينگ ءوتتى.
بيىل الماتى ۆولونتەرلەرى مۇقتاجدارعا كومەك كورسەتۋدەن باستاپ قورشاعان ورتانى قورعاۋعا دەيىنگى الەۋمەتتىك باستامالاردىڭ كەڭ اۋقىمىن قامتيتىن 800-دەن استام ءىس-شارا وتكىزدى، دەپ حابارلايدى aqshamnews.kz.
جىل ىشىندە ۆولونتەرلىك ءىس-شارالارعا بارلىعى 200 مىڭنان استام قالا جاستارى قاتىستى.
الماتى قالاسى جاستار ساياساتى باسقارماسىنىڭ باسشىسى ازيز كاجدەنبەك الماتىنىڭ ەرىكتىلەرى ءتۇرلى ماسەلەلەردى شەشۋگە بەلسەنە ارالاساتىنىن اتاپ ءوتتى.
«بۇگىندە الماتىدا جالپى ەرىكتىلەر سانى 50 مىڭنان اساتىن ەرىكتىلەردىڭ 30-دان استام ءىرى ۇيىمدارى بار. ەرىكتىلەر مۇلدەم باسقا ءىس-شارالار وتكىزەدى. ءبىرى اتا-انا قامقورلىعىنسىز قالعان بالالاردى وقىتسا، كەيبىرى جالعىزباستى زەينەتكەرلەرگە ارنالعان پانسيوناتتاردا شىعارماشىلىق كەشتەر ۇيىمداستىرادى، ال ەندى بىرەۋلەرى جانۋارلارعا نەمەسە قورشاعان ورتاعا كومەكتەسەدى»، - دەدى سپيكەر بريفينگتە.
مىسالى، اتا-اناسىنىڭ قامقورلىعىنسىز قالعان بالالارعا ارنالعان ءبىلىم بەرۋ جوبالارى ۇيىمداستىرىلدى. جىل باسىنان بەرى ماركەتينگ، قارجىلىق ساۋاتتىلىق، موبيلوگرافيا، ارت-جۋرناليستيكا سياقتى باعىتتار بويىنشا ساباقتار ۇيىمداستىرىلدى. بۇدان باسقا، ەرىكتىلەر قارت ادامدارعا ارنالعان شىعارماشىلىق كەشتەر، بۇرالقى جانۋارلارمەن جۇمىس جانە ت.ب. وتكىزەدى. سونداي-اق، ەرىكتىلەر كۇشىمەن 10 مىڭنان استام ادامدى قامتىعان اشىق اسپان استىنداعى وتاندىق فيلمدەردىڭ 40-تان استام كورسەتىلىمى ۇيىمداستىرىلدى.
سونىمەن قاتار، قالانىڭ بارلىق اۋداندارىندا «تىلدەر ساياباعى» جۇمىسىن باستادى، ونىڭ نەگىزىندە قالا تۇرعىندارى مەملەكەتتىك جانە شەت تىلدەرىن تەگىن وقىدى. كۇننىڭ سۋىتقانىنا قاراماي، قالانىڭ كوممۋنالدىق ورتالىقتارى بازاسىندا تەگىن ءتىل ۇيرەتۋ ۇيىرمەلەرى جۇمىستارىن جالعاستىرۋدا.
جۇمىستىڭ ماڭىزدى باعىتى گۋمانيتارلىق كومەك بولدى. اعىمداعى جىلى ەرىكتىلەر سۋ تاسقىنىنان زارداپ شەككەن ايماقتارعا 592 توننا كومەك جيناپ، جونەلتتى. جۇمىستى ۇيىمداستىرۋعا 30-دان استام ەرىكتىلەر ۇيىمى، 200-دەن استام ەرىكتىلەر جانە اسكەري-ينجەنەرلىك ينستيتۋتتىڭ 100-دەن استام كۋرسانتى قاتىستى.
ەرىكتىلەردى وقىتۋعا دا جەكە نازار اۋدارىلاتىنى بەلگىلى بولدى.
«قالانىڭ ۆولونتەرلەرى مەن ۆولونتەرلىك ۇيىمدارىنا جان-جاقتى قولداۋ كورسەتۋ ءۇشىن جاستار ساياساتى باسقارماسىنىڭ قولداۋىمەن الماتى قالاسى ۆولونتەرلەرىنىڭ وڭىرلىك فرونت-كەڭسەسى جۇمىس ىستەيدى. بيىل فرونت-كەڭسە بازاسىندا ءتۇرلى باعىتتار بويىنشا 700-دەن استام ترەنينگتەر مەن ماستەر-كلاسستار وتكىزىلدى. جىل سوڭىنا دەيىن تاعى 500 ەرىكتىنى وقىتۋ جوسپارلانۋدا»، - دەپ ءبولىستى ا.كاجدەنبەك.
حالىقارالىق ەرىكتىلەر كۇنىن مەرەكەلەۋ اياسىندا باسقارما 4-8 جەلتوقسان ارالىعىندا الماتى قالاسىنىڭ ۆولونتەرلەرى اراسىندا «يگى ىستەر مارافونىن» وتكىزۋدى جوسپارلاپ وتىر.
«مارافوننىڭ نەگىزگى ماقساتى - قالا تۇرعىندارى اراسىندا ۆولونتەرلىك قىزمەتتى ناسيحاتتاۋ، جاستاردىڭ الەۋمەتتىك جاۋاپكەرشىلىگىن ارتتىرۋعا جاردەمدەسۋ جانە قالانىڭ دامۋىنا ۇلەس قوساتىن بەلسەندى ۆولونتەرلەردى كوتەرمەلەۋ»، — دەدى وكق سپيكەرى.
بارلىعى 10 مىڭنان استام ادامدى قامتيتىن 20 ۆولونتەرلىك ءىس-شارا وتكىزۋ جوسپارلانۋدا.