مارافوننىڭ باستالۋى حالىقارالىق ەرىكتىلەر كۇنىنە ورايلاستىرىلعان.
4-8 جەلتوقسان ارالىعىندا قالادا 10 مىڭنان استام تۇرعىندى قامتيتىن 20 ءىس-شارا وتكىزىلەدى، دەپ حابارلايدى aqshamnews.kz.
بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا الماتى قالاسى ەرىكتىلەر فرونت-كەڭسەسىنىڭ باسشىسى باعدات اناربايەۆا حابارلادى.
ۇيىمداستىرۋشىلاردىڭ ايتۋىنشا، مارافوننىڭ باستى ماقساتى - ەرىكتىلىكتى ناسيحاتتاۋ، بەلسەندىلەردى قولداۋ جانە قالا تۇرعىندارى اراسىندا الەۋمەتتىك جاۋاپكەرشىلىكتى دامىتۋ.
سونىمەن قاتار، باعدات اناربايەۆا 1985 جىلى بۇۇ باس اسسامبلەياسى 5 جەلتوقساندى حالىقارالىق ەرىكتىلەر كۇنى دەپ جاريالاعانىن ەسكە سالدى، سودان بەرى ونى بۇكىل الەم بويىنشا ەرىكتىلەر اتاپ وتەدى.
«الماتى قالاسى، قازاقستاننىڭ ەڭ ءىرى مەگاپوليسى، ەلدىڭ ەكونوميكالىق جانە مادەني ءومىرىنىڭ جۇرەگى عانا ەمەس، سونىمەن قاتار قۋاتتى ەرىكتىلەر قوزعالىسىنىڭ ورتالىعى. مۇندا الەمدى جاقسى جاققا وزگەرتۋگە ۇمتىلعان مىڭداعان ادامداردىڭ كۇش-جىگەرى بىرىكتىرىلگەن. مەگاپوليستىڭ باي جانە سەرپىندى ەرىكتىلەر قاۋىمداستىعى از قامتىلعان وتباسىلارعا كومەكتەسۋدەن باستاپ قورشاعان ورتانى قورعاۋعا دەيىنگى ءتۇرلى سالالاردى قامتيدى»، - دەپ اتاپ ءوتتى ول.
وكق سپيكەرى الماتىنىڭ ۆولونتەرلەرى جىل سايىن قولداۋعا مۇقتاج جاندارعا كومەكتەسۋگە نيەت بىلدىرەتىنىن اتاپ ءوتتى. بۇگىنگى تاڭدا الماتىدا جالپى ەرىكتىلەر سانى 50 000-نان اساتىن 30-دان استام ءىرى ۆولونتەرلىك ۇيىمدار بار.
«مارافوننىڭ ءاربىر جوباسى — يگى ءىس جاساۋدا باستارى بىرىككەن جانداردىڭ ءبىزدىڭ قوعامىمىزدىڭ دامۋىنا قوسقان ۇلەسى جانە ۇلگىسى»، — دەپ اتاپ ءوتتى سپيكەر.
مارافوننىڭ نەگىزگى ءىس-شارالارىنىڭ قاتارىندا: بالالار ءۇيىنىڭ تاربيەلەنۋشىلەرىن قولداۋ بويىنشا اكسيالار، ەكولوگيالىق شەبەرلىك سىنىپتارىن وتكىزۋ، جانۋارلارعا ارنالعان باسپانالارعا كومەك كورسەتۋ جانە جالعىزباستى زەينەتكەرلەرگە ارنالعان شىعارماشىلىق كەشتەر ۇيىمداستىرۋ بار. سونداي-اق، قالانى اباتتاندىرۋ چەللەندجدەرى مەن ەرىكتىلەر اراسىندا دونورلىق اكسيا جوسپارلانعان.
مارافون ەڭ بەلسەندى قاتىسۋشىلار مەن ەرىكتىلەر ۇيىمدارىن ماراپاتتاۋ راسىمىمەن اياقتالادى.