الماتىدا جاستار اراسىنداعى جۇمىسسىزدىق دەڭگەيى تومەندەپ كەلەدى، دەپ حابارلايدى Aqshamnews.kz
بۇگىندە الماتىدا 14 پەن 35 جاس ارالىعىنداعى 695،6 مىڭنان استام جاس تۇرادى. بۇل مەگاپوليس حالقىنىڭ 32%-ى. ونىڭ ىشىندە 442،3 مىڭى – جۇمىس ىستەيتىن جاستار، 287،4 مىڭى – جوعارى وقۋ ورىندارى مەن كوللەدج ستۋدەنتتەرى، ال 80 مىڭعا جۋىعى – مەكتەپتىڭ جوعارى سىنىپ وقۋشىلارى.
الماتى قالاسىنىڭ جاستار ساياساتى باسقارماسى جاستار اراسىنداعى جۇمىسسىزدىقتى ازايتۋ، ۋاقىتشا جانە تۇراقتى جۇمىسقا ورنالاستىرۋ، تاجىريبەدەن وتكىزۋ، كاسىپتىك وقىتۋ جانە مانساپتىق باعىت-باعدار بەرۋ ماقساتىندا ءبىرقاتار جوبانى جۇزەگە اسىرۋدا.
بۇل باعىتتاعى نەگىزگى قۇرالداردىڭ ءبىرى – Jasalmaty.kz اقپاراتتىق پورتالى. وندا «Jobfair365» جۇمىسقا ورنالاستىرۋ سەرۆيسى جانە «SkillBridge» ونلاين وقىتۋ مەن بىلىكتىلىكتى ارتتىرۋ پلاتفورماسى جۇمىس ىستەيدى. مىسالى، بۇل پلاتفورماعا 25 مىڭنان استام بىرەگەي قولدانۋشى تىركەلگەن، 5 مىڭنان استام جۇمىس بەرۋشى 7 مىڭنان استام بوس جۇمىس ورنىن جاريالاعان. سونىڭ ارقاسىندا جىل باسىنان بەرى 3،5 مىڭ جاس تۇراقتى جۇمىس تاپقان.
سونىمەن قاتار، جاستاردى جۇمىسقا ورنالاستىرۋدا كەشەندى جۇمىس جۇرگىزىپ جاتقان جوبالاردىڭ ءبىرى – قالالىق مانساپ ورتالىعى. بۇعان دەيىن ءاربىر وقۋ ورنىندا جەكە مانساپ ورتالىقتارى بولسا، قازىرگى تاڭدا بۇل جۇيە جۇمىس بەرۋشىلەرمەن، ەڭبەك ۇتقىرلىعى ورتالىقتارىمەن جانە باسقا قۇرىلىمدارمەن بىرىكتىرىلگەن ورتاق پلاتفورمادا جۇمىس ىستەيدى.
2025 جىلدىڭ باسىنان بەرى قالالىق مانساپ ورتالىعىنا 7،5 مىڭ جاس جۇگىنگەن، ونىڭ 5،7 مىڭى جۇمىسقا ورنالاستىرىلدى.
«بىرنەشە اي تۇراقتى جۇمىس تابا الماي، قايدا بارارىمدى بىلمەي جۇرگەندە وسى ورتالىققا تاپ بولدىم. مۇنداعى ماماندار ماعان باعىتىمدى انىقتاپ، تۇيىندەمەمدى دۇرىس جاساۋعا كومەكتەستى. سونىڭ ارقاسىندا ماماندىعىم بويىنشا جۇمىسقا ورنالاستىم. ءقازىر وقۋ مەن جۇمىستى قاتار الىپ ءجۇرمىن»، – دەيدى الديار نۇرىموۆ.
وسىلايشا، 2025 جىلدىڭ باسىنان بەرى الماتىدا 9،2 مىڭنان استام جاس تۇراقتى جۇمىسقا ورنالاسقان. ايتا كەتۋ كەرەك، قالالىق مانساپ ورتالىعىنىڭ قىزمەتىن قالاداعى كەز كەلگەن كوميۋنيتي-ورتالىقتا پايدالانۋعا بولادى.