2025 جىلعى 20 مامىردا بەيجىڭ قالاسىندا قازاقستان دەلەگاسياسىنىڭ قىتايعا رەسمي جۇمىس ساپارى ءوتتى. ساپار اياسىندا الماتى وبلىسىنىڭ اكىمدىگى، «ازاماتتىق اۆياسيا اكادەمياسى» اق جانە قىتايدىڭ Banruo Silu Aviation Co.، Ltd. جانە Hainan Kunying Aviation Co.، Ltd. كومپانيالارى اراسىندا ستراتەگيالىق ىنتىماقتاستىق تۋرالى مەموراندۋمعا قول قويىلدى.
بۇل قۇجات ۇزاق مەرزىمدى ارىپتەستىك ورناتۋعا جانە وڭىرلىك حالىقارالىق اۆياسيالىق حاب قۇرۋ مەن دامىتۋ بويىنشا اۋقىمدى جوبانى ىسكە اسىرۋ ءۇشىن قاجەتتى ءىس-شارالاردى ايقىنداۋعا باعىتتالعان. جوبا لوگيستيكا، اۆياسيالىق مامانداردى دايارلاۋ، كوممەرسيالىق جانە اۆياسيالىق ينفراقۇرىلىم باعىتتارىن قامتيدى.
مەموراندۋم اياسىندا ازاماتتىق اۆياسيا اكادەمياسى كادرلاردى دايارلاۋ جانە يننوۆاسيالىق ءبىلىم بەرۋ شەشىمدەرىن ەنگىزۋ بويىنشا بەيىندى سالالىق ارىپتەس رەتىندە بەلگىلەندى. جوبانى جۇزەگە اسىرۋ الماتى وبلىسى، ۇيعىر اۋدانى، باحار اۋىلىندا ورنالاسقان اكادەمياعا تيەسىلى جەر ۋچاسكەسىندە جۇرگىزىلەدى.
ازاماتتىق اۆياسيا اكادەمياسىنىڭ قىتايلىق ارىپتەستەرىمەن ىنتىماقتاستىعى تۇراقتى دامۋ ۇستىندە. 2024 جىلدىڭ قىركۇيەك ايىنان باستاپ اكادەميا قىتايدىڭ تيانسزين قالاسىنىڭ مۋنيسيپاليتەتىمەن «ءبىر بەلدەۋ — ءبىر جول» حالىقارالىق جوبا اياسىندا جۇمىس ىستەپ كەلەدى. قىتايدىڭ ازاماتتىق اۆياسيا ۋنيۆەرسيتەتىمەن بىرلەسىپ، اۋەجايلاردىڭ سيفرلىق ەگىزدەرىنىڭ قىتاي-قازاق زەرتتەۋ ورتالىعىن قۇرۋ جوباسى جۇزەگە اسىرىلۋدا. بۇل جوبا اۆياسيالىق ينفراقۇرىلىمدى باسقارۋ جانە قىزمەت كورسەتۋ بويىنشا زياتكەرلىك جۇيەلەردى دامىتۋعا، سونداي-اق ازاماتتىق اۆياسيانى سيفرلىق تۇرلەندىرۋ ۇدەرىستەرىن قولداۋعا باعىتتالعان.
ىنتىماقتاستىق اياسىندا تاراپتار ازاماتتىق اۆياسيا سالاسىنداعى يننوۆاسيالار جونىندەگى بىرلەسكەن ورتالىق قۇرۋ مۇمكىندىگىن قاراستىرۋدا.