الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى شاھارداعى قىزىلشا دەرتىنىڭ تاراۋى جانە وعان قارسى ۆاكسيناسيالاۋ جۇمىستارى جايلى دەرەكتەرمەن ءبولىستى.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى مالىمەتىنە سايكەس، 2024 جىلدىڭ باسىنان باستاپ 02 مامىردى قوسا العاندا قىزىلشانىڭ 3014 راستالعان جاعدايى تىركەلگەن، دەپ حابارلايدى اlmaty-akshamy.kz.
ونىڭ ىشىندە: 14 جاسقا دەيىنگى بالالار اراسىندا – 1828 جاعداي (60،7%)، 15 جاستان 18 جاسقا دەيىنگى جاسوسپىرىمدەر اراسىندا – 133 (4،4%) جانە ەرەسەكتەر اراسىندا – 1053 (34،9%). دەپارتامەنت بالالار اراسىندا بۇل دەرت تاراۋىنىڭ باستى سەبەبى رەتىندە ۆاكسيناسيادان باس تارتۋ ەكەنىن حابارلايدى.
«قىزىلشانى جۇقتىرۋدى، سونداي-اق ونىڭ اسقىنۋىن بولدىرمايتىن جالعىز ءتيىمدى قۇرال – ۆاكسيناسيا. قىزىلشاعا قارسى جوسپارلى ۆاكسيناسيا 2 رەت، ءبىرىنشىسى – 1 جاستا (12-15 اي)، ەكىنشىسى – 6 جاستا جۇرگىزىلەدى، بۇل ۆاكسيناسيادان كەيىنگى يممۋنيتەتتى دامىتۋعا مۇمكىندىك بەرەدى. 2023 جىلعى 10 قاراشا مەن 2024 جىلعى 02 مامىردىڭ ارالىعىندا قالادا قىزىلشا، قىزامىق، پاروتيتكە قارسى قوسىمشا جاپپاي يممۋنداۋ شەڭبەرىندە بارلىعى 161 620 ادام قامتىلدى. ەكپەلەردى جۇرگىزۋ ءۇشىن ددۇ سەرتيفيكاتتاعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، پاروتيتكە قارسى ارالاس ۆاكسينا قولدانىلادى. ۆاكسيناسيا تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى»، – دەپ حابارلايدى سانيتاريالىق-ەپيدەميولوگيالىق باقىلاۋ دەپارتامەنتىنەن.
سونداي-اق دەپارتامەنت تاراپىنان اۋرۋدىڭ بەلگىلەرى پايدا بولعان كەزدە كەلەسى قاعيدالاردى قاتاڭ تۇردە ۇستانۋ ۇسىنىلادى:
- ءوزىن-وزى ەمدەۋمەن اينالىسپاۋ، دارىگەردى ۇيگە شاقىرىپ جانە دارىگەردىڭ نۇسقاۋى بويىنشا ەم الۋ؛
- ۇيدە بولۋ، جۇمىس جانە وقۋ ورىندارىنا، سونداي-اق قوعامدىق جانە مادەني-بۇقارالىق ءىس-شارالار ورىندارىنا بارماۋ. اسىرەسە، امبۋلاتوريالىق ەمدەلىپ جاتقان ناۋقاستار ۇيدە وقشاۋلاۋدى قاتاڭ ساقتاۋى كەرەك؛
- اۋىرعان بالالاردى ۇيىمداسقان ۇجىمدارعا، مەكتەپتەرگە، مدبۇ-عا، ت.ب جىبەرمەۋ.