الماتى قالاسىندا 2025 جىلدىڭ باسىنان بەرى 20،2 مىڭنان استام ادامدى جۇمىسپەن قامتۋعا باعىتتالعان بەلسەندى ءىس-شارالارعا تارتىلدى. بۇل تۋرالى الماتى قالاسىنىڭ حالىقتى جۇمىسپەن قامتۋ ورتالىعىنىڭ ديرەكتورى ادىلەت جانابايەۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا حابارلادى.
ورتالىقتىڭ مالىمەتىنشە، ولاردىڭ ىشىندە 14،9 مىڭ الماتىلىق تۇراقتى جانە سۋبسيديالاناتىن جۇمىس ورىندارىنا ورنالاستىرىلعان. جىل سوڭىنا دەيىن قالادا كەمىندە 87،2 مىڭ جاڭا جۇمىس ورنىن اشۋ جوسپارلانىپ وتىر.
«2024–2029 جىلدارعا ارنالعان ەڭبەك نارىعىن دامىتۋ تۇجىرىمداماسى اياسىندا بيىل الماتىدا 8،3 مىڭ جاڭا جۇمىس ورنى اشىلدى. ونىڭ 98،2 پايىزى – تۇراقتى جۇمىس. جالپى جوسپار بويىنشا 2025 جىلى 87،2 مىڭ جۇمىس ورنى قۇرىلۋى ءتيىس، ونىڭ 73،3 مىڭى – تۇراقتى جۇمىس»، – دەدى ادىلەت جانابايەۆ.
سونىمەن قاتار، 1،7 مىڭنان استام جاس كاسىپكەر «باستاۋ بيزنەس» جوباسى اياسىندا قولداۋ الدى. 3 مىڭنان استام ازامات كاسىبي وقۋدان ءوتتى. ولاردىڭ 2 831ء-ى – ونلاين (skills.enbek پلاتفورماسى ارقىلى)، ال 167ء-سى – وفلاين فورماتتا ءبىلىم العان. بۇدان بولەك، 17،5 مىڭعا جۋىق مەكتەپ وقۋشىسى، ستۋدەنت جانە جۇمىسسىز ازاماتقا كاسىبي باعدار بەرىلدى.
قىسقامەرزىمدى كاسىبي وقىتۋ مەن جاستار تاجىريبەسى باعدارلامالارى دا تابىستى ىسكە اسۋدا.
«باعدارلاما شەڭبەرىندە مەملەكەت وقىپ جاتقان ازاماتتارعا اي سايىن 43 574 تەڭگە كولەمىندە ستيپەنديا نەمەسە 20 اەك مولشەرىندە ەڭبەكاقى تولەيدى. سونىمەن قاتار، وقۋ ورتالىقتارىنا نەمەسە جۇمىس بەرۋشىلەرگە وقىتۋ قىزمەتى ءۇشىن مەملەكەت اي سايىن 70 مىڭ تەڭگە تولەيدى. وقۋدى اياقتاعان ازاماتتاردى جۇمىس بەرۋشى كەمىندە 6 ايعا جۇمىسقا الۋى ءتيىس»، – دەپ ءتۇسىندىردى سپيكەر.
2025 جىلعى 16 ماۋسىمداعى جاعداي بويىنشا وقۋعا 167 ادام جولدانعان. ولاردىڭ 70ء-ى وقۋدى اياقتاپ، 47ء-سى جۇمىسقا ورنالاسقان. قازىرگى ۋاقىتتا 31 ماماندىق بويىنشا 763 بوس جۇمىس ورنى بار. ولاردىڭ قاتارىندا تىگىنشى، شاشتاراز، اۆتوەلەكتريك، كونديتەر، ساتۋشى جانە باسقا دا كاسىپتەر بار.
جاستار تاجىريبەسى باعدارلاماسى – جۇمىس تاجىريبەسى جوق جاس ماماندارعا ماماندىعى بويىنشا العاشقى اقىلى جۇمىسقا ورنالاسۋعا مۇمكىندىك بەرەدى. بيىل بۇل باعدارلاما ارقىلى 236 ادام جۇمىسقا ورنالاسقان. ەلەكتروندىق ەڭبەك بيرجاسىنا 1 218 حابارلاندىرۋ ارقىلى 1 554 بوس جۇمىس ورنى تىركەلگەن.
جۇزەگە اسىرىلىپ جاتقان ءىس-شارالار ناتيجەسىندە الماتى قالاسىندا جۇمىسسىزدىق دەڭگەيى 4،6%-دان 4،5%-عا دەيىن تومەندەگەن.
سونىمەن قاتار، جۇمىسسىز ازاماتتار كاسىبي داعدىسىن تەگىن راستاۋ مۇمكىندىگىنە يە بولدى. وسى ماقساتتا ۆاۋچەرلىك جۇيە ەنگىزىلدى.
«ءبىر رەتتىك ۆاۋچەر ازاماتقا ءوزىنىڭ كاسىبي بىلىكتىلىگىن راستاپ، جۇمىس تاجىريبەسى مەن داعدىسىن دالەلدەۋگە مۇمكىندىك بەرەدى. بۇل ءوز كەزەگىندە جۇمىسقا ورنالاسۋدى جەڭىلدەتەدى. ۆاۋچەرلەر كاسىبي بىلىكتىلىكتى تانۋ ورتالىقتارى ارقىلى بەرىلەدى جانە جۇمىسسىزدار ءۇشىن بۇل قىزمەت تەگىن»، – دەپ اتاپ ءوتتى ادىلەت جاڭابايەۆ.
ۆاۋچەر الۋ ءۇشىن ازاماتتىڭ «جۇمىسسىز» مارتەبەسى بولۋى، Career Enbek پلاتفورماسىنا تىركەلىپ، جەكە كابينەت ارقىلى ونلاين ءوتىنىش بەرۋى قاجەت. بىلىكتىلىكتى تانۋ مىنا سالالار بويىنشا جۇرگىزىلەدى:
• تۋريزم؛
• قوناق ءۇي بيزنەسى؛
• اقپاراتتىق تەحنولوگيالار؛
• الەۋمەتتىك قىزمەت كورسەتۋ.
2024 جىلى الماتىدا ەڭبەك قىزمەتىن جالعاستىرعىسى كەلەتىن بەلسەندى زەينەتكەرلەرگە قولداۋ كورسەتۋ ماقساتىندا «التىن جاس» جوباسى ىسكە قوسىلدى. وسى باعدارلامامەن 2024 جىلى 704 زەينەتكەر، بيىل – 350 زەينەتكەر، جالپى سانى 1 054 زەينەتكەر جۇمىسقا ورنالاسقان. 2024–2026 جىلدارعا ارنالعان جالپى جوسپار 1 500 ادامدى قامتىعان.
«باستى ماقسات - ەڭبەككە قابىلەتتى بارلىق ازامات ءۇشىن جۇمىسپەن قامتۋدىڭ ءتيىمدى تەتىكتەرىن جاساۋ جانە مەملەكەتتىك قولداۋدى تولىق ىسكە اسىرۋ»، – دەدى ادىلەت جاڭابايەۆ.