2025 جىل جۇمىسشى ماماندىقتارى جىلىنىڭ اياسىندا قازاقستان رەسپۋبليكاسى وقۋ-اعارتۋ مينيسترلىگىنىڭ، قازاقستان رەسپۋبليكاسى تۋريزم جانە سپورت مينيسترلىگىنىڭ، الماتى قالاسى ءبىلىم باسقارماسىنىڭ قولداۋىمەن حالىقارالىق قازاق-قىتاي ءتىل كوللەدجىنىڭ ۇيىمداستىرۋىمەن كوللەدج ستۋدەنتتەرى اراسىندا «تۋريزم» ماماندىعى بويىنشا «جاس تۋريست» VII حالىقارالىق ەتنو-ەكو ەكسكۋرسيالىق-سپورتتىق تۋريستىك سايىسى ءوز جۇمىسىن اياقتادى.
ەكى كۇن بويى الماتى، استانا، اقتاۋ، بايقوڭىر، تۇركىستان، تەكەلى قالالارى مەن قىرعىزستان، وزبەكستان، تاجىكستان ەلدەرىنەن كەلگەن «تۋريزم» ماماندىعىنىڭ كوللەدج ستۋدەنتتەرى تۋريستىك جابدىقتاردى پايدالانىپ، كەدەرگىلەردەن ءوتتى. سايىس بۋتاكوۆكا شاتقالىندا، «لەسنيچەستۆو» وقۋ-جاتتىعۋ بازاسىندا ءوتتى، دەپ حابارلايدى aqshamnews.kz.
سايىس قورىتىندىسى بويىنشا تەكەلى كاسىپتىك كوللەدجى كومانداسى 1 ورىن، حالىقارالىق قازاق-قىتاي ءتىل كوللەدجى كومانداسى 2-ورىن، استانا پوليتەحنيكالىق كوللەدجى كومانداسى 3-ورىن يەلەندى.
سايىس قورىتىندىسى بويىنشا جەڭىمپازدار مەن قاتىسۋشىلار، سونداي-اق كوماندالار جەتەكشىلەرى ديپلومدارمەن، سەرتيفيكاتتارمەن جانە باعالى سىيلىقتارمەن ماراپاتتالدى.
شارانىڭ نەگىزگى ماقساتى – ىشكى ءتۋريزمدى دامىتۋ، قورشاعان ورتاعا ۇقىپتى قاراۋ، جاستاردىڭ دەنساۋلىعىن نىعايتۋ، رۋحاني جانە تابيعي جەتىلۋىن قامتاماسىز ەتۋ.
سايىس قازاقستاننىڭ حالىقارالىق دەڭگەيدە تانىمالدىلىعىن ارتتىرۋ، كىرىس ءتۋريزمىن دامىتۋ، ەتنوتۋريزم مەن سالاۋاتتى ءومىر سالتىن ناسيحاتتاۋ، سونداي-اق تۋريستىك-ولكەتانۋ قىزمەتىن ۇيىمداستىرۋداعى وزىق تاجىريبەنى انىقتاۋ جانە تاراتۋ ماقساتىندا وتكىزىلدى.