الماتىدا العاش رەت جۇرەكتىڭ وتكىزگىش جۇيەسىن ستيمۋلياسيالاۋ بويىنشا وپەراسيا جاسالدى
كارديولوگيا جانە ىشكى اۋرۋلار عزي-دا تاراز، قاراعاندى، الماتى قالالارىنىڭ جانە باسقا وڭىرلەردىڭ دارىگەرلەرى ءۇشىن اريتمولوگيا سالاسىنداعى حالىقارالىق دەڭگەيدە مويىندالعان مامان، پولشا، ۆروسلاۆ مەديسينالىق ۋنيۆەرسيتەتىنىڭ پروفەسسورى ياسەك گاەكتىڭ قاتىسۋىمەن وقىتۋ شەبەرلىك سىنىبى ءوتتى. شەبەرلىك سىنىپ بارىسىندا تولىق اتريوۆەنتريكۋليارلىق بلوكاداسى بار، ياعني جۇرەك ىرعاعىنىڭ بۇزىلۋىنا اكەلەتىن كارديوپاتولوگياسى بار 5 پاسيەنتكە وپەراسيا جاسالدى. ەڭ ۇلكەن پاسيەنت 66 جاستا، ال ەڭ جاس پاسيەنت بار-جوعى 23 جاستا.
ماسەلەن، تولىق اۆ بلوكاداسى، گيس بۋداسى وڭ اياعىنىڭ تولىق بلوكاداسى دياگنوزى قويىلعان 58 جاستاعى ناۋقاستا السىزدىك، باس اينالۋ، ەنتىگۋ، قان قىسىمىنىڭ جوعارىلاۋى، ءجيى باس اۋرۋى سياقتى بەلگىلەرى بولدى. تۋا بىتكەن جۇرەك اقاۋى بار گيس بۋداسىنىڭ سول جانە وڭ جاق اياقتارىنىڭ تولىق بلوكاداسىنا شالدىققان 23 جاستاعى ناۋقاستى دا ۇنەمى باستىڭ اينالۋى، ەنتىگۋ جانە تەز شارشاۋ سياقتى بەلگىلەر مازالاعان.
اۆ بلوكاداسىنىڭ اسقىنعان اعىمى كەنەتتەن جۇرەك ولىمىنە اكەلۋى مۇمكىن ەكەندىگىن اتاپ وتكەن ءجون.
«ءبىز جاڭا تەحنولوگيالاردى ەنگىزۋ ارقىلى زاماناۋي مەديسينالىق ۇردىستەر مەن ستاندارتتاردى ۇستانۋعا تىرىسامىز. ماماندارىمىزدى جاقىن جانە الىس شەت ەلدەردەگى ءتۇرلى شەبەرلىك ساباقتارىنا جىبەرە وتىرىپ وقىتامىز، ۇزدىك دارىگەرلەرىمىز ءوز ارىپتەستەرىن ءبىزدىڭ ينستيتۋتتا جانە وڭىرلەرگە بارىپ وقىتادى. دەمونستراسيالىق وپەراسيالارىن جۇرگىزۋمەن تاجىريبە الماسۋ ماماندارعا كاسىبي قىزمەتتە قاجەتتى بىلىمدەرى مەن داعدىلارىن جەتىلدىرۋگە مۇمكىندىك بەرەدى»، - دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
پولشادان كەلگەن پروفەسسور ياسەك گيەك اتاپ وتكەندەي، گيس بۋداسىن ستيمۋلياسيالاۋ بويىنشا وپەراسيا جۇرەك جەتكىلىكسىزدىگى بار ناۋقاستار ءۇشىن ءتيىمدى. دارىگەردىڭ مۇنداي وپەراسيالاردى جاساۋدا ۇلكەن تاجىريبەسى بار.
«مەن قازاقستانعا وپەراسياعا شاقىرتۋ العانىما وتە ريزامىن. بۇل مەنىڭ 2ء-شى ساپارىم، جانە مەنىڭ تاجىريبەم مەن قوسىمشا وقىتۋ قازاقستاندىق دارىگەرلەرگە وسى تەحنيكانى ەنگىزۋگە كومەكتەسەدى دەپ سەنەمىن. بۇل ءادىس جۇرەك جەتكىلىكسىزدىگى بار ناۋقاستار ءۇشىن وتە ءتيىمدى. ارالاسۋدان كەيىن پاسيەنت قوسىمشا ءدارى - دارمەك تەراپياسىن قاجەت ەتەتىن ىلەسپە پاتولوگيا بولماعان جاعدايدا كەلەسى كۇنى اۋرۋحانادان شىعارىلا بەرسە بولادى»، - دەيدى پروفەسسور.
جۇرەك ىرعاعى مەن وتكىزگىشتىگىنىڭ بۇزىلۋى بولىمشەسىنىڭ مەڭگەرۋشىسى باعدات احىتتىڭ ايتۋىنشا، وتكىزگىش جۇيە بويىنشا ىنتالاندىرۋ قارىنشاارالىق ديسسينحرونيا ماسەلەلەرىن شەشۋگە، جۇرەكتىڭ ەكى قارىنشاسىن دا دالىرەك جانە سينحروندى تۇردە بەلسەندىرۋگە مۇمكىندىك بەرەدى، بۇل پاسيەنتتەردىڭ ءومىر ءسۇرۋ ساپاسىن جاقسارتادى. بۇل ءادىس ادەتتەگى وڭ قارىنشالىق ىنتالاندىرۋعا قاراعاندا الدەقايدا تيىمدىرەك.
«جۇرەكتىڭ وتكىزگىش جۇيەسىنە ىنتالاندىرۋشى ەلەكترودتاردى يمپلانتاسيالاۋ پاسيەنتكە جۇرەك جەتكىلىكسىزدىگىنىڭ دامۋىن بولدىرماۋعا مۇمكىندىك بەرەدى. وپەراسيا كەزىندە تاۋەكەلدەر از، ويتكەنى ءبىز جوعارى تەحنولوگيالىق جابدىقتى قولدانامىز، ءار پاسيەنت ءۇشىن شىعىن ماتەريالدارىنىڭ ۇلكەن سپەكترىن جەكە تاڭدايمىز»، - دەدى كجىاعزي اريتمولوگيالىق قىزمەتىنىڭ اعا ورديناتورى ارتۋر ابدىمومۋنوۆ.
ول كارديوستيمۋلياتور تاۋلىك بويى جۇمىس ىستەيتىنىن، جۇرەكتى ىنتالاندىراتىنىن جانە جۇرەك سوعۋ جيىلىگى شەكتى دەڭگەيدەن تومەندەگەن كەزدە قاجەتتىلىك بويىنشا قوسىلاتىنىن اتاپ ءوتتى. بۇل جۇرەكتىڭ قالىپتى جۇمىسىنا مۇمكىندىگىنشە جاقىن فيزيولوگيالىق ىنتالاندىرۋعا مۇمكىندىك بەرەدى. 12-13 جىلدان كەيىن پاسيەنتكە قۇرىلعىنى اۋىستىرۋ قاجەت بولۋى مۇمكىن، ءبىراق وسى ۋاقىت ىشىندە ادام ءوزىنىڭ ادەتتەگى ءومىر سالتىنا ورالىپ، ءتىپتى ءوزىنىڭ رەجيمىنە سپورتتىق جۇكتەمەلەردى قوسىپ، ەشقانداي شەكتەۋسىز ءومىر سۇرە الادى.
ايتا كەتسەك، وپەراسيا ءمامس شەڭبەرىندە جۇرگىزىلدى، بارلىق كومەك قور قاراجاتى ەسەبىنەن كورسەتىلەدى جانە پاسيەنتتەر ءۇشىن تەگىن.