15 ماۋسىمدا التى جولاقتى تراسسا بويىنشا كولىك قاتىناسى ىسكە قوسىلادى
ۇلكەن الماتى اينالما جولىنىڭ (ءۇااج) 66 شاقىرىمىن پايدالانۋعا بەرۋ شامامەن 15 ماۋسىمعا جوسپارلانعان. بۇگىن، 25 مامىردا جەرگىلىكتى بيلىك پەن جول سالعان كومپانيا ءىرى اۆتوماگيسترالعا جاقىن ورنالاسقان تالعار اۋدانىنىڭ بىرنەشە اۋىلى تۇرعىندارىمەن كەزدەستى، دەپ حابارلايدى Almaty-akshamy.kz.
كەزدەسۋگە ق ر ييدم اۆتوموبيل جولدارى كوميتەتى ءتوراعاسىنىڭ ورىنباسارى باقتيار جامبىل، "ءۇااج ينۆەستيسيالار جانە وپەراسيالار" ج ش س جولدى پايدالانۋ جانە ۇستاۋ جونىندەگى باسشىسى نۇرلانبەك ومىربايەۆ جانە تالعار اۋدانىنىڭ اكىمى تاڭات ايباربەكوۆ قاتىستى.
نۇرلانبەك ومىربايەۆ 15 ماۋسىمدا التى جولاقتى تراسسا بويىنشا كولىك قاتىناسى ىسكە قوسىلاتىنىن اتاپ ءوتتى. 66 شاقىرىمعا ءبىرىڭعاي جىلدامدىق رەجيمى ورناتىلادى: 120 كم/ساع. اۆتوماگيسترال تولىعىمەن اقىلى بولادى. بۇعان دەيىن بيلىك بارلىق اۆتوكولىك يەلەرى مەن تاس جولعا ىرگەلەس جاتقان اۋىلداردىڭ تۇرعىندارى ءۇشىن تاريف قانداي بولاتىنىن ايتقان بولاتىن. ماسەلەن، ىلە، تالعار جانە قاراساي اۋداندارىنىڭ تۇرعىندارى ءۇشىن الماتى جانە باسقا وڭىرلەردىڭ تۇرعىندارىنا قاراعاندا جولاقىسى بىرنەشە ەسە از بولادى، دەپ جازدى Zakon.kz.
الايدا، جىلدامدىق پەن اينالما جولدىڭ بارلىق ارتىقشىلىقتارىنا قاراماستان، اۋىل تۇرعىندارى ءۇشىن جەرگىلىكتى شەنەۋنىكتەر مەن باسقارۋشى كومپانياعا قويار كوپتەگەن سۇراعى بار بولىپ شىقتى. ادامدار ۇزاق مەرزىمدى قۇرىلىستان كەيىن جۇمىسشىلار ارتىندا توننا قوقىس قالدىرىپ، ءتىپتى ونى تازارتۋ نيەتتەرى جوق ەكەنىن ايتىپ نارازىلىق ءبىلدىردى.
سونداي-اق بۇگىندە اۋىر تەحنيكا ارى-بەرى جوڭكىلگەن اۋىلىشىلىك جولداردىڭ دا جاعدايى ءماز ەمەس. بارلىق شۇرق-تەسىك. ەندى مۇنداي جولدارمەن ءجۇرۋدىڭ ءوزى دە مۇمكىن ەمەس. وعان نازار اۋدارىپ جاتقان ەشكىم جوق. جەرگىلىكتى تۇرعىندار وسىدان كەيىن مۇنداي ۋچاسكەلەردە جول اپاتى كوبەيەتىندىگىنە سەنىمدى.
"ءوزىمىز سالعان جول بولعان. ءقازىر بارلىعى ويدىم-ويدىم بولىپ جاتىر. اۋىلدىڭ كىرەبەرىستەرى بىت-شىت، ادام شوشيدى. ونداي جولمەن ءجۇرۋ مۇمكىن ەمەس. بۇل ماسەلەلەر قاشان شەشىلەدى؟ ءبىز جول سالعان كومپانياعا ايتساق، ولار اكىمدىككە ءجون سىلتەيدى. اكىمدىك بيۋدجەتتە اقشا جوق ەكەنىن ايتىپ، كەرى ءۇااج باسشىلىعىنا سىلتەمە جاسايدى. اقىرى بۇل ماسەلەنى ءوز بەتىمىزشە شەشۋ كەرەك بولامىز با دەپ قاۋىپتەنەمىن"، – دەپ شاعىمداندى قىزىلقارا اۋىلىنىڭ تۇرعىنى رۋستام ويناروۆ.
شەنەۋنىكتەر جاعدايدى باجايلاپ، جاقىن ارادا بۇزىلعان جولداردى كىم جوندەيتىنىن شەشۋگە ۋادە بەردى. بۇگىن كەزدەسۋدە تەك كەيبىر ماسەلەلەر عانا ايتىلدى. جەرگىلىكتى تۇرعىندار ءىرى تراسسا ىسكە قوسىلعاننان كەيىن دە كوپ داۋلى ماسەلەلەر تۋىندايتىندىعىنا سەنىمدى.