الماتى قالالىق كارديولوگيالىق ورتالىعىندا قاراشا ايىندا العاش رەت جۇرەك ترانسپلانتاسياسى جاسالعان 34 جاستاعى ناۋقاس اۋرۋحانادان شىعارىلدى. قازىرگى ۋاقىتتا ونىڭ جاعدايى تۇراقتى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ وكىلدەرى ايتتى.
اتالعان ناۋقاس – سوزىلمالى جۇرەك جەتكىلىكسىزدىگىنىڭ سوڭعى ساتىسىنا شالدىققان 34 جاستاعى ازامات. ول بۇعان دەيىن جۇرەك اۋىستىرۋ وتاسىن كۇتىپ، رەسپۋبليكالىق كەزەكتە تۇرعان.
بەس ساعاتتان استام ۋاقىتقا سوزىلعان جۇرەك اۋىستىرۋ وتاسى ءساتتى اياقتالدى. كۇردەلى وتانى الماتى قالالىق كارديولوگيالىق ورتالىعىنىڭ بىلىكتى ماماندارىنان قۇرالعان مۋلتيديسيپلينارلىق كوماندا استاناداعى University Medical Center دارىگەرلەرىمەن بىرلەسىپ جاسادى. وعان قالالىق كارديولوگيالىق ورتالىقتىڭ ديرەكتورى ەرماعامبەت قۋاتبايەۆ پەن UMC كورپوراتيۆتىك قورى باسقارما ءتوراعاسى، پروفەسسور پيا يۋريي ۆلاديميروۆيچ جەتەكشىلىك ەتتى. قاجەتتى قولداۋ كورسەتۋ ءۇشىن UMC ماماندارى الماتىعا جەدەل تۇردە كەلدى.
قالالىق كارديولوگيالىق ورتالىقتا جوعارى تەحنولوگيالىق وتا جاساۋعا بارلىق قاجەتتى جاعداي جاسالعان. مۇندا بىلىكتى كارديولوگتار، كارديوحيرۋرگتەر، انەستەزيولوگ-رەانيماتولوگتار، پەرفۋزيولوگتار مەن وپەراسيالىق مەيىربيكەلەر قىزمەت اتقارادى. زاماناۋي دياگنوستيكالىق جانە ەمدەۋ ادىستەرى ەنگىزىلىپ، حالىقارالىق ستاندارتتارعا ساي جابدىقتار قولدانىلادى.
ساۋىققان ناۋقاس دارىگەرلەر مەن مەديسينا قىزمەتكەرلەرىنە شىنايى ريزاشىلىق ءبىلدىرىپ، ءاربىر كەزەڭدە كورسەتىلگەن قامقورلىق پەن كاسىبي بىلىكتىلىكتى ەرەكشە اتاپ ءوتتى. ونىڭ ايتۋىنشا، بۇگىندە ول جاقىندارىنىڭ جانىندا بولىپ، ومىرگە قايتا ورالۋدىڭ ءقادىرىن بۇرىنعىدان دا جاقسى سەزىنەدى.
«اۋرۋىمنىڭ ءبارى ەنەرگەتيك سۋسىنداردان باستالدى. باسىندا كۇنىنە ءبىر بوتەلكەمەن شەكتەلسەم، كەيىن كۇن سايىن 8-10 ەنەرگەتيكالىق سۋسىنعا دەيىن جەتتىم. مۇنىڭ سوڭى اۋىر دياگنوزعا اكەلەتىنىن اڭعارماپپىن. بۇگىن مەن دارىگەرلەردىڭ جانكەشتى ەڭبەگىنىڭ ارقاسىندا ءتىرىمىن. ەندى دەنساۋلىقتىڭ ادام ومىرىندەگى ەڭ ۇلكەن بايلىق ەكەنىن انىق ءتۇسىندىم»، – دەدى ناۋقاس.
اۋرۋحانادان شىققاننان كەيىن ناۋقاس تىركەلگەن ەمحاناسىندا دارىگەرلەردىڭ تۇراقتى باقىلاۋىندا بولادى. جۇرەك ترانسپلانتاسياسىن قوسا العاندا، ستاسيونارلىق ەم، قاجەتتى دارى-دارمەكپەن قامتاماسىز ەتۋ، وڭالتۋ جانە كەيىنگى مەديسينالىق باقىلاۋ مەملەكەتتىك كەپىلدىك بەرىلگەن تەگىن مەديسينالىق كومەك اياسىندا مەملەكەت ەسەبىنەن كورسەتىلەدى.
ەسكە سالا كەتەيىك، ارتەريالىق گيپەرتەنزيانىڭ اۋىر تۇرىمەن اۋىرعان، ينسۋلت العان 50 جاستاعى ايەل دونور بولدى. الماتى قالالىق ورتالىق كلينيكالىق اۋرۋحاناسىنا شۇعىل تۇردە جەتكىزىلگەننەن كەيىن دارىگەرلەر كونسيليۋمى ونىڭ مي ءولىمىن انىقتاپ، مايىتتىك دونورعا رۇقسات بەردى. مارقۇمنىڭ تۋىستارى كەلىسىمىن بەرگەن سوڭ دونورلىق ۇدەرىس ۇيىمداستىرىلدى.