الماتىدا مامانداندىرىلعان قالالىق بالالار كلينيكالىق ينفەكسيالىق اۋرۋحاناسىندا (قبكيا) بالالارعا تاۋلىك بويى كومەك كورسەتىلەدى. اۋرۋحانا نەگىزگى كورپۋس پەن ەكى فيليالدان تۇرادى. ۇيىم 0-دەن 18 جاسقا دەيىنگى بالالارعا ينفەكسيالىق اۋرۋلار بويىنشا شۇعىل تۇردە، تەگىن مەديسينالىق كومەكتىڭ كەپىلدىك بەرىلگەن كولەمى (تمككك) اياسىندا قىزمەت كورسەتەدى. بۇل تۋرالى الماتى قالاسى قوعامدىق دەنساۋلىق باسقارماسى باسشىسىنىڭ ورىنباسارى ءلايلا يمانعالييەۆا وڭىرلىك كوممۋنيكاسيالار قىزمەتىنىڭ الاڭىندا مالىمدەدى.
قبكيا-دا تاۋلىك بويعى ستاسيوناردىڭ 719 توسەگى جۇمىس ىستەيدى. نەگىزگى كورپۋس (بايزاقوۆ كوشەسى، 299 «ا») 360 توسەككە ەسەپتەلگەن جانە بوستاندىق، مەدەۋ، المالى مەن اۋەزوۆ اۋداندارىنا قىزمەت كورسەتەدى. مودۋلدىك ينفەكسيالىق ستاسيونار (تەرەكتى ىقشام اۋدانى، تاشكەنت تراكتىسى، 541) 270 توسەكپەن الاتاۋ جانە ناۋرىزباي اۋداندارىن قامتيدى. سايالى ىقشام اۋدانىنداعى فيليالدا 147 توسەك بار جانە تۇركسىب، جەتىسۋ جانە الاتاۋ اۋدانىنىڭ ءبىر بولىگىنە مەديسينالىق كومەك كورسەتىلەدى.
«بالالارعا جرۆي مەن تۇماۋعا قارسى ەم جۇرگىزۋ ءۇشىن قبكيا-دا 536 توسەككە ارنالعان 14 بولىمشە اشىلعان، ولاردىڭ ىشىندە 48 رەانيماسيالىق توسەك بار. سوڭعى اپتاداعى توسەك قورىنىڭ جۇكتەمەسى شامامەن 51%-دى قۇرايدى. قاجەت بولعان جاعدايدا ەپيدەميولوگيالىق جاعدايعا بايلانىستى قوسىمشا قورداعى 92 توسەك اشىلۋى مۇمكىن»، – دەدى ءلايلا يمانعالييەۆا.
ستاسيونارعا جۇكتەمە بويىنشا بالالار اراسىندا ءبىرىنشى ورىندا تۇماۋ مەن جرۆي، ەكىنشى ورىندا پنيەۆمونيا تۇر. 2025 جىلدىڭ 17 قاراشاسىنداعى جاعداي بويىنشا قبكيا ستاسيونارلارىندا جرۆي جانە تۇماۋمەن 274 بالا ەم الىپ جاتىر، ولاردىڭ 139-ىندا پنيەۆمونيا دياگنوزى قويىلعان. اۋرۋحانادا ينفەكسيالاردى جەدەل انىقتاۋعا مۇمكىندىك بەرەتىن زەرتحانا بار.
س. جەكەنوۆا اتىنداعى قالالىق كلينيكالىق ينفەكسيالىق اۋرۋحانادا ەرەسەك تۇرعىندارعا مەديسينالىق كومەك كورسەتىلەدى. مۇندا جرۆي جانە تۇماۋمەن اۋىراتىندارعا ارنالعان 280 توسەگى بار 5 بولىمشە جۇمىس ىستەيدى، ونىڭ ىشىندە 9 توسەك – رەانيماسيادا. قاجەت بولعان جاعدايدا قوسىمشا 100 توسەك اشىلۋى مۇمكىن. 2025 جىلدىڭ 17 قاراشاسىنداعى جاعداي بويىنشا ستاسيوناردا 203 جرۆي دياگنوزى بار پاسيەنت جانە پنيەۆمونيامەن 6 ەرەسەك ناۋقاس ەم قابىلداپ جاتىر.
№4 قالالىق پەرزەنتحانادا جۇكتى ايەلدەرگە مامانداندىرىلعان كومەك كورسەتىلەدى. جۇكتى ايەلدەرگە (28 اپتادان جوعارى مەرزىمدە) جرۆي جانە تۇماۋ بويىنشا ەم جۇرگىزۋگە ارنالعان 70 توسەك اشىلعان، ولاردىڭ ىشىندە 6 توسەك – رەانيماسيالىق. ەپيدەميولوگيالىق جاعدايدىڭ وزگەرۋىنە قاراي قوسىمشا 10 رەزەرۆتىك توسەك اشۋعا مۇمكىندىك بار.
قوعامدىق دەنساۋلىق ساقتاۋ باسقارماسى توسەك-ورىن قورىنىڭ تولىمدىلىعىن باقىلاپ وتىرادى. ينفەكسيالىق ستاسيونارلاردا رەزەرۆتىك توسەك قورى قاراستىرىلعان. قاجەت بولعان جاعدايدا توسەك سانىن جەدەل ارتتىرۋعا بولادى. مەديسينالىق ۇيىمدار توسەك قورىن قايتا بەيىندەۋ جانە پاسيەنتتەردى باعىتتاۋ جوسپارلارىن ازىرلەگەن، بۇل ەپيدەميولوگيالىق جاعدايعا يكەمدى ارەكەت ەتۋگە جانە جۇيەنىڭ شامادان تىس جۇكتەلۋىن بولدىرماۋعا مۇمكىندىك بەرەدى. اۋرۋشاڭدىق پەن گوسپيتاليزاسيا بويىنشا كۇن سايىن باقىلاۋ جاسالادى.
«ەمحانالار دەڭگەيىندە پاسيەنتتەرگە جرۆي جانە تۇماۋ بويىنشا كومەك «فيلتر-كابينەتتەر» ارقىلى كورسەتىلەدى، وندا ينفەكسيا بەلگىلەرى بار ادامداردى قابىلداپ، اۋرۋدىڭ تارالۋ ءقاۋپىن ازايتادى. سونداي-اق ۇيگە شىعاتىن ءموبيلدى بريگادالار جۇمىس ىستەيدى. باستاپقى مەديسينالىق سانيتارلىق كومەك جۇيەسى ماۋسىمدىق سىرقاتتانۋدىڭ ءوسۋ كەزەڭىندە كۇشەيتىلگەن باقىلاۋمەن جوسپارلى رەجيمدە قىزمەت اتقارادى»، – دەپ اتاپ ءوتتى سپيكەر.
ەرەكشە كوڭىل جۇكتى ايەلدەر مەن ءبىر جاسقا دەيىنگى بالالارعا ەرەكشە كوڭىل بولىنەدى. بۇل ساناتتاعى پاسيەنتتەر ۇيگە شاقىرتقاندا ءبىرىنشى كەزەكتە قابىلداپ، تۇراقتى پاتروناج جانە قاجەت بولعان جاعدايدا ۋاقتىلى گوسپيتاليزاسيا قامتاماسىز ەتىلەدى. مەديسينالىق قىزمەتكەرلەرگە كومەك كورسەتۋ الگوريتمدەرى، قارسىەپيدەميالىق رەجيمدى ساقتاۋ جانە پاسيەنتتەردى ستاسيونارلارعا باعىتتاۋ بويىنشا وقۋ سەمينارلارى وتكىزىلدى.
تۇرعىندار اۋرۋدىڭ الدىن الۋدىڭ ءىس-شارالارىن ساقتاۋى كرەەك: ناۋقاستارمەن بايلانىستان اۋلاق بولىپ، قوعامدىق ورىنداردا ماسكا تاعىپ، قولدى ءجيى جۋىپ، يممۋنيتەتتى كۇشەيتىپ، اۋىرعان بالالاردى مەكتەپ پەن بالاباقشاعا جىبەرمەۋى كەرەك.
دارىلىك زاتتارعا قاتىستى: قازىرگى تاڭدا دارى-دارمەك پەن جەكە قورعانىس قۇرالدارىنىڭ تاپشىلىعى بايقالمايدى. بارلىق مەديسينالىق ۇيىمدار قاجەتتى ۆيرۋسقا قارسى پرەپاراتتارمەن، قىزۋ تۇسىرەتىن دارىلەرمەن، يممۋنومودۋلياتورلارمەن، دارۋمەندەرمەن، سونداي-اق رەانيماسيالىق جابدىقتارمەن، دەزينفەكسيالىق جانە جەكە قورعانىس قۇرالدارىمەن قامتاماسىز ەتىلگەن.
مەديسينالىق ۇيىمدار كۇشەيتىلگەن جۇمىس رەجيمىنە اۋىستىرىلدى، بۇل ەپيدەميولوگيالىق ماۋسىم كەزەڭىندە پاسيەنتتەرگە تۇراقتى كومەك كورسەتۋ ءۇشىن دارى-دارمەكتەر مەن قورعانىس قۇرالدارىنىڭ جەتكىلىكتى دەڭگەيدە بولۋىن قامتاماسىز ەتەدى.