وڭىرلىك كوممۋنيكاسيالار قىزمەتىنىڭ الاڭىندا الدىن الا ەپيدەميالىق ماۋسىمداعى جرۆي مەن تۇماۋدىڭ اعىمداعى ەپيدەميولوگيالىق جاعدايى مەن پروفيلاكتيكا ءىس-شارالارى تۋرالى بريفينگ ءوتتى. الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا قالادا ماۋسىمدىق جاعجايعا قاراماستان، سىرقاتتانۋ دەڭگەيى تۇراقتى بولىپ وتىرعانىن حابارلادى.
دەپارتامەنت دەرەكتەرىنە سايكەس، 45-اپتادا الماتىدا 23 786 جرۆي جاعدايى تىركەلدى، بۇل 100 مىڭ تۇرعىنعا شاققاندا 1012،89-دى قۇرايدى جانە وتكەن جىلدىڭ وسى كەزەڭىمەن سالىستىرعاندا 18،7%-عا، ال الدىڭعى اپتامەن سالىستىرعاندا 18،9%-عا جوعارى. اۋرۋلاردىڭ 63%-دان استامى – بالالار. ستاسيونارلارعا 519 پاسيەنت، ونىڭ ىشىندە 64 جۇكتى ايەل جانە 1 جاسقا دەيىنگى 66 بالا گوسپيتاليزاسيالاندى. «پنيەۆمونيا» دياگنوزىمەن 79 ادام اۋرۋحاناعا جاتقىزىلعان.
«جاڭا ەپيدماۋسىم باستالعالى بارلىعى 113 390 جرۆي جاعدايى تىركەلدى، سىرقاتتانۋشىلىق كورسەتكىشى 4828،55 بولدى، بۇل وتكەن جىلدىڭ وسى كەزەڭىمەن سالىستىرعاندا 9،6%-عا جوعارى. اۋرۋشاڭدىقتىڭ 58،6%-ى – بالالار اراسىندا. بارلىعى 2428 پاسيەنت، ونىڭ ىشىندە 255 جۇكتى ايەل جانە 1 جاسقا دەيىنگى 333 بالا اۋرۋحاناعا جاتقىزىلدى»، – دەدى اسەل قالىقوۆا.
الماتىدا تۇماۋدىڭ A/H3N2 شتاممىنىڭ 13 راستالعان جاعدايى انىقتالدى، ولاردىڭ باسىم بولىگى – ەكپە الماعاندار. ناۋقاستاردىڭ كوپشىلىگى جۇكتى ايەلدەر. بارلىق پاسيەنتتەر ەم قابىلداپ جاتىر، دارىگەرلەر ولاردىڭ جاعدايىن قاناعاتتانارلىق دەپ باعالايدى.
قالالىق زەرتحانالار تۇماۋ جانە باسقا جرۆي ۆيرۋس تۇرلەرىنىڭ اينالىمىن باقىلاۋدى جالعاستىرىپ جاتىر. زەرتتەلگەن 609 ۇلگىنىڭ 13-ىندە A/H3N2 ۆيرۋسى انىقتالدى. سونداي-اق رينوۆيرۋس، پاراگريپپ جانە ماۋسىمدىق كوروناۆيرۋس اينالىمدا ەكەنى تىركەلگەن.
وقۋشىلار اراسىنداعى سىرقاتتانۋعا جەكە نازار اۋدارىلدى. 45-اپتادا 172 مەكتەپتە 602 جرۆي جاعدايى تىركەلدى، بۇل جالپى وقۋشىلار سانىنىڭ نەبارى 0،3%-ىن قۇرايدى جانە شەكتى دەڭگەيدەن اسپايدى. اۋرۋدىڭ الدىن الۋ ماقساتىندا بارلىق مەكتەپتە تاڭەرتەڭگى جانە اۋىسىمارالىق سۇزگى جاسالادى.
اسەل قالىقوۆا الماتىنىڭ تۇماۋ مەن اۋىر رەسپيراتورلىق ينفەكسيالار بويىنشا جىل بويى جۇمىس ىستەيتىن دوزورلىق ەپيدقاداعالاۋ جۇرگىزەتىن وڭىرلەردىڭ ءبىرى ەكەنىن ەسكە سالدى. قالادا ستاسيونارلىق جانە امبۋلاتوريالىق سەگىز دوزورلىق ورتالىق جۇمىس ىستەيدى.
ەپيدماۋسىمعا دايىندىق اياسىندا قالادا قاجەتتى قاۋلىلار ازىرلەنىپ، مەديسينا قىزمەتكەرلەرىنە وقۋ سەمينارلارى وتكىزىلدى، ەمحانالاردا فيلتر-ايماقتار قۇرىلدى، تۇماۋ مەن جرۆي-دى انىقتايتىن پتر-جيناقتاردىڭ قورى قامتاماسىز ەتىلدى.
25 قىركۇيەكتەن باستاپ حالىقتى ۆاكسيناسيالاۋ باستالدى. بۇگىنگى تاڭدا 254 115 ادامعا ەكپە سالىندى، ونىڭ 250 مىڭعا جۋىعى – ءقاۋىپ توبىنا جاتاتىندار. جەكەمەنشىك ورتالىقتاردا ۆاكسيناسيا قالاعان بارلىق تۇرعىنعا، سونىڭ ىشىندە جۇمىس بەرۋشىلەر ەسەبىنەن قولجەتىمدى.
«جەكەمەنشىك مەديسينالىق ورتالىقتاردا تۇماۋعا قارسى ەكپەنى اقىلى تۇردە حالىقتىڭ باسقا توپتارى دا الا الادى، وعان ءتۇرلى سالا قىزمەتكەرلەرىن جۇمىس بەرۋشىلەر ەسەبىنەن ۆاكسيناسيالاۋ دا كىرەدى. اقىلى تۇردە 4115 ادام ەگىلدى، ولاردىڭ 2146-سى – جۇمىس بەرۋشىلەردىڭ قاراجاتىنا، 1969-ى – ءوز قاراجاتى ەسەبىنەن»، – دەدى اسەل قالىقوۆا.
بريفينگ سوڭىندا مامان تۇرعىندارعا جرۆي مەن تۇماۋدىڭ الدىن الۋدىڭ نەگىزگى ءىس-شارالارىن ەسكە سالدى:
• يممۋنيتەتتى كوتەرۋ: س دارۋمەنىن قولدانۋ، دارىگەر نۇسقاۋىمەن وكسولين مايىن پايدالانۋ؛
• كوپشىلىك جينالاتىن ورىندارعا بارۋدى قىسقارتۋ، ءۇي-جايدى جەلدەتىپ، ىلعالدى تازالاۋ، جرۆي-بەن اۋىراتىندارمەن قارىم-قاتىناستان اۋلاق بولۋ، قاجەت جاعدايدا ماسكا تاعۋ، جەكە گيگيەنا ەرەجەلەرىن ساقتاۋ؛
• سىرقاتتانعان جاعدايدا ۇيدە بولۋ، ءوزىن-وزى ەمدەمەۋ، مەديسينا قىزمەتكەرىن شاقىرۋ، جوتەلگەندە جانە قاقىرعاندا اۋىزدى قولمەن، سالفەتكامەن نەمەسە ورامالمەن جابۋ، قولدى ءجيى جۋۋ؛
• ناۋقاس بالالاردى مەكتەپكە، بالاباقشاعا جانە مادەني-بۇقارالىق ورىندارعا جىبەرمەۋ.