الماتى قالاسى پوليسيا دەپارتامەنتىنىڭ جىلدام قيمىلدايتىن ارنايى جاساعىنىڭ قىزمەتكەرى قىزمەتتەن تىس ۋاقىتتا قالاداعى كوپقاباتتى تۇرعىن ۇيلەردىڭ بىرىنەن قۇرامىندا ەسىرتكى زاتتارى بار وسىمدىكتەردى زاڭسىز ءوسىرۋ دەرەگىن انىقتادى، - حابارلايدى Aqshamnews.kz.
تۇسكەن اقپاراتتى تەكسەرۋ بارىسىندا پاتەردەن قولدان جاسالعان فيتوزەرتحانانىڭ جۇمىس ىستەپ تۇرعانىن ايعاقتايتىن بەلگىلەر شىقتى. وقيعا ورنىندا قارسىلىق كورسەتۋگە ارەكەتتەنگەن ەكى ەر ادام ۇستالدى.
جقاج قىزمەتكەرى ولاردى جەدەل تۇردە توقتاتىپ، پوليسيا ناريادىن شاقىردى. وقيعا ورنىنا الماتى قالاسى ناۋرىزباي اۋدانى پوليسيا باسقارماسىنىڭ تەرگەۋ-جەدەل توبى كەلىپ، دەرەكتى تىركەدى، ارنايى جابدىقتار مەن وسىمدىكتەردى تاركىلەدى، سونداي-اق سوتقا دەيىنگى تەرگەپ-تەكسەرۋ جۇمىستارىن باستادى.
- ارنايى بولىمشە قىزمەتكەرلەرى ءۇشىن قىزمەت جۇمىس ۋاقىتىمەن شەكتەلمەيدى. كاسىبي دايارلىق پەن جاۋاپكەرشىلىك كەز كەلگەن جاعدايدا، ونىڭ ىشىندە قىزمەتتەن تىس ۋاقىتتا دا دۇرىس شەشىم قابىلداپ، ساۋاتتى ارەكەت ەتۋگە مۇمكىندىك بەرەدى. بۇل وقيعا – پوليسيانىڭ زاڭ مەن ءتارتىپ كۇزەتىندە تاۋلىك بويى تۇرعانىنىڭ ايقىن دالەلى. ەسىرتكىنىڭ زاڭسىز اينالىمىنا قاتىستى كەز كەلگەن فاكتى انىقتالىپ، ۋاقىتى مەن ءمان-جايىنا قاراماستان قاتاڭ تۇردە جولى كەسىلەدى، – دەدى الماتى قالاسى پوليسيا دەپارتامەنتىنىڭ جەدەل قيمىلدايتىن ارنايى جاساعىنىڭ كومانديرى ازامات يسەرگۋجين.