14-16 قاڭتار ارالىعىندا رەسپۋبليكا كولەمىندە جەرگىلىكتى اتقارۋشى ورگاندار، كولىك مينيسترلىگىنىڭ كولىك كوميتەتىنىڭ اۋماقتىق بولىمشەلەرى جانە جۇرتشىلىق وكىلدەرىنىڭ قاتىسۋىمەن «تاسىمالداۋشى» جەدەل-پروفيلاكتيكالىق ءىس-شاراسى وتۋدە.
ءىس-شارانىڭ باستى ماقساتى – قوعامدىق كولىكتەگى قۇقىق بۇزۋشىلىقتارعا «مۇلدەم توزبەۋشىلىك» قاعيداتىن ۇستانۋ، جولاۋشىلار تاسىمالى سالاسىنداعى زاڭنامانىڭ ساقتالۋىن قاداعالاۋ جانە قاۋىپسىزدىك دەڭگەيىن ارتتىرۋ، دەپ حابارلايدى aqshamnews.kz Polisia.kz-كە سىلتەمە جاساپ.
– قازىرگى ۋاقىتتا قىزمەتكەرلەرىمىز جولاۋشىلاردى تاسىمالداۋ بارىسىندا قاۋىپسىزدىك تالاپتارىنىڭ ساقتالۋىن قامتاماسىز ەتۋ ماقساتىندا اۆتوكولىك كومپانيالارى مەن جەكە تاسىمالداۋشىلاردى تەكسەرۋدە. سونىمەن قاتار زاڭسىز ميگرانتتار مەن رۇقساتسىز جۇمىس ىستەپ جاتقان تاسىمالداۋشىلاردى انىقتاۋ ءۇشىن كوشى-قون پوليسياسىمەن بىرلەسكەن رەيدتەر جۇرگىزىلۋدە. الدىڭعى شەپتەگى بولىمشەلەردىڭ جەكە قۇرامى بىرنەشە رەت جانە جۇيەلى تۇردە قۇقىق بۇزۋشىلىق جاساعان ادامدار مەن ىزدەۋدە جۇرگەن كولىكتەردى انىقتاۋ ءۇشىن بارلىق تىركەۋ دەرەكتەر بازاسى بويىنشا جۇرگىزۋشىلەردى تەكسەرىپ جاتىر، – دەپ مالىمدەدى الماتى قالالىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.