الماتى قالالىق پوليسيا دەپارتامەنتىندە جول قوزعالىسى قاۋىپسىزدىگىن ارتتىرۋ جانە جولاۋشىلار تاسىمالى سالاسىنداعى ءتارتىپتى نىعايتۋ ماسەلەلەرىنە ارنالعان كەڭەس ءوتتى.
وعان اكىمشىلىك پوليسيا قىزمەتكەرلەرى، اۆتوپاركتەردىڭ وكىلدەرى، قوعام بەلسەندىلەرى جانە ساراپشىلار قاۋىمداستىعى قاتىستى، دەپ حابارلايدى aqshamnews.kz.
الماتى قالاسى پد اكىمشىلىك پوليسيا باسقارماسىنىڭ باستىعى اسحات قۇلبايەۆتىڭ ايتۋىنشا، جولدارداعى قاۋىپسىزدىكتى قامتاماسىز ەتۋ، اسىرەسە جولاۋشىلاردى تاسىمالداۋ كەزىندە، بارلىق مۇددەلى تاراپتاردىڭ ورتاق جاۋاپكەرشىلىگىن تالاپ ەتەتىن باسىم باعىتتاردىڭ ءبىرى.
— قازىرگى ۋاقىتتا ەلىمىز بويىنشا “تاسىمالداۋشى” جەدەل الدىن الۋ ءىس-شاراسى ءوتىپ جاتىر. ونىڭ باستى ماقساتى – جول قاۋىپسىزدىگىن ارتتىرۋ جانە قوعامدىق كولىك جۇرگىزۋشىلەرى تاراپىنان زاڭ بۇزۋشىلىقتارعا جول بەرمەۋ. تاسىمالداۋ قاۋىپسىزدىگىن قامتاماسىز ەتۋ - ءبىزدىڭ ورتاق مىندەتىمىز. بارلىق قىزمەتتەردىڭ ۇيلەسىمدى جۇمىسى مەن ءتارتىپتى ۇستانۋ ارقىلى عانا قالا تۇرعىندارىنىڭ سەنىمىن اقتاپ، قايعىلى وقيعالاردىڭ الدىن الۋعا بولادى، - دەدى اسحات قۇلبايەۆ.
كەڭەستە 2025 جىلدىڭ العاشقى جارتىجىلدىعىندا قوعامدىق كولىكتىڭ قاتىسۋىمەن ورىن العان جول-كولىك وقيعالارىنا تالداۋ جاسالدى. جاراقات العاندار سانى دا ارتىپ وتىرعانى اتاپ ءوتىلدى. سونىمەن قاتار جەدەل الدىن الۋ ءىس-شارالارى بارىسىندا قوعامدىق كولىك جۇرگىزۋشىلەرى تاراپىنان جول ەرەجەلەرىن بۇزۋ دەرەكتەرى جانە تەحنيكالىق اقاۋى بار اۆتوبۋستاردىڭ پايدالانىلعانى بەلگىلى بولدى. كولىك جۇرگىزۋشىلەرىن دايارلاۋ، ولاردىڭ ءتارتىبى، رەيس الدىنداعى نۇسقامالار مەن اۆتوكاسىپورىندار تاراپىنان باقىلاۋ ماسەلەلەرىنە ەرەكشە نازار اۋدارىلدى.
جاڭا وقۋ جىلى قارساڭىندا، جولاۋشىلار اعىنى مەن قوعامدىق كولىككە تۇسەتىن جۇكتەمە ارتاتىن كەزەڭدە، الدىن الۋ شارالارىن كۇشەيتۋدىڭ ماڭىزدىلىعى اتاپ ءوتىلدى. تاراپتار تاسىمالداۋ قاۋىپسىزدىگى دەڭگەيىن ارتتىرۋ جانە جول قوزعالىسىنا جاۋاپكەرشىلىكپەن قاتىسۋ مادەنيەتىن قالىپتاستىرۋ بويىنشا ودان ءارى ءوزارا ءىس-قيمىل جانە كۇش-جىگەردى ۇيلەستىرۋ قاجەتتىلىگى تۋرالى ورتاق پىكىرگە كەلدى.