الماتى قالاسىندا جاقىن ارادا جەدەل جاردەم قىزمەتىندە سمارت-بەينەجەتوندار قولدانۋ جوسپارلانىپ وتىر.
بۇل قۇرىلعىلار مەديسينا قىزمەتكەرلەرىنىڭ قاۋىپسىزدىگىن ارتتىرۋ ماقساتىندا ەنگىزىلۋدە. ءقازىردىڭ وزىندە اتالعان تەحنولوگيا ەلوردادا بەس جەدەل جاردەم بريگاداسىندا پيلوتتىق رەجيمدە سىناقتان ءوتىپ جاتىر، دەپ حابارلايدى aqshamnews.kz.
سمارت-بەينەجەتوندار قوڭىراۋلاردى بەينەتىركەۋگە مۇمكىندىك بەرەدى جانە توتەنشە جاعداي تۋىنداعان كەزدە جەدەل ارەكەت ەتۋ قۇرالى رەتىندە قىزمەت اتقارادى.
اتالعان شەشىم – قازاقستاننىڭ دەنساۋلىق ساقتاۋ جۇيەسىن سيفرلاندىرۋ اياسىندا قولعا الىنعان ءبىرقاتار جوبالاردىڭ ءبىرى. دەنساۋلىق ساقتاۋ مينيسترلىگىندە ۆەدومستۆو باسشىسى اقمارال ءالنازاروۆا مەن «قازاقتەلەكوم» اق باسقارما ءتوراعاسى باعدات ءمۋسيننىڭ قاتىسۋىمەن وتكەن كەزدەسۋدە جاساندى ينتەللەكت قولدانىلاتىن سيفرلىق جوبالار كەڭىنەن تالقىلاندى.
ۇسىنىلعان باستامالار قاتارىندا:
• «جي-تەراپيەۆت» جۇيەسى. اقمولا وبلىسىنىڭ مەديسينالىق ۇيىمدارىندا سىناقتان ءوتىپ جاتقان بۇل سەرۆيس دارىگەر مەن پاسيەنت اراسىنداعى ديالوگتى ناقتى ۋاقىت رەجيمىندە تالداپ، 80% دالدىكپەن الدىن الا دياگنوز قويا الادى. سونداي-اق دارىگەردىڭ قۇجات تولتىرۋ ۋاقىتىن 40%-عا قىسقارتادى.
• قاشىقتان باقىلاۋعا ارنالعان تەلەمەديسينالىق قوسىمشا. قازاقستاندىقتار بۇل قوسىمشانىڭ كومەگىمەن قان قىسىمىن، جۇرەك سوعىسىن، دەنە تەمپەراتۋراسىن، قانداعى وتتەگى مەن گليۋكوزا دەڭگەيىن ولشەي الادى. اتالعان شەشىم اسىرەسە اۋىلدىق جەرلەردەگى مەديسينالىق قىزمەتتىڭ قولجەتىمدىلىگىن ارتتىرۋعا باعىتتالعان.
كەزدەسۋ سوڭىندا تاراپتار مەديسينالىق ينفراقۇرىلىمدى سيفرلاندىرۋ مەن پيلوتتىق جوبالاردى كەڭەيتۋگە ۋاعدالاستى.
باعدات ءمۋسيننىڭ ايتۋىنشا، «قازاقتەلەكوم» اق مەديسينا ۇيىمدارىنا بەينەباقىلاۋ، قولجەتىمدىلىكتى باقىلاۋ، دابىل باتىرماسى جانە پوليسيانىڭ جەدەل باسقارۋ ورتالىقتارىمەن ينتەگراسيالانعان بەينەتاسپا جۇيەسى سىندى قاۋىپسىزدىك قۇرالدارىن ۇسىنۋعا دايىن.
اقمارال ءالنازاروۆا:
«مەديسينا قىزمەتكەرلەرىنىڭ قاۋىپسىزدىگى مەن جۇمىس تيىمدىلىگى – باستى باسىمدىق. كۇزەت، شۇعىل ارەكەت ەتۋ جۇيەلەرى جانە تەلەمەديسيناعا قاتىستى جوبالار دەنساۋلىق ساقتاۋ سالاسىنداعى وزەكتى سىن-قاتەرلەرگە ناقتى جاۋاپ بەرەدى»، — دەپ اتاپ ءوتتى مينيستر.