قازاقستاندا العاش رەت سپورتتىق ءبىلىم بەرۋ جۇيەسىندە كادر دايارلاۋدىڭ جاڭا ساناتتارى ەنگىزىلدى.
بۇعان دەيىن وقىتۋ تەك مەكتەپتەگى دەنە شىنىقتىرۋ پانىنە باعىتتالعان «دەنە شىنىقتىرۋ» ماماندىعى اياسىندا جۇرگىزىلسە، ەندى جاتتىقتىرۋشى، ادىستەمە، وڭالتۋ، ينكليۋزيۆتى جانە سيفرلىق سپورت باعىتتارىن قامتيتىن ارنايى باعدارلامالار ىسكە قوسىلدى، دەپ حابارلايدى aqshamnews.kz.
بۇل – ەلىمىزدە سپورت ماماندارىن دايارلاۋعا جۇيەلى ءارى عىلىمي ءتاسىل قولدانۋدىڭ العاشقى قادامى. دەنە شىنىقتىرۋ جانە بۇقارالىق سپورت اكادەمياسىنىڭ بازاسىندا مىناداي ءبىلىم بەرۋ باعدارلامالارى جۇزەگە اسىرىلۋدا:
«جاتتىقتىرۋشىلىق قىزمەت (سپورت تۇرلەرى بويىنشا)»
«سپورت جانە ساۋىقتىرۋ سالاسىنداعى نۇسقاۋشى-ادىسكەر»
«سپورتتىق وڭالتۋ»
«ۇستەل ءۇستى سپورت تۇرلەرىنەن پەداگوگ-جاتتىقتىرۋشى (شاحمات، توعىزقۇمالاق)»
«كيبەرسپورت (Esport)»
«دەنە شىنىقتىرۋ جانە سپورت (IP)»
«بەيىمدەلگەن دەنە شىنىقتىرۋ بويىنشا پەداگوگ»
«قازاق كۇرەسى بويىنشا پەداگوگ-جاتتىقتىرۋشى»
بارلىق باعدارلامادا تاجىريبەگە باسىمدىق بەرىلگەن. ستۋدەنتتەر وقۋ بارىسىندا سپورت فەدەراسيالارىندا، كلۋبتاردا، ينكليۋزيۆتى جانە وڭالتۋ ورتالىقتارىندا تاعىلىمدامادان ءوتىپ، ناقتى جاعدايلاردا كاسىبي داعدىلارىن جەتىلدىرەدى. وقۋ مودۋلدەرىنە سپورتتىق تالداۋ نەگىزدەرى، قۇقىقتىق دايىندىق، جەكەلەي جاتتىعۋ جۇيەسى، جاراقاتتىڭ الدىن الۋ، العاشقى كومەك جانە سپورت پسيحولوگياسى سياقتى پاندەر ەنگىزىلگەن.
مامانداردى دايارلاۋدىڭ جاڭا جۇيەسىندەگى ماڭىزدى جاڭالىقتىڭ ءبىرى – قازاقستاندا العاش رەت ىسكە قوسىلعان Executive MBA Sport Management حالىقارالىق قوس ديپلومدى باعدارلاماسى. ونى اكادەميا فرانسيانىڭ EKLORE-ed School of Management ۋنيۆەرسيتەتىمەن بىرلەسىپ ازىرلەگەن.
بۇل – ەلدەگى سپورت سالاسىنىڭ ماماندارى مەن باسشىلارىنا ارنالعان العاشقى باسقارۋ ماگيستراتۋراسى. باعدارلاما باسقارۋشىلىق ويلاۋ قابىلەتىن، حالىقارالىق ستاندارتتار مەن سپورت يندۋسترياسىنداعى ناقتى تاجىريبەلەردى بىرىكتىرەدى. سونىمەن قاتار شەتەلدە تاعىلىمدامادان ءوتۋ جانە ەۋروپالىق ديپلوم الۋ مۇمكىندىگىن قاراستىرادى.
مينيسترلىك سپورتتى دامىتۋدا عىلىمي نەگىزدەلگەن، تۇراقتى ءارى زاماناۋي مودەلدى ەنگىزۋ جۇمىستارىن جالعاستىرادى. بۇل رەتتە مامانداردى ساپالى دايارلاۋعا جانە ولاردىڭ كاسىبي جەتىستىكتەرىن قولداۋعا باسىمدىق بەرىلەدى.