الماتىداعى جاڭا جولايرىق جانسۇگىروۆ كوشەسى مەن سەيفۋللين داڭعىلىنىڭ وتكىزۋ قابىلەتىن 15-20%-عا ارتتىرادى.
الماتى اكىمى ەربولات دوسايەۆ جەتىسۋ اۋدانىنا جاساعان جۇمىس ساپارى بارىسىندا جانسۇگىروۆ كوشەسى مەن سەيفۋللين داڭعىلى قيىلىسىنداعى جولايرىقتىڭ قۇرىلىس بارىسىمەن تانىستى، دەپ حابارلايدى aqshamnews.kz
جوبانى جۇزەگە اسىرۋ 2017 جىلى باستالعانىمەن، 259 جەر تەلىمىن ساتىپ الۋ قاجەتتىلىگىنە بايلانىستى قۇرىلىس ۇزاققا سوزىلدى. سوڭعى جەر تەلىمى بيىل مامىر ايىندا بوساتىلدى.
جوبا اياسىندا سەيفۋللين داڭعىلىندا كولىكتەردىڭ ۇزدىكسىز قوزعالىسىن قامتاماسىز ەتۋ ءۇشىن جالپى ۇزىندىعى 690 مەتر بولاتىن ەكى توننەل سالۋ جوسپارلانعان. ال جانسۇگىروۆ كوشەسى بويىنشا كولىك قوزعالىسى جەر دەڭگەيىندە جۇزەگە اسادى. سونىمەن قاتار، 4 جەرۇستى جاياۋ جۇرگىنشىلەر وتكەلى، تروتۋارلار جانە ىرگەلەس اۋماقتى كوگالداندىرۋ قاراستىرىلعان.
قازىرگى ۋاقىتتا بارلىق بۇرىلىس جولداردا اسفالتبەتون جابىنى توسەلىپ، ءبىر جەرۇستى جاياۋ جۇرگىنشىلەر وتكەلى سالىندى، سونداي-اق كارىز جانە بايلانىس جەلىلەرىن قايتا قۇرۋ جۇمىستارى جۇرگىزىلۋدە.
سونىمەن قاتار، سەيفۋللين داڭعىلىنداعى «باتىس» جانە «شىعىس» توننەلدەرىنە اسفالتبەتون جابىن توسەۋ اياقتالدى. دەمالىس كۇندەرى وسى توننەلدەر ارقىلى قوزعالىس اشىلىپ، اۋا رايى قولايلى بولسا، ۋاقىتشا جول تاڭبالارىن سىزۋ جوسپارلانعان.
قالا اكىمى قۇرىلىس جۇمىستارىن جەدەلدەتىپ، اباتتاندىرۋ جۇمىستارىمەن بىرگە نىساندى كەلەسى جىلدىڭ ماۋسىم ايىنىڭ سوڭىنا دەيىن اياقتاۋدى تاپسىردى.
ايتا كەتەيىك، جولايرىق ىسكە قوسىلعاننان كەيىن جانسۇگىروۆ كوشەسىنىڭ وتكىزۋ قابىلەتى 15%-عا، ال سەيفۋللين داڭعىلىنىڭ وتكىزۋ قابىلەتى 20%-عا ارتاتىنى كۇتىلۋدە.
