الماتىدا «AMANAT» پارتياسىنىڭ اقف ايەلدەر قاناتى مەن قالالىق قوعامدىق كەڭەستىڭ ۇيىمداستىرۋىمەن ديالوگ الاڭى ءوتتى. شارانىڭ باستى تاقىرىبى – بۋللينگ پەن تۇرمىستىق زورلىق-زومبىلىققا ۇشىراعان بالالارعا كاسىبي پسيحولوگيالىق كومەك كورسەتۋ ماسەلەسى، دەپ حابارلايدى aqshamnews.kz
الاتاۋ جانە ناۋرىزباي اۋداندارىندا وتكەن جيىنعا قوعامنىڭ قاۋىپسىزدىگىن قامتاماسىز ەتۋ جانە بالالارعا قاجەتتى قولداۋ كورسەتۋ ماقساتىندا ماماندار، دەپۋتاتتار، قوعام قايراتكەرلەرى قاتىستى. مودەراتور رەتىندە الماتى قالاسى ءماسليحاتىنىڭ دەپۋتاتى ءارى بالالار قۇقىقتارى جونىندەگى ۋاكىل ديانا ەرلان بولدى. ول مەكتەپتەردە پەداگوگ-پسيحولوگتاردىڭ جەتىسپەۋشىلىگىن ايتىپ، كەلەسى جىلى 200 ماماندى قوسۋ جوسپارلانعانىن حابارلادى.
پسيحيكالىق ساۋىقتىرۋ ورتالىعىنىڭ ديرەكتورى ساپار قۇتتىباي ۇلى راحمەنشييەۆ سەنىم تەلەفونىنا تۇسەتىن قوڭىراۋلاردىڭ 18%-ىنىڭ سۋيسيدالدى ويلارعا قاتىستى ەكەنىن اتاپ ءوتتى. بۇل دەرەك كاسىبي پسيحولوگيالىق كومەكتىڭ قاجەتتىلىگىن كورسەتەدى. ديانا ەرلان بالالار اراسىنداعى سۋيسيد جاعدايلارىنىڭ ستاتيستيكاسىن ءبولىستى:
- 2021 جىلى – 13 اياقتالعان جاعداي، 33 ارەكەت؛
- 2022 جىلى – 14 اياقتالعان جاعداي، 17 ارەكەت؛
- 2023 جىلى – 9 اياقتالعان جاعداي، 35 ارەكەت؛
- 2024 جىلدىڭ العاشقى 9 ايىندا – 13 اياقتالعان جاعداي، 37 ارەكەت.
وز-وزىنە قول جۇمساۋ كورسەتكىشىنىڭ ءوسۋى بارلىق مۇددەلى تاراپتاردىڭ ۇيلەسىمدى جۇمىس ىستەۋ قاجەتتىلىگىن كورسەتەدى. كەزدەسۋ بارىسىندا اتا-انالار مەن مۇعالىمدەردىڭ بالالارداعى الاڭداۋشىلىق بەلگىلەرىن بايقاۋداعى رولىنە ەرەكشە نازار اۋدارىلدى. پسيحياتر وتباسىلىق قۇندىلىقتاردىڭ، بىرلەسىپ تۇسكى جانە كەشكى اس ءىشۋ داستۇرلەرىنىڭ جوعالىپ بارا جاتقانىن، سونىڭ اسەرىنەن ەرەسەكتەردىڭ بالالارداعى الاڭداۋشىلىق بەلگىلەرىن بايقامايتىنىن ايتتى. ول بالالاردىڭ ءومىردىڭ قيىندىقتارىن سەنىمدى تۇردە جەڭۋى ءۇشىن قولداۋ مەن ماقتاۋ قاجەتتىگىن اتاپ ءوتتى.
سونىمەن قاتار، مەكتەپ پسيحولوگتارىنا ءوز تاجىريبەلەرىندە كەزدەسەتىن قيىندىقتاردى تالقىلاۋعا مۇمكىندىك بەرىلىپ، ولارعا ماڭىزدى سۇراقتارىنا جاۋاپ الۋ مۇمكىندىگى ۇسىنىلدى.
