المالى اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ جولدارداعى قوزعالىستى رەتتەۋ بويىنشا جۇرگىزىلىپ جاتقان جۇمىستار تۋرالى ايتىپ بەردى، دەپ حابارلايدى aqshamnews.kz
«قالادا جولدارداعى قاۋىپسىزدىكتى ارتتىرۋ جانە ترافيكتى باسقارۋ بويىنشا جۇمىستار بەلسەندى جۇرگىزىلۋدە. بۇگىنگى تاڭدا بۇل فۋنكسيالار پوليسيا دەپارتامەنتىنە جۇكتەلگەن، ءبىراق ءىىم ترافيكتى باسقارۋ بويىنشا فۋكنسيالاردىڭ ءبىر بولىگىن قالا اكىمدىگىنە بەرۋدى ماقۇلدادى. سوندىقتان ءبىز قالادا بۇرىن-سوڭدى بولماعان جول قوزعالىسىن ۇيىمداستىرۋ ورتالىعىن قۇرۋدى جوسپارلاپ وتىرمىز. ءقازىر ءبىز وسى اۋقىمدى جوبانى جۇزەگە اسىرۋعا دايىندالىپ جاتىرمىز»، - دەدى ەربولات دوسايەۆ.
مەگاپوليس اكىمى بيىل باعدارشام نىساندارىن جاڭعىرتۋ جالعاساتىنىن اتاپ ءوتتى. بۇگىنگى تاڭدا قولدانىستاعى 591 باعدارشام وبەكتىسىنىڭ 93ء-ى ەۋروپالىق ەلەكتروندىق جابدىقتارمەن تولىقتىرىلعان، بۇل باعدارشام وبەكتىلەرىن ءاداپتيۆتى باسقارۋ جۇيەسىن ەنگىزۋگە مۇمكىندىك بەردى.
اعىمداعى جىلى قالعان 498 باعدارشام نىسانىن جاڭعىرتۋدى جالعاستىرۋ جوسپارلانۋدا. جۇمىستار اياقتالعاننان كەيىن باعىتتار بويىنشا ناقتى قوزعالىس قارقىندىلىعىن ەسكەرە وتىرىپ، ناقتى ۋاقىت رەجيمىندە قيىلىستارداعى جول قوزعالىسىن رەتتەۋ قامتاماسىز ەتىلەتىن بولادى. سونداي-اق، كولىك قوزعالىسىنىڭ ستاتيستيكاسىن ەسەپتەۋ، ءاداپتيۆتى رەجيمدەگى ۋاقىتتى كەرى ساناۋ تابلوسىنىڭ جۇمىسى، مامانداندىرىلعان كولىكتى باسىمدىقپەن وتكىزۋ قاراستىرىلعان.