الماتى قالاسىندا پوليسيا قىزمەتكەرلەرى جول قوزعالىسى ەرەجەلەرىن بىرنەشە رەت ورەسكەل بۇزعان Mercedes كولىگىنىڭ جۇرگىزۋشىسىن انىقتاپ، جاۋاپقا تارتتى.
پوليسيا دەپارتامەنتىنىڭ مالىمەتىنشە، قۇقىق بۇزۋشى اكىمشىلىك كودەكستىڭ جەتى بابى بويىنشا جاۋاپكەرشىلىككە تارتىلدى، دەپ حابارلايدى aqshamnews.kz.
— ول مانيەۆر جاساۋ ەرەجەلەرىن بۇزعان، كولىكتى جۇرگىزۋشى كۋالىگىنسىز باسقارعان، اپاتتى جاعداي تۋعىزعان، كولىك قۇرالدارىن پايدالانۋ ەرەجەلەرىن ساقتاماعان، كولىكتى باسقارۋ كەزىندە ۇيالى تەلەفون پايدالانعان جانە پيروتەحنيكالىق بۇيىمداردى زاڭسىز قولدانعان. بۇل ارەكەتتەردىڭ ناتيجەسىندە جالپى سوماسى 95 ايلىق ەسەپتىك كورسەتكىشتى (373 540 تەڭگە) قۇرايتىن ايىپپۇل سالىندى، – دەپ اتاپ ءوتتى الماتى قالالىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.
سونىمەن قاتار ءتارتىپ بۇزۋشى ۇساق بۇزاقىلىق جاساعانى ءۇشىن دە جاۋاپقا تارتىلدى. الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن ول 15 تاۋلىككە قاماۋعا الىندى. Mercedes كولىگى ارنايى ايىپپۇل تۇراعىنا قويىلدى.
الماتى پوليسياسى ازاماتتارعا جول ەرەجەلەرىن قاتاڭ ساقتاۋدى جانە ءاربىر جول قوزعالىسىنا قاتىسۋشىنىڭ جەكە جاۋاپكەرشىلىگىن كۇشەيتۋدى ەسكەرتەدى.