«جوعارى وقۋ ورنىنىڭ ۇزدىك وقىتۋشىسى – 2021» بايقاۋى جەڭىمپازدارىنىڭ ەسىمدەرى بەلگىلى بولدى
رەسپۋبليكالىق كونكۋرستىق كوميسسيا ءوز ءىسىنىڭ ۇزدىكتەرىن تاڭدادى. قازاقستاندىق 45 جوو-نىڭ 150 وقىتۋشىسى جەڭىمپاز اتاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ولاردىڭ ءارقايسىسى 2000 اەك كولەمىندە سىياقى الدى، بۇل شامامەن 6 ملن تەڭگە. ۇزدىك پەداگوگتەرگە ماراپاتتاردى اسحات ايماعامبەتوۆ تابىستادى.
«مەن بارلىق جەڭىمپازداردى قۇتتىقتايمىن! بۇل – ۇلكەن مارتەبە، ماڭىزدى اتاق. ۇستازداردىڭ قوعامدا التىن ورنى ەرەكشە. «ادامنىڭ ادامشىلىعى - جاقسى ۇستازدان»، - دەپ ۇلى اباي ايتقانداي، ادىلەتتى قوعام، مىقتى مەملەكەت بولۋ ءۇشىن جانە جاڭا قازاقستاندى قۇرۋدا ۇستازداردىڭ ورنى بولەك. مەملەكەت باسشىسى قاسىم- جومارت توقايەۆتىڭ تىكەلەي قولداۋىنىڭ ارقاسىندا ءبىلىم جانە عىلىم سالاسىندا ۇلكەن وڭ وزگەرىستەر بولىپ جاتىر. سونىڭ ىشىندە، اسىرەسە، پەداگوگتەردىڭ ستاتۋسىن كوتەرۋ بويىنشا كەشەندى شارالار ىسكە اسىرىلىپ جاتىر»،- دەدى اسحات ايماعامبەتوۆ.
كونكۋرسقا ەلىمىزدىڭ 76 جوعارى وقۋ ورنىنان بارلىعى 718 ۇمىتكەر قاتىستى. كونكۋرستا ەلەكتروندى وقۋ رەسۋرستارىن، وقۋ ماتەريالدارىن ازىرلەۋ جانە جاريالاۋ، وتاندىق جانە حالىقارالىق جۋرنالدارداعى عىلىمي جاريالانىمدار، ونەرتابىسقا پاتەنتتەردىڭ بولۋى جانە ت.ب. سياقتى كورسەتكىشتەر باعالاندى، سونداي-اق ۇمىتكەردىڭ وقىتۋ ساپاسى، ونىڭ باكالاۆرياتتا، ماگيستراتۋرادا جانە دوكتورانتۋرادا كادرلار دايارلاۋ قىزمەتىندەگى ەڭبەگى باعالاندى.
كونكۋرس جىل سايىن وقىتۋشىلاردىڭ بەدەلىن ارتتىرۋ جانە ولاردى ودان ءارى كاسىبي دامىتۋعا ىنتالاندىرۋ ماقساتىندا وتكىزىلەدى. ايتا كەتەيىك، كونكۋرس ق ر بعم اقپاراتتىق جۇيەسىنىڭ بازاسىندا ءوتتى، ونىڭ كومەگىمەن قاتىسۋشىلاردا بارلىق كەزەڭنىڭ اشىقتىعىن باقىلاۋعا مۇمكىندىك بولدى.
«جوعارى وقۋ ورنىنىڭ ۇزدىك وقىتۋشىسى – 2021» بايقاۋىنا قاتىسۋ ءۇشىن وتىنىمدەر مەن قۇجاتتار دا ەلەكتروندىق فورماتتا قابىلداندى. بۇل كونكۋرستى وتكىزۋدىڭ اشىقتىعىن قامتاماسىز ەتتى. سونداي-اق كوميسسيا قۇرامىندا ۇەۇ، ب ا ق، ستۋدەنتتىك جانە جاستار ۇيىمدارىنىڭ، جوو قاۋىمداستىقتارىنىڭ وكىلدەرى جانە ءبىلىم بەرۋ سالاسىنداعى ساراپشىلار بولدى.