ءبىزدىڭ الاتاۋ اۋدانى ارداگەرلەرىنىڭ باستى ماقساتى – مەكتەپ وقۋشىلارىمەن ءجيى كەزدەسىپ، بولاشاق تۋرالى كەلەلى اڭگىمە وتكىزىپ، جاس بۋىن مەن اعا بۋىن اراسىندا جاندى ديالوگ ورناتىپ، بىلگەنىمىزبەن ءبولىسۋ.
سونداي-اق، جىلدا قارتتار ايلىعىنا بەلسەنە قاتىسامىز. سونىڭ ناتيجەسى بولار، بارلىق سايىستا قالا بويىنشا ءبىزدىڭ اۋدان تەك الدىڭعى ورىننان كورىنىپ كەلەدى.
بىزدە 27 ىقشاماۋدان بار. ءار ىقشاماۋداننىڭ وكىلدەرى داستارحان جايىپ، ان-كۇي ۇيىمداستىرىپ، ارداگەرلەرىن قۇرمەتتەپ شاقىرىپ، تورىنە شىعارادى. وسىناۋ جۇمىستاردىڭ باسى-قاسىندا جۇرگەن – اۋداندىق اداگەرلەر كەڭەسىنىڭ ءتوراعاسى ساعاتتۋلا تاۋبالدى ۇلىنىڭ ورىنباسارى نۇرقاسىم توقمولدايەۆ. سونداي-اق، بارىنە قولداۋ كورسەتىپ، كومەك بەرەتىن، ماراپاتتايتىن اۋدان اكىمى ازامات قالدىبەكۇلىنا دا العىسىمىز شەكسىز.
ءبىزدىڭ ارداگەرلەر تۇركىستان، ارىستانباپ، سامارحان، بۇقاراعا بارىپ، زيارات ەتتى. 70–90 جاستاعى ارداگەرلەرىمىز «جاسىمىز كەلدى» دەپ قاراپ وتىرماي، امەريكاعا دا بارىپ، قازاقتىڭ كىم ەكەنىن، ءسالت-داستۇرىن پاش ەتىپ قايتتى. ولاردى سول اقش-تاعى قازاق ازاماتتارى ۇشاقتان كۇتىپ الىپ، قىزمەت كورسەتكەن. قازاقتىڭ قارتتارىن الاقاندارىنا سالىپ كۇتىپ، قىدىرتىپ، باتاسىن الىپ، شىعارىپ سالعان.
ءبىزدىڭ ارداگەرلەر كورشى، باۋىرلاس قىرعىز، وزبەك جەرىنە دە بارىپ قايتتى. ول جاقتا دا ونەرىمىزدى ورتاعا سالىپ، ءبارىمىز باۋىر-قانداس ەكەندىگىمىزدى ءبىلدىرىپ، ىقىلاس-نيەتىمىزدى تانىتىپ، وتە ريزا بولىپ ورالدىق. مەن سالاۋاتتى ءومىر سالتىن ۇستانعان، سەرگەك زامانداستارىمدى اركەز ماقتان تۇتامىن.