الماتى پوليسياسى جەزوكشەلەر ءۇيىن ۇستاعاندارعا قانداي جازا بار ەكەنىن ايتتى.
جەرگىلىكتى پوليسيا قىزمەتىنىڭ مالىمەتىنشە، بيىلعى جىلدىڭ باسىنان بەرى الماتىدا جەزوكشەلىكپەن اينالىسۋ ءۇشىن ءۇي-جاي بەرۋ نەمەسە جەڭگەتايلىق جاساۋدىڭ 76 دەرەگى انىقتالعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل باعىتتاعى كۇرەستىڭ تيىمدىلىگى جاقسى دەڭگەيدە، ويتكەنى انىقتالعان بارلىق 76 دەرەك بويىنشا قۇقىق بۇزۋشىلار اكىمشىلىك جاۋاپكەرشىلىككە تارتىلدى. اكىمشىلىك كودەكسكە سايكەس، جەزوكشەلىكپەن اينالىسۋ ءۇشىن ءۇي-جاي بەرگەن كاسىپكەرلىك سۋبەكتىلەرى، ق ر اقبتك-نىڭ 450-بابىنا سايكەس، اكىمشىلىك جاۋاپكەرشىلىككە تارتىلادى. بۇل جاعدايدا ولاردىڭ قىزمەتىن 3 ايعا دەيىن توقتاتا تۇرۋمەن قاتار، ايىپپۇل 100 اەك-دەن باستالىپ، 1000 اەك-گە دەيىن جەتەدى. ءبىر جىل ىشىندە قايتالاپ بۇزعان جاعدايدا، 3 ايعا قىزمەتىن توقتاتۋمەن قوسا، 150 اەك-دەن 2000 اەك-گە دەيىن ايىپپۇل سالىنادى جانە قۇقىقبۇزۋشىلىق ناتيجەسىندە الىنعان كىرىسى تاركىلەنەدى»، – دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باسشىسى ەرجان ۇزابايەۆ.
جەڭىل ءجۇرىستى قىزدار ق ر اقبتك-نىڭ 449-بابى بويىنشا جاۋاپقا تارتىلىپ، العاش رەت قۇقىق بۇزعانى ءۇشىن 5 اەك كولەمىندە ايىپپۇل سالىنادى، ەگەر ءبىر جىل ىشىندە قايتا بۇزسا، 5 تاۋلىككە دەيىن قامالادى جانە قوسىمشا ىشكى ىستەر ورگاندارىنا ەسەپكە الىنادى.