كادرلاردىڭ كاسىبي قۇزىرەتتىلىگىن دۇرىس قالىپتاستىرۋدى كوزدەيدى.
ءماجىلىستىڭ جالپى وتىرىسىندا «كاسىپتىك بىلىكتىلىك تۋرالى» زاڭ جوباسى مەن ىلەسپە قۇجات ءبىرىنشى وقىلىمدا ماقۇلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«زاڭ جوباسى مەملەكەت باسشىسىنىڭ 2021 جىلعى 1 قىركۇيەكتەگى جولداۋىندا بەرگەن تاپسىرماسىن ورىنداۋ باعىتىندا ازىرلەندى. بۇل قۇجات ۇلتتىق بىلىكتىلىك جۇيەسىن قالىپتاستىرۋ جانە دامىتۋ كەزىندەگى قوعامدىق قاتىناستاردى رەتتەۋگە باعىتتالعان. ۇلتتىق بىلىكتىلىك جۇيەسى ەكونوميكالىق ىنتىماقتاستىق جانە دامۋ ۇيىمى ەلدەرىنىڭ كوپشىلىگىندە مەملەكەتتىك ساياساتتىڭ اجىراماس بولىگى بولىپ سانالادى. بۇل جۇيەنى ولار ەڭبەك ءارى جۇمىسپەن قامتۋ نارىعىن ۇزاق مەرزىمدى دامىتۋ ىسىندە قولدانادى»، - دەدى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا.
وسى ورايدا ول زاڭ جوباسىندا ۇلتتىق بىلىكتىلىك جۇيەسىنىڭ مىندەتتەرى ايقىندالعانىن اتاپ ءوتتى.
«بىرىنشىدەن، قولدانىستاعى جانە الداعى ۋاقىتتا قاجەت بولاتىن كاسىپتەر مەن كاسىپتىك بىلىكتىلىكتەردى رەتتەپ، ءبىرىڭعاي جۇيەگە كەلتىرۋ ەسكەرىلگەن. قازىرگى كەزدە جوعارى وقۋ ورنىن بىتىرگەندەر باكالاۆر، ماگيستر نەمەسە دوكتور دارەجەسىن الادى. سوعان سايكەس ولار قىزمەت پەن جالاقى الۋى ءتيىس. ال ءىس جۇزىندە كوبىنە ءبىلىم دارەجەسى ەسكەرىلمەي، ولار جوعارى، ءبىرىنشى ءارى ەكىنشى كاتەگوريالى نەمەسە كاتەگورياسى جوق ماماندار رەتىندە قابىلدانىپ، سوعان سايكەس ەڭبەك قىزمەتى بەلگىلەنەدى. سوندىقتان قۇجاتتا قارالىپ وتىرعان نەگىزگى ماسەلە - جۇيەدە ءبىرىڭعايلىقتى جانە بىرىزدىلىكتى قالىپتاستىرۋ. ەكىنشى مىندەت - كاسىپتەر مەن كاسىپتىلىك بىلىكتىلىكتەردى رەتتەۋ اياسىندا ەڭبەك نارىعىندا سۇرانىسى بار كادرلاردىڭ كاسىبي قۇزىرەتتىلىگىن دۇرىس قالىپتاستىرۋ»، - دەدى مينيستر.
زاڭ جوباسىندا ۇلتتىق بىلىكتىلىك جۇيەسىنىڭ تولىق ارحيتەكتۋراسى، ياعني ونىڭ نەگىزىن قۇرايتىن 6 بازالىق كومپونەنتى ۇسىنىلدى. بىرىنشىسىندە ۇلتتىق جانە سالالىق بىلىكتىلىك قامتىلعان. وندا اياقتالماعان ورتا بىلىمنەن باستاپ PhD دارەجەسىنە دەيىنگى ازاماتتارعا قاجەت بولاتىن 8 كاسىبي ءبىلىم دەڭگەيى ايقىندالعان جانە وسى دەڭگەيگە تۋرا كەلەتىن بىلىكتىلىكتىڭ، ماشىقتاردىڭ تالاپ-سيپاتتاماسى كورسەتىلگەن. ەكىنشىسى – قىزمەتتەردىڭ ۇلتتىق كلاسسيفيكاتورى. بۇل - ەلىمىزدىڭ اۋماعىندا اتقارىلاتىن قىزمەتتەردىڭ اتاۋىن، ازاماتتاردىڭ وندا اتقاراتىن جۇمىس ءتۇرىن، ماماندىعىن جىكتەيتىن قۇجات. ءۇشىنشىسى – قازىرگى تاڭدا ەڭبەك نارىعىندا بار جانە بولاشاقتا سۇرانىس بولاتىن كاسىپتەردىڭ ءتىزىمى. ءتورتىنشىسى – كاسىبي ستاندارتتار نەمەسە جۇمىس بەرۋشىلەردىڭ كاسىبي بىلىكتىلىكتى ايقىندايتىن تالاپتارى. بەسىنشىسى – ءبىلىم بەرۋ باعدارلامالارى. التىنشىسى – كاسىبي بىلىكتىلىكتى راستايتىن سەرتيفيكات.
«كادرلارعا تالاپ جۇمىس بەرۋشىلەر تاراپىنان بولعاندىقتان، ولاردىڭ اتقاراتىن مىندەتتەرىن دە زاڭ جوباسىندا تولىق قاراستىردىق. بىرىنشىدەن، جۇمىس بەرۋشىلەر قازىرگى تاڭدا جانە ۇزاق مەرزىمدى بولاشاقتا سۇرانىسى بار كاسىپتەردىڭ ءتىزىمىن ايقىندايدى. ەكىنشىدەن، جۇمىس بەرۋشىلەر ۇسىنعان كاسىپتەر تىزبەسى وڭىرلىك جانە سالالىق كەڭەستەردە ودان ءارى تولىقتىرىلىپ، جيناقتالادى. سودان سالالىق كاسىپتەر ءتىزىمى جاسالادى. ۇشىنشىدەن، سالالىق كاسىپتەر ءتىزىمى ءوز كەزەگىندە مەملەكەت رەتتەيتىن جانە ول رەتتەمەيتىن كاسىپتەر بولىپ بولىنەتىن بولادى»، - دەدى تامارا دۇيسەنوۆا.
مەملەكەت رەتتەيتىن كاسىپتەر بويىنشا جۇمىسكەرلەردى سەرتيفيكاتتاۋ مىندەتتەلەدى. بۇل ساناتقا نەگىزىنەن ازاماتتاردىڭ دەنساۋلىعى مەن قاۋىپسىزدىگىن قامتاماسىز ەتۋگە بايلانىستى ماماندىقتار جاتادى. مەملەكەت جاعىنان رەتتەلمەيتىن كاسىپتەر ءۇشىن سەرتيفيكاتتاۋ ەرىكتى بولادى.
«ارىپتەستىكتىڭ ەكىنشى جاعى – كاسىپتىك ءبىلىم بەرۋ جۇيەسى. ءبىلىم بەرۋ ۇيىمدارى جۇمىس بەرۋشىلەردىڭ تالاپتارىن ەسكەرە وتىرىپ، الدىمەن ماماندىقتار مەن قىزمەتتەردىڭ كلاسسيفيكاتورىن جاسايدى. ودان كەيىن جۇمىس بەرۋشىلەردىڭ كاسىپتىك ستاندارتتارى نەگىزىندە ءبىلىم بەرۋ باعدارلامالارىن دايىندايدى»، - دەدى ۆەدومستيۆو باسشىسى.
جۇمىس بەرۋشىلەر مەن كاسىپتىك ءبىلىم بەرۋ جۇيەسى ارىپتەستىگىنىڭ ناتيجەسىن تاۋەلسىز باعالاۋ نەمەسە سەرتيفيكاتتاۋ جۇيەسىن ەنگىزۋ ارقىلى انىقتالاتىن بولادى.
«بۇل جۇمىستى ارنايى سەرتيفيكاتتاۋ ورتالىقتارى جۇزەگە اسىراتىن بولادى. ولار ۇلتتىق كاسىپكەرلەر پالاتاسىنىڭ نەمەسە باسقا ۋاكىلەتتى ينستيتۋتتاردىڭ اككرەديتاسياسىنان وتكەن تاۋەلسىز زاڭدى تۇلعالار. سەرتيفيكاتتاۋ ورتالىقتارىن اككرەديتاسيالاۋدىڭ ءوزى «اككرەديتاسيالاۋ تۋرالى» زاڭعا جانە ەڭبەك جونىندەگى ۋاكىلەتتى ورگان بەكىتكەن ەرەجەلەرگە سايكەس قاتاڭ تۇردە جۇرگىزىلەتىن بولادى»، - دەدى مينيستر.
سەرتيفيكاتتاۋ پروسەسى تەك ازاماتتاردىڭ بىلىكتىلىگى كاسىپتىك ستاندارتتارعا قانشالىقتى سايكەس كەلەتىنىن انىقتاۋ عانا ەمەس، سونىمەن بىرگە ءبىلىم بەرۋ ۇيىمدارىندا كادر دايارلاۋ دەڭگەيىن باعالاۋعا باعىتتالادى. تاۋەلسىز باعالاۋدان وتكەن ازاماتتارعا سەرتيفيكاتتار بەرىلەدى.
«بۇل رەتتە ديپلومدار مەن سەرتيفيكاتتار تۋرالى ارنايى تۇسىندىرە كەتكىم كەلەدى. تاۋەلسىز باعالاۋمەن قامتىلعان تۇلەكتەردىڭ قولىندا ناقتى ماماندىعى بويىنشا كاسىپتىك دايارلىقتان وتكەنىن راستايتىن ديپلوم جانە العان بىلىمدەرىن ءىس جۇزىندە قولدانۋعا ۇيرەنگەنىن راستايتىن سەرتيفيكات بولادى. ءبىر سوزبەن ايتقاندا، سەرتيفيكاتى بار تۇلەكتەردى جۇمىس بەرۋشىلەر جۇمىس ءوتىلىن تالاپ ەتپەي-اق جۇمىسقا الۋعا مۇمكىندىك اشىلادى. سونداي-اق ەرىكتى سەرتيفيكاتتاۋدان ءارتۇرلى ۇيىرمەلەر، ترەنينگتەر نەمەسە ءوز بەتىنشە وقۋ ارقىلى جۇمىسشى ماماندىعىن يگەرگەن ادامدار دا وتە الادى. بۇل جاعدايدا سەرتيفيكات جۇمىسشى ماماندىقتارى بويىنشا جۇمىسقا قابىلداۋ كەزىندە نەگىزگى قۇجات بولا الادى»، - دەدى تامارا دۇيسەنوۆا.
سەرتيفيكاتتاۋ اقىلى نەگىزدە جۇزەگە اسىرىلادى. سەرتيفيكاتتاۋ ورتالىقتارى قىزمەتتەرىنىڭ اقىسىن جۇمىسسىز ازاماتتار ءۇشىن اتاۋلى ۆاۋچەرلەردى پايدالانا وتىرىپ مەملەكەت تولەيدى. ال، ءوز قىزمەتكەرلەرىن سەرتيفيكاتتاۋعا جىبەرگەن كەزدە، ونىڭ اقىسىن جۇمىس بەرۋشىلەر تولەيدى.