وقۋ ماتەريالدارىن سيفرلى فورماتقا كوشىرۋ ارقىلى پاندەردى وقىتۋدىڭ يننوۆاسيالىق تاسىلدەرى ەنگىزىلەدى.
بۇل تۋرالى ۇكىمەت وتىرىسىندا وقۋ-اعارتۋ ءمينيسترى اسحات ايماعامبەتوۆ ايتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
مەملەكەت باسشىسىنىڭ سايلاۋالدى باعدارلاماسىندا بالالاردىڭ ءال-اۋقاتى مەن ءبىلىم ماسەلەلەرىنە ەرەكشە نازار اۋدارىلعان.
«وقۋشىلار ءۇشىن 50 ساۋىقتىرۋ لاگەرى قۇرىلادى. ولاردىڭ ادىستەمەلىك جانە مازمۇندىق جاعى دا قاراستىرىلادى. بالالاردى ۇيىرمەلەرمەن جانە سەكسيالارمەن قامتاماسىز ەتۋ ءۇشىن بۇرىن-سوڭدى بولماعان شارالار كوزدەلگەن. كەمىندە 100 جاڭا ءىرى نىسان، ياعني وقۋشىلار سارايلارىن، جاس تەحنيكتەر ستانسالارىن، بالالار تەحنوپاركتەرىن، مۋزىكا جانە ونەر مەكتەپتەرىن سالۋ جوسپارلانىپ وتىر. بۇل مەكتەپتەن تىس ۇيىمداردىڭ بالالاردىڭ تۇراتىن جەرىنەن قادامدىق قولجەتىمدىلىگىن قامتاماسىز ەتەدى»، - دەدى مينيستر.
سونىمەن قوسا، ءمينيستردىڭ ايتۋىنشا، ورتا ءبىلىم بويىنشا قاجەتتى وقۋ ماتەريالدارىن سيفرلى فورماتقا كوشىرۋ ارقىلى پاندەردى وقىتۋدىڭ يننوۆاسيالىق تاسىلدەرى ەنگىزىلەدى. ەكولوگيالىق ءبىلىم بەرۋ ساپاسىن ارتتىرۋ تاسىلدەرىن قايتا قاراۋ جوسپاردا بار.