الداعى ۋاقىتتا قالادا جەتكىزۋ قىزمەتىن ادامدار ەمەس، ۇشقىشسىز ۇشۋ قۇرىلعىلارى (دروندار) جۇزەگە اسىرۋى ىقتيمال. مۇنداي جاڭاشىل يدەيانى كاسىپكەر سانا بيزنەس فورۋمىندا ءبولىستى.
الماتىدا ءوتىپ جاتقان فورۋمدا ءتۇرلى سالادا تابىسقا جەتكەن كاسىپكەرلەر ءوز تاجىريبەلەرى مەن جاڭا يدەيالارىن ورتاعا سالدى. سولاردىڭ قاتارىندا وتاندىق لوگيستيكا جانە ستراتەگيالىق مەنەدجمەنت سالاسىنىڭ كوشباسشىلارىنىڭ ءبىرى بولاتبەك دالەلحان ۇلى بولدى. ول Golden Bridge Partners جانە Jana Post كومپانيالارىنىڭ نەگىزىن قالاۋشى رەتىندە تانىمال.
ب. دالەلحان ۇلى فورۋم بارىسىندا شاعىن كاسىپتەن ءىرى تابىستى كومپانيا قۇرۋ جولىنداعى تاجىريبەسىمەن ءبولىسىپ، بولاشاققا باعىتتالعان جاڭا يدەيالارىن تانىستىردى. ونىڭ ايتۋىنشا، سەرىكتەسىمەن بىرگە جەتكىزۋ قىزمەتىن جۇزەگە اسىراتىن دروندارعا ينۆەستيسيا سالۋدا.
كاسىپكەردىڭ بۇل يدەياسى جۇزەگە اساتىن بولسا، الماتى قالاسىندا جەتكىزۋ قىزمەتىن كۋرەرلەر ەمەس، ارنايى جاسالعان دروندار اتقارادى. وتاندىق كاسىپكەرلەردىڭ مۇنداي جاڭاشىل يدەيالارى سانا بيزنەس فورۋمىندا تالقىلانۋدا.