الماتىدا ەپيلەپسيا دياگنوزى قويىلعان جەتى ايلىق بالاعا وپەراسيا №2 اۋرۋحانادا نەمىس حيرۋرگى ۋلريح تومالەنىڭ قاتىسۋىمەن جاسالدى. بۇل – وتاندىق مەديسيناداعى جوعارى ناتيجە.
اناسى بالاسىنىڭ دەنساۋلىعىنداعى كىنارات تۋعاننان بار ەكەنىن بايقاعان. باسىندا دارىگەرلەر "مۇنداي جاعداي بارلىعىندا بولادى" دەپ سابىرعا شاقىرعان كورىنەدى. اناسىنىڭ ايتۋىنشا، بالانىڭ ءبىر كۇندە 50 رەت ۇستاماسى ۇستاعان كەزدەرى بولىپتى.
"بۇل 7 ايعا جالعاستى. ءسابيدىڭ مۇنداي ءحالىن كورۋ اۋىر. سوندىقتان ءوزىمدى قولعا الىپ، وعان وتا جاساتۋعا بەل بۋدىم. دارىگەرلەر الىپ كەتىپ بارا جاتقاندا دا قورقىپ، قاسىندا وتىرۋدى سۇرادىم. جانساقتاۋ بولىمىنەن شىعارعاندا، كوز ىلمەي قاراپ وتىردىم. ءقازىر دەنساۋلىعى جاقسى"، – دەدى بالانىڭ اناسى ايگەرىم ەگەۋباي.
№2 قالالىق كلينيكالىق اۋرۋحانانىڭ نەيروحيرۋرگ دارىگەرى ازامات جايىلعانوۆ جەتى ايلىق نارەستە وتا جاساعان ەڭ جاس ناۋقاسى ەكەنىن ايتتى.
"شەتەلدىك بىلىكتى دارىگەردىڭ شەبەرلىك ساعاتىنان كەيىن اۋرۋحانادا 4 ادامعا وپەراسيا جاسالدى. بارلىعى ءساتتى اياقتالدى. ەم-دومنان كەيىن ولاردان ەپيلەپسيادان بولاتىن ۇستاما انىقتالمادى"، – دەيدى دارىگەر.