سولتۇستىك قازاقستان وبلىسىنداعى شوشقا كەشەنىندە مەرت بولعان ءتورت جۇمىسشى گازدان ۋلانۋى مۇمكىن. ساراپتامالار تاعايىندالدى.
سقو پوليسيا دەپارتامەنتى باسپا ءسوز قىزمەتىنىڭ مالىمەتىنشە، 1 تامىز كۇنگى ساعات 23:25-تە سقو تايىنشا اۋدانىنىڭ پوليسيا بولىمىنە نوۆويۆانوۆكا اۋىلىندا ورنالاسقان شوشقا ءوسىرۋ كەشەنىندەگى جۇمىس ورنىنان اۋىسىم اياقتالعان سوڭ ءتورت جۇمىسشى شىقپاعاندىعى تۋرالى حابار تۇسكەن.
ىزدەستىرۋ شارالارى بارىسىندا ولاردىڭ دەنەلەرى وسى كەشەندەگى كارىز قۇدىعىنىڭ تۇبىنەن تابىلدى. الدىن الا انىقتالعانداي، 1966، 1991، 1995 جانە 2000 جىلدارى تۋعان جۇمىسشىلار كارىز قۇدىعىن تازالاۋ كەزىندە يىستەن ۋلانعان. ولاردىڭ دەنەلەرى سوت-مەديسينالىق ساراپتاماعا جىبەرىلدى.
اتالعان فاكتى «ەڭبەكتi قورعاۋ قاعيدالارىن بۇزۋ» بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىنە تىركەلدى. ساراپتامالار تاعايىندالدى.
ءىستىڭ بارلىق ءمان-جايىن زەردەلەۋگە باعىتتالعان تەرگەۋ ارەكەتتەرى جۇرگىزىلۋدە، ولاردىڭ ناتيجەلەرى بويىنشا تۇپكىلىكتى پروسەستىك شەشىم قابىلداناتىن بولادى.