زاۋىتتى شەتەلدىك ينۆەستورلار سالادى. مەگاپوليستىڭ نەگىزگى شەتەلدىك ينۆەستورلارى – تمد ەلدەرى، تاياۋ شىعىس، اقش، تۇركيا جانە يزرايل.
بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە قالالىق كاسىپكەرلىك جانە ينۆەستيسيالار باسقارماسىنىڭ باسشىسى بەرىك سولتانبايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ ايتۋىنشا، شەتەلدىك ينۆەستورلاردىڭ ءبىرى الماتى يندۋستريالىق ايماعىندا جەلاتين شىعاراتىن زاۋىت سالادى.
«وسى ماقساتتا Iskefe تۇرىك حولدينگىنە 4،5 گەكتار جەر تەلىمى ءبولىندى. كومپانيا زاۋىت قۇرىلىسىنا 9،8 ملرد تەڭگە سالىپ، 100-دەن استام تۇراقتى جۇمىس ورنىن اشۋدى جوسپارلاپ وتىر. زاۋىتتىڭ وندىرىستىك قۋاتى 7 مىڭ توننادان استام جەلاتين شىعارۋعا مۇمكىندىك بەرەدى»، - دەدى ول.
تاعى ءبىر ينۆەستجوبا – مەديسينالىق ورتالىقتىڭ قۇرىلىسى.
«International Business Group» ج ش س باستاماسىمەن جانە 150 جۇمىس ورنىن قۇرۋمەن باستالدى. جوبا قۇنى – 2 ملرد تەڭگە. سونداي-اق، ءىرى ينۆەستور قاراجاتى ەسەبىنەن الماتى حالىقارالىق اۋەجايىنىڭ جاڭا تەرمينالى سالىنىپ جاتىر. «جاڭا تەرمينال اۋەجايدىڭ وتكىزۋ قۋاتىن جىلىنا قازىرگى 2،5 ميلليون جولاۋشىدان 14 ميلليونعا دەيىن ارتتىرۋعا مۇمكىندىك بەرەدى. جوبانىڭ جالپى قۇنى – 90 ملرد تەڭگە. ىسكە اسىرۋ مەرزىمى 2024 جىلعا جوسپارلانعان»، - دەيدى بەرىك سولتانبايەۆ.
جالپى، بيىلعى ءبىرىنشى توقساندا الماتىعا قۇيىلعان شەتەلدىك ينۆەستيسيالار اعىنى 1،6 ملرد اقش دوللارىنا جەتتى، بۇل وتكەن جىلمەن سالىستىرعاندا 40،4%-عا كوپ.
«بيىل 2،1 ملرد تەڭگە سوماسىنا ەكى شەتەلدىك جوبا ىسكە اسىرىلدى. ولاردىڭ ىشىندە تەحنولوگيالىق ۇدەرىستەردى باسقارۋدىڭ اۆتوماتتاندىرىلعان جۇيەلەرى مەن اۆارياعا قارسى قورعاۋ جۇيەلەرى شكافتارىن شىعارۋ بويىنشا يننوۆاسيالىق ءوندىرىس بار. جوبانى Fortune 500 تىزىمىنە كىرەتىن، ەلەكتروندىق باسقارۋ جانە اۆتوماتتاندىرۋ جۇيەلەرى نارىعىنداعى الەمدىك كوشباسشىلاردىڭ ءبىرى امەريكاندىق Honeywell كورپوراسياسى جۇزەگە اسىرادى»، - دەدى سپيكەر.