قازاقستان رەسپۋبليكاسى مەملەكەتتىك ورتالىق مۋزەيىندە 2023 جىلدىڭ 31 قاڭتارى كۇنى ساعات 15:00 دە قازاقتىڭ كورنەكتى جازۋشىسى، دراماتۋرگ، مەملەكەتتىك سىيلىقتىڭ لاۋرەاتى باققوجا مۇقايدىڭ 75 جىلدىعىنا ارنالعان ەسكە الۋ كەشى وتەدى، دەپ حابارلايدى Almaty-akshamy.kz.
مۇقاي باققوجا 1948 جىلدىڭ 31 قاڭتارىندا الماتى وبلىسى، رايىمبەك اۋدانى، نارىنقول اۋىلىندا دۇنيەگە كەلگەن.
1971 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن ءتامامداپ، 1975 جىلى رايىمبەك اۋداندىق «كوممۋنيزم نۇرى» (قازىرگى «ءحانتاڭىرى») گازەتىندە ەڭبەك جولىن باستاعان. 1970-1988 جج. «ءبىلىم جانە ەڭبەك»، «جۇلدىز» جۋرنالدارىندا، قازاقستان جازۋشىلار وداعىندا قىزمەت ىستەگەن. 1990-1995 جج. مادەنيەت مينيسترلىگىنىڭ رەپەرتۋارلىق رەداكسيالىق القاسىندا باس رەداكتور، باسقارما باستىعى بولعان. 1990 جىلى وبلىستىق «قازاق ءتىلى» قوعامىن ۇيىمداستىرىپ، باسشىلىق جاسادى. قازاقستان رەسپۋبليكاسىنىڭ يۋنەسكو ىستەرى جونىندەگى ۇلتتىق كوميسسياسىنىڭ مۇشەسى. بىرنەشە مەدالدارمەن ماراپاتتالعان. «پاراسات» جۋرنالىنىڭ باس رەداكتورى بولىپ قىزمەت اتقارعان.
باققوجا مۇقاي العاشقى تۋىندىلارىن 17-18 جاسىندا جاريالاعان. ءتاڭىرى كەۋدەسىنە ايرىقشا شىعارماشىلىق قۋات پەن تانىم بەرگەن جازۋشى ءوز تالانتىن بابىندا ۇستاپ، ۇنەمى تاربيەلەپ، ۇزدىك تۋىندىلار ۇسىنىپ وتىرعان. ول «جالعىز جاياۋ»، «ءومىرزايا» اتتى روماندارى مەن «جاڭبىر جاۋىپ تۇر»، «ءومىر ارناسى»، «اققۋ سازى»، «مازاسىز ماۋسىم»، «دۇنيە كەزەك»، «تويات ءتۇنى»، «جەتى جەلى»، «العاشقى ماحاببات»، «ەرتەگىدەي ەرتەڭىم» كىتاپتارىنىڭ اۆتورى. شىعارمالارى تاجىك، قىرعىز، بەلورۋس، ياكۋت، تاتار، باشقۇرت، چەح، ورىس، وزبەك، قاراقالپاق، تۇرىكمەن، كورەي تىلدەرىنە اۋدارىلعان. ورىس تىلىندە 1984 جىلى «ۆودوۆوروت»، 1988 جىلى «بەلايا پتيسا» كىتاپتارى شىققان. وننان استام درامالىق شىعارمالارى قازاقستانداعى جانە شەت ەلدەردەگى تەاترلاردا قويىلعان. ءبىرقاتار جازۋشىلاردىڭ شىعارمالارىن قازاق تىلىنە اۋدارعان. «قوش بول، مەنىڭ ەرتەگىم» پەساسى مەن «اققۋ سازى» حيكايالار كىتابى ءۇشىن قازاقستان لەنين كومسومولى سىيلىعىنىڭ لاۋرەاتى اتاعى، قىرعىزستان رەسپۋبليكاسىنىڭ ت.ءابدىمومىنوۆ اتىنداعى ادەبي سىيلىعى، «ءومىرزايا» رومانى ءۇشىن قازاقستان رەسپۋبليكاسىنىڭ مەملەكەتتىك سىيلىعى بەرىلىپ، «پاراسات» وردەنىنىڭ يەگەرى اتانعان.