الماتىلىق وقۋشى ءبىر كۇننىڭ ىشىندە تانىمال بوپ شىعا كەلدى

4ء-شى سىنىپ وقۋشىسى قالادا وتكەن ءىس-شارالاردىڭ بىرىندە «ۇستازىم» ءانىن ورىنداعان انشىگە ورتا جولدان قوسىلىپ، جۇرتتىڭ نازارىن وزىنە اۋداردى.

بەينەجازبانى الەۋمەتتىك جەلىدە ءبىر تاۋلىكتە 3 ميلليون ادام قاراپ، 10 جاستاعى ءبۇلدىرشىننىڭ ەرەكشە داۋىسىنا سۇيسىنگەن، دەپ حابارلايدى Almaty-akshamy.kz 24.kz-كە سىلتەمە جاساپ. 

ايبار ءدال وسى باينەجازبا ارقىلى تانىمال بولامىن دەپ ويلاماعانى انىق. الايدا سۇيكىمدى ءبۇلدىرشىننىڭ بەلگىلى ءاندى كاسىبي ماقاممەن ورىنداۋى كوپشىلىكتى بەيجاي قالدىرمادى. وسىنشا ىقىلاسقا ايباردىڭ ءوزى دە اڭ-تاڭ.

"وتە كۇشتى سەزىمدەمىن. سەبەبى مەنىڭ قاسىمدا ءانشى تۇرادى. ول ءانشى وتە تانىمال. مەن فۋتبولعا قاتتى قۇمارمىن. ماتەماتيكادان وليمپياداعا قاتىسقاندا ءبىرىنشى ورىن الىپ كەلدىم. بولاشاقتا ءان ايتاتىن فۋتبوليست نەمەسە فۋتبول وينايتىن ءانشى بولامىن"، - دەيدى №201 مەكتەپ-گيمنازيانىڭ 4-سىنىپ وقۋشىسى ايبار ءابدىاميت.

ايبار - جان-جاقتى بالا. ماتەماتيكا ءپانىن جان-تانىمەن جاقسى كورەدى. فۋتبول دەسە، ىشكەن اسىن جەرگە قويادى. مەكتەپتە اكتەرلىك شەبەرلىك ۇيىرمەسىنە قاتىسادى. وتباسىنداعى ءتورت بالانىڭ ەكىنشىسى. 

ايباردىڭ تانىمال بولۋىنا سەبەپكەر بولعان ءانشى سامات جانعازين: «ونىڭ بولاشاعىنا زور ءۇمىت ارتامىن»، - دەيدى. داۋسىمەن جۇمىس ىستەپ، كونكۋرستىق اندەرگە بەيىمدەۋ كەرەكتىگىن ايتادى.

"بۇلاق كورسەڭ، كوزىن اش" دەيدى عوي قازاق. تالانتتى تالانت دەپ ايتۋ كەرەك. داۋسى زور. «ۇستازىم» ءانىن ايتقان كەزدە، داۋسى جوعارىعا قاراي كەتىپ جاتىر عوي. ديماش اعاسىنىڭ جولىن بەرسىن!" - دەيدى ءانشى سامات جانعازين. 

سامات جانعازين ايبارمەن بىرگە دۋەت جازۋدى جوسپارلاپ وتىر. سوندىقتان، ءبىر كۇندە-اق كوپتىڭ كوزقۋانىشىنا اينالعان ايباردى ۇلكەن ساحنادان كورەتىن كۇن الىس ەمەس.