جوبا جىل بويى جۇمىس ىستەيدى.
قالاداعى 16 مەكتەپتە كوكونىستەر مەن جەمىستەر وسىرۋگە ارنالعان جىلىجايلار پايدا بولادى. «كوك قارلىعاشتاردىڭ» ءبىرى بۇگىن جەتىسۋ اۋدانىنداعى № 177 مەكتەبىندە اشىلدى، دەپ حابارلايدى Almaty-akshamy.kz.
«جاسىل مەكتەپ» ءبىلىم بەرۋ ەكولوگيالىق جوباسىن بولات وتەمۇراتوۆتىڭ قورى قالا اكىمدىگىمەن بىرگە جۇزەگە اسىرىپ جاتىر. جىلىجايلارداعى ساباقتار مەكتەپ باعدارلاماسىن پراكتيكالىق جاتتىعۋلارمەن تولىقتىرادى جانە بالالاردى تابيعاتتى قۇرمەتتەۋگە ۇيرەتەدى. جاڭا وقۋ جىلىندا وسى باستاما بويىنشا 5-7 سىنىپ وقۋشىلارى ءۇشىن فاكۋلتاتيۆتىك ساباقتار وتكىزىلەدى.
«جاسىل تەحنولوگيالار مەن ەكولوگيالىق ويلاۋ - بۇل ءبىزدىڭ كۇندەلىكتى ءومىرىمىزدىڭ اجىراماس بولىگىنە اينالاتىن الەمدىك تەندەنسيا. سوندىقتان بالالاردى ەكولوگيالىق مادەنيەتكە تاربيەلەۋ جانە قورشاعان ورتانى قۇرمەتتەۋ ەرتە جاستان باستاپ وتە ماڭىزدى»، - دەيدى بولات وتەمۇراتوۆ قورىنىڭ ديرەكتورى مارات ايتماعامبەتوۆ.
ول جوباعا وسىمدىك شارۋاشىلىعى، اگرونوميا سالاسىنداعى ەڭ جاقسى ماماندار، سونداي-اق الماتى وبلىسىنىڭ فەرمەرلەرى تارتىلاتىنىن، ولار مەكتەپ وقۋشىلارى مەن مۇعالىمدەرگە ءوز تاجىريبەلەرىمەن بولىسەتىندىگىن اتاپ ءوتتى.
بارلىق جىلىجايلار زاماناۋي تامشىلاتىپ سۋارۋ، جىلىتۋ جانە جارىقتاندىرۋ جۇيەلەرىمەن جابدىقتالعان. جوبا جىل بويىنا جۇمىس ىستەيدى. جازدىڭ سوڭىنا دەيىن وسىنداي جىلىجايلار قالانىڭ بارلىق اۋداندارىنداعى تاعى 15 مەكتەپتە اشىلادى. سودان كەيىن جوباعا شىمكەنت پەن نۇر-سۇلتان قالالارى قوسىلادى.