الماتىدا وسىمدىكتەردى بيولوگيالىق قورعاۋدىڭ جاڭا ءادىسى قولدانىلادى
مەگاپوليستىڭ تۇراقتى دامۋى مەن ەكولوگيالىق تەپە-تەڭدىكتى ساقتاۋ ماقساتىندا 2025 جىلى الماتىدا وسىمدىكتەردى ماۋسىمدىق وڭدەۋ باعدارلاماسى باستالدى. بۇل باعدارلاما اياسىندا جاسىل جەلەكتەردى بيولوگيالىق قورعاۋ قۇرالدارى پايدالانىلادى، دەپ حابارلايدى aqshamnews.kz
قالاداعى اعاشتار مەن بۇتالارعا كۇتىم جاساۋدىڭ جاڭا ستراتەگياسى زاماناۋي بيوفۋنگيسيدتەردى، بيواكاريسيدتەر مەن باكتەريالىق پرەپاراتتاردى، سونداي-اق، ميكروتىڭايتقىشتاردى قولدانۋدى كوزدەيدى. مۇنداي ءتاسىل قورشاعان ورتاعا تۇسەتىن حيميالىق جۇكتەمەنى ازايتىپ، تابيعي بيوارتۇرلىلىكتى ساقتاۋعا مۇمكىندىك بەرەدى.
«ءبىز ءداستۇرلى جانە بيولوگيالىق ادىستەردىڭ تەڭگەرىمدى ۇيلەسىمىنە باسا نازار اۋدارامىز. بۇل وسىمدىكتەردى زيانكەستەر مەن اۋرۋلاردان ءتيىمدى قورعاۋعا كومەكتەسەدى جانە ەكوجۇيە مەن قالا تۇرعىندارىنىڭ دەنساۋلىعىنا تونەتىن قاۋىپتەردى ازايتادى»، – دەپ اتاپ ءوتتى قالالىق ەكولوگيا جانە قورشاعان ورتا باسقارماسى.
ەستەرىڭىزگە سالا كەتەيىك، 20 ساۋىردەن باستاپ الماتىدا وسىمدىكتەردى بيولوگيالىق وڭدەۋ شارالارى باستالدى. جۇمىستار تۇنگى ۋاقىتتا جۇرگىزىلەدى جانە ءتورت نەگىزگى كەزەڭنەن تۇرادى:
• I كەزەڭ: 20 ساۋىردەن 30 مامىرعا دەيىن (ەمەندەردى ءتورت رەت، تەرەكتەردى ەكى رەت وڭدەۋ)؛
• II كەزەڭ: 1 ماۋسىمنان 30 ماۋسىمعا دەيىن؛
• III كەزەڭ: 5 شىلدەدەن 5 تامىزعا دەيىن؛
• IV كەزەڭ: 15 تامىزدان 20 قىركۇيەككە دەيىن.
وڭدەۋ ءۇشىن سەرتيفيكاتتالعان بيولوگيالىق جانە كەي جاعدايدا تومەن ءقاۋىپ كلاسىنداعى (پ-4) حيميالىق پرەپاراتتار قولدانىلادى. ولار ەل اۋماعىندا قولدانۋعا رۇقسات ەتىلگەن جانە كليماتتىق فاكتورلار ەسكەرىلگەن، ادامدار، قۇستار مەن جانۋارلار ءۇشىن زيانسىز.
سوڭعى ءتورت جىلداعى جۇمىستاردىڭ ناتيجەلەرى بويىنشا بۇل پرەپاراتتار، اسىرەسە، كاشتان جاپىراعى كوبەلەگى، دولانا جانە راۋشان جاپىراق شيراتقىشى سياقتى فيتوفاگ زيانكەستەرگە قارسى كۇرەستە جوعارى تيىمدىلىك كورسەتكەن. جىل سايىنعى جۇيەلى وڭدەۋ زياندى جاندىكتەردىڭ سانىن تۇراقتى تۇردە ازايتىپ، قالاداعى اعاشتاردىڭ جاي-كۇيىن ساقتاپ تۇرۋعا مۇمكىندىك بەرەدى.