رەسپۋبليكا اۋماعىندا زاڭدى تۇردە پانا العان بارلىق شەتەلدىكتەر قازاقستاننىڭ بوسقىندارعا قاتىستى حالىقارالىق قوعامداستىق الدىنداعى مىندەتتەمەلەرىنە سايكەس مەملەكەت تاراپىنان قورعاۋمەن جانە قولداۋمەن قامتاماسىز ەتىلگەن، دەپ حابارلايدى aqshamnews.kz.
1998 جىلعى 15 جەلتوقساندا قازاقستان بۇۇ-نىڭ 1951 جىلعى «بوسقىندار مارتەبەسى تۋرالى» كونۆەنسياسىنا رەسمي تۇردە قوسىلىپ، وزىنە بەلگىلى ءبىر مىندەتتەمەلەر الدى.
قازاقستان اۋماعىنداعى پانا ىزدەۋشىلەر مەن بوسقىنداردىڭ قۇقىقتىق جاعدايىنا وراي تۋىنداعان قوعامدىق قاتىناستارى بوسقىندار قۇقىعى سالاسىنداعى حالىقارالىق زاڭناما قاعيداتتارىنا نەگىزدەلىپ قابىلدانعان «بوسقىندار تۋرالى» زاڭمەن رەتتەلەدى. بۇل قاعيداتتار اتاپ ايتقاندا: جەر اۋدارىلماۋ، بوسقىن مارتەبەسىن بەرۋدىڭ اشىقتىعى مەن قولجەتىمدىلىگى، كەمسىتپەۋشىلىك، اقپاراتتىڭ قۇپيالىلىعى، وتباسىنىڭ بىرلىگى جانە بوسقىنداردىڭ بالالارىنىڭ قۇقىقتارىن قورعاۋ سەكىلدى ماسەلەلەردى قامتيدى.
قازىرگى ۋاقىتتا قازاقستاندا پانا ىزدەگەن 265 ادام جانە 301 بوسقىن ءومىر سۇرۋدە. ولاردىڭ كوپشىلىگى الماتى قالاسى مەن الماتى وبلىسىندا تۇرادى.
ءبىزدىڭ رەسپۋبليكامىزداعى پانا ىزدەۋشىلەر مەن بوسقىندارعا تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە مەديسينالىق كومەك جانە قولدانىستاعى زاڭناماعا سايكەس اتاۋلى الەۋمەتتىك كومەك كورسەتىلەدى.
سونىمەن بىرگە بوسقىندار مەن پانا ىزدەۋشىلەر ەڭبەك بوستاندىعى مەن كاسىپكەرلىك قىزمەتكە دە قۇقىلى بولادى. ولاردىڭ ەلىمىزدە بولاتىن باسقا شەتەلدىكتەردەن ايىرماشىلىعى، ولارعا ەڭبەك قىزمەتىن جۇزەگە اسىرۋعا جەرگىلىكتى اتقارۋشى ورگاننىڭ رۇقساتىن الۋ تالاپ ەتىلمەيدى.
قازاقستان زاڭناماسى بارلىق بالالاردىڭ، ونىڭ ىشىندە بوسقىندار مەن باسپانا ىزدەپ جۇرگەن ادامداردىڭ بالالارىنىڭ تەگىن نەگىزدە مەكتەپكە دەيىنگى، باستاۋىش، جالپى ورتا ءبىلىم الۋعا، سونداي-اق كونكۋرستىق نەگىزدە جوعارى جانە جوعارى وقۋ ورنىنان كەيىنگى ءبىلىم الۋعا قۇقىعىن قامتاماسىز ەتەدى.
بوسقىندار قازاقستان رەسپۋبليكاسىنىڭ ازاماتتىعىن الۋعا جانە تۇراقتاپ قالۋعا ءوتىنىش جاساۋعا قۇقىلى. قۇجاتتاردى تاپسىرۋ كەزىندە ولارعا شىققان ەلىندە سوتتالماعاندىعى تۋرالى انىقتاما ۇسىنۋ تالاپ ەتىلمەيدى.