الماتىدا «جاسىل دالىزدەر» تۇجىرىمداماسى ىسكە اسىرىلادى

الماتى اكىمى جەتىسۋ اۋدانى تۇرعىندارىمەن كەزدەستى.

اۋدان تۇرعىندارىمەن وتكەن كەزدەسۋدە قالا تۇرعىندارى كوكەيلەرىندە  جۇرگەن سۇراقتارىن قويدى، دەپ حابارلايدى Almaty-akshamy.kz.

«مەن بارلىق جاڭا كوپ قاباتتى قۇرىلىستى Gate City-گە كوشىرۋدى، ياعني قالانىڭ ەكولوگياسىنا جۇكتەمەنى ازايتۋ ءۇشىن الماتىدا از قاباتتى ۇيلەردى عانا قالدىرۋدى ۇسىنامىن»، - دەدى اۋدان تۇرعىندارىنىڭ ءبىرى. 

 بۇل سۇراققا الماتى اكىمى ەربولات دوسايەۆ:

«ەكولوگيا بويىنشا كەشە پرەزيدەنت ءبىزدىڭ جاسىل دالىزدەر بويىنشا جوبامىزدى قولدادى. جوبا اياسىندا قالادا وزەندەر مەن كوشەلەر بويىن كوگالداندىرىرىلىپ، ەكولوگيالىق كولىك تۇرلەرىنە كوشەدى. 2025 جىلدىڭ سوڭىنا دەيىن بىزدە ديزەلمەن جۇرەتىن بىردە-بىر اۆتوبۋس بولمايدى. 

ءبىز سونداي-اق جەل ەكپىنى دەپ اتالاتىن ماسەلەلەردى شەشەمىز. ءبىز ءقازىر ماسەلەنىڭ وڭتايلى شەشىمىن تابۋ ءۇشىن عالىمدارمەن جۇمىس ىستەۋدەمىز. ءبىراق، ەڭ باستىسى، ەگەر ءتيىمدى ەكولوگيالىق كولىك بولسا جانە جىلىتۋ ماۋسىمىندا ءبىز كومىردەن جانە قاتتى وتىننىڭ باسقا تۇرلەرىنەن ارىلساق، وندا قالاداعى جاعدايدى الداعى ءۇش جىلدا جاقسارتامىز دەپ ويلايمىن»، - دەپ جاۋاپ بەردى. 

قالالىق «جاسىل دالىزدەردى» قۇرۋ جونىندەگى ءىس-قيمىل جوسپارى دۇنيەجۇزىلىك بانكپەن بىرلەسىپ ازىرلەنۋدە. وسى باستامالار اياسىندا جالپىعا قولجەتىمدى جاسىل كەڭىستىكتەردىڭ ۇزدىكسىز تىزبەگىن قالىپتاستىرۋ، سونداي-اق الماتى اگلومەراسياسىنىڭ اۋماعىنداعى وزەندەر مەن كانالدار ارنالارى بويىنداعى كوگالداندىرىلعان اۋماقتاردى ۇلعايتۋ جوسپارلانۋدا.